និក្ខមនំ ៧-៨ និង ម៉ាថាយ ១៥:១-២០
មីកា ៤:១-៥
នោះគេនឹងដំដាវរបស់គេធ្វើជាផាល ហើយលំពែងគេធ្វើជាដង្កាវវិញ។ មីកា ៤:៣
ភរិយាខ្ញុំ ឈ្មោះមីសកា(Miska) បានទិញខ្សែករ និងក្រវិលកង ពីប្រទេសអេត្យូពី។ ភាពប្រណិតដ៏សាមញ្ញរបស់គ្រឿងអលង្ការទាំងនេះ បានឆ្លុះបញ្ចាំងអំពីស្នាដៃសិល្បៈពិតៗ។ ទោះជាយ៉ាងណាក៏ដោយ ប្រវត្តិរបស់គ្រឿងអលង្ការនេះ គឺជាចំណុចដែលគួរឲ្យភ្ញាក់ផ្អើលបំផុត។ ដោយសារមានការប៉ះទង្គិចដ៏សាហាវ និងសង្គ្រាមស៊ីវិល ដែលបានកើតឡើងអស់ជាច្រើនទសវត្សរ៍ ទឹកដីរបស់ប្រទេសអេត្យូពី មានសម្បកកន្ទុះរបស់គ្រាប់កាំភ្លើង និងគ្រាប់ផ្លោង នៅរាត់រាយស្ទើរគ្រប់ទីកន្លែង។ ជនជាតិអេត្យូពីក៏បានស្តារទឹកដីរបស់ខ្លួនឡើងវិញ ដោយសម្អាតកម្ទេចអំបែង ដោយមានសង្ឃឹមក្នុងចិត្ត។ ហើយសិល្បៈករក៏បានកែច្នៃសម្បកកន្ទុះគ្រាប់កាំភ្លើង ធ្វើជាគ្រឿងអលង្ការលក់។
ពេលដែលខ្ញុំបានឮអំពីរឿងនេះ ខ្ញុំក៏បាននឹកចាំព្រះបន្ទូលសន្យា ដែលហោរាមីកាបានប្រកាស ដោយចិត្តក្លាហាន ទៅកាន់រាស្រ្តរបស់ព្រះ យ៉ាងដូចនេះថា គេ“នឹងដំដាវរបស់គេធ្វើជាផាល ហើយលំពែងគេធ្វើជាដង្កាវវិញ”(៤:៣)។ ដាវនិងលំពែង ត្រូវបានគេផលិតមក សម្រាប់សម្លាប់ជីវិតមនុស្ស តែព្រះទ្រង់បានប្រទាននូវដំណោះស្រាយប្រកបដោយព្រះចេស្តា ដោយកែប្រែពួកវាឲ្យក្លាយជាឧបករណ៍ដែលជួយទ្រទ្រង់ជីវិតវិញ។ លោកហោរាក៏បានមានប្រសាសន៍ទៀតថា នៅថ្ងៃដែលព្រះទ្រង់យាងមកវិញ “អស់ទាំងនគរនឹងលែងលើកដាវច្បាំងគ្នាទៀត ក៏មិនរៀនវិជ្ជាចំបាំងទៀតតទៅ”(ខ.៣)។
ការប្រកាសរបស់លោកមីកា នៅសម័យមុន មិនពិបាកឲ្យមនុស្សសម័យបច្ចុប្បន្នយល់ឡើយ។ ពិភពលោកនៅតែមានសង្រ្គាម និងអំពើហិង្សា មិនខុសពីទឹកដីអ៊ីស្រាអែលពីសម័យដើមទេ ហើយពិភពលោកហាក់ដូចជាមិនអាចផ្លាស់ប្តូរ ឲ្យល្អឡើងវិញ។ ប៉ុន្តែ ព្រះទ្រង់បានសន្យាថា ថ្ងៃដ៏គួរឲ្យភ្ញាក់ផ្អើលនឹងមកដល់។ ដូចនេះ យើងត្រូវចាប់ផ្តើមរស់នៅស្របតាមសេចក្តីពិតនេះ។ ព្រះទ្រង់កំពុងជួយយើង ឲ្យធ្វើការថ្វាយព្រះអង្គ ក្នុងពេលសព្វថ្ងៃ ដោយកែប្រែជីវិតមនុស្សជាច្រើន ឲ្យក្លាយជាស្នាព្រះហស្តដ៏ល្អឯក។—Winn Collier
តើអ្នកបានឃើញការអាក្រក់បានផ្លាស់ប្តូរ ដោយសេចក្តីស្រឡាញ់របស់ព្រះ នៅទីណា? តើព្រះទ្រង់បានកែប្រែជីវិតអ្នកឲ្យមានតម្លៃ និងភាពស្រស់ស្អាត ដូចម្តេចខ្លះ?
ឱព្រះអម្ចាស់ សូមព្រះអង្គកែប្រែជីវិតយើងខ្ញុំ។ សូមព្រះអង្គធ្វើការតាមរយៈទូលបង្គំ ដើម្បីនាំមកនូវភាពស្រស់ស្អាតនៅទីនេះ។
គម្រោងអានព្រះគម្ពីររយៈពេល១ឆ្នាំ : និក្ខមនំ ៧-៨ និង ម៉ាថាយ ១៥:១-២០
