គំរូនៃការបន្ទាបខ្លួន ដោយការលះបង់
ដោយJennifer Benson Schuldt
January 31, 2024
ភីលីព ២:១-៨
គឺទ្រង់បានលះបង់ព្រះអង្គទ្រង់ មកយករូបភាពជាបាវបំរើវិញ ព្រមទាំងប្រសូតមកមានរូបជាមនុស្សផង។ ភីលីព ២:៧
បន្ទាប់ពីការប្រកួតចប់ កីឡាករបាល់បោះមហាវិទ្យាល័យដ៏ល្បីល្បាញម្នាក់ មិនបានចេញទៅណាទេ។ គាត់បានជួយអ្នកបោសសម្អាតរើសសម្បកដប និងកញ្ចប់អាហារដែលទស្សនិកជនបានចោល នៅកន្លែងអង្គុយ។ ពេលដែលអ្នកគាំទ្ររបស់គាត់ម្នាក់បានបង្ហោះវីដេអូសកម្មភាពរបស់គាត់ មានមនុស្ស៨ម៉ឺននាក់បានមើលវីដេអូនោះ។ ក្នុងចំណោមពួកគេ មានមនុស្សម្នាក់សរសេរថា “យុវជនម្នាក់នេះ ស្ថិតក្នុងចំណោមមនុស្សដែលបន្ទាបខ្លួនបំផុត ដែលអ្នកធ្លាប់បានជួបក្នុងជីវិតអ្នក”។ សម្រាប់កីឡាករបាល់បោះម្នាក់នេះ ការចេញទៅជាមួយក្រុមរបស់ខ្លួន ដើម្បីអបអរជ័យជម្នះក្នុងការប្រកួត គឺមានភាពងាយស្រួលជាងការដើររើសសំរាម។ តែផ្ទុយទៅវិញ គាត់បានស្ម័គ្រចិត្តធ្វើកិច្ចការដ៏ពិបាកដែលគេរាល់គ្នាមើលរំលង។
ព្រះយេស៊ូវក៏បានបង្ហាញចេញនូវការបន្ទាបខ្លួន ដោយព្រះអង្គបានលះបង់កន្លែងដ៏ខ្ពង់ខ្ពស់ ក្នុងនគរស្ថានសួគ៌ ដើម្បីទទួលយកតួនាទីជាអ្នកបម្រើនៅលើផែនដី(ភីលីព ២:៧)។ ព្រះអង្គបានស្ម័គ្រព្រះទ័យបន្ទាបព្រះកាយចុះ ដើម្បីយើងរាល់គ្នា។ ព្រះរាជកិច្ចរបស់ព្រះអង្គនៅលើផែនដីក៏បានរាប់បញ្ចូលការបង្រៀន ការប្រោសជំងឺ និងការស្រឡាញ់មនុស្សទាំងអស់ ហើយបេសកកម្មធំបំផុតរបស់ព្រះអង្គ គឺការសុគត និងមានព្រះជន្មរស់ឡើងវិញ ដើម្បីសង្គ្រោះពួកគេឲ្យរួចពីបាប។
ទោះគំរូរបស់ព្រះគ្រីស្ទអាចបណ្តាលចិត្តយើងឲ្យរើសសំរាម ជូតសម្អាតតុ ឬលើកអាហារឲ្យគេ តែគំរូព្រះអង្គមានអំណាចបំផុតក្នុងជីវិតយើង នៅពេលណាយើងកែប្រែអាកប្បកិរិយារបស់យើង ចំពោះអ្នកដទៃ។ ការបន្ទាបខ្លួនពិតប្រាកដ គឺជាលក្ខណៈសម្បត្តិនៅខាងក្នុង ដែលមិនគ្រាន់តែកែប្រែសកម្មភាពរបស់យើងប៉ុណ្ណោះទេ តែក៏កែប្រែចិត្តគំនិតយើងផងដែរ។ គំរូរបស់ព្រះអង្គបានបណ្តាលចិត្តយើងឲ្យ ចេះឲ្យតម្លៃអ្នកដទៃលើសខ្លួនឯង(ខ.៣)។
លោកអេនឌ្រូ មួរេយ(Andrew Murray) ជាអ្នកនិពន្ធ និងគ្រូអធិប្បាយ បានមានប្រសាសន៍ថា “ការបន្ទាបខ្លួន គឺជាផ្នែកដ៏សំខាន់ និងគួរឲ្យទាក់ទាញនៃសេចក្តីបរិសុទ្ធ”។ សូមឲ្យជីវិតយើងឆ្លុះបញ្ចាំងឲ្យគេឃើញការបន្ទាបខ្លួន ដោយអំណាចនៃព្រះវិញ្ញាណបរិសុទ្ធ ដូចដែលយើងបង្ហាញឲ្យគេស្គាល់ដួងព្រះទ័យរបស់ព្រះគ្រីស្ទ តាមរយៈទីបន្ទាលនៃការរស់នៅដោយបន្ទាបខ្លួន(ខ.២-៥)។—Jennifer Benson Schuldt
តើការបន្ទាបព្រះកាយរបស់ព្រះយេស៊ូវបានបណ្តាលចិត្តអ្នកយ៉ាងដូចម្តេចខ្លះ? តើអ្នកកំពុងជួបការល្បួងឲ្យមានអំនួត នៅក្នុងផ្នែកណាខ្លះ?
ឱព្រះយេស៊ូវ ទូលបង្គំសូមអរព្រះគុណព្រះអង្គ សម្រាប់ការបន្ទាបព្រះកាយ ដើម្បីទូលបង្គំ។ សូមព្រះអង្គជួយទូលបង្គំឲ្យយកតម្រាប់តាមគំរូព្រះអង្គ ដោយចាត់ទុកតម្រូវការរបស់អ្នកដទៃ សំខាន់ជាងតម្រូវការខ្លួនឯង។
គម្រោងអានព្រះគម្ពីររយៈពេល១ឆ្នាំ ៈ និក្ខមនំ ២៧-២៨ និង ម៉ាថាយ ២១:១-២២