កូល៉ុស ៣:៨-១៧
ដូច្នេះ ចូរប្រដាប់កាយ ដោយចិត្តក្តួលអាណិត។ កូល៉ុស ៣:១២
តើការរស់នៅជាក្សត្រ ឬក្សត្រីមានលក្ខណៈដូចម្តេច? ក្នុងនាមអ្នកស្រីអ៊ែនជេឡា ខេលី(Angela Kelly) ជាកូនស្រីរបស់អ្នកធ្វើការនៅកំពង់ផែ និងគ្រូពេទ្យ គាត់បានដឹងអំពីរឿងនេះ។ គាត់ធ្លាប់មានតួនាទីជាអ្នករៀបចំសំលៀកបំពាក់ឲ្យអតីតក្សត្រីអេលីហ្សាប៊ែត ក្នុងរយៈពេល២ទសវត្សរ៍ចុងក្រោយ នៃព្រះជន្មរបស់ព្រះនាង។ គាត់ក៏មានការទទួលខុសត្រូវ នៅក្នុងការលស្បែកជើងថ្មីរបស់ព្រះនាង ដោយពាក់ស្បែកជើងទាំងនោះ ដើរក្នុងបរិវេណរាជវាំង។ មូលហេតុ គឺដោយសារគាត់មានចិត្តអាណិតចំពោះព្រះនាង ជាស្រ្តីចាស់ជរា ដែលជួនកាលត្រូវឈរជាច្រើនម៉ោង នៅក្នុងកម្មវិធីផ្សេងៗ។ ដោយសារអ្នកទាំងពីរពាក់ស្បែកជើងមានទំហំដូចគ្នា អ្នកស្រីឃែលីអាចជួយកាត់បន្ថយការលំបាកខ្លះៗរបស់ព្រះនាង។
បទពិសោធន៍ផ្ទាល់ខ្លួនរបស់អ្នកស្រីឃែលី ក្នុងការបម្រើក្សត្រីអេលីហ្សាប៊ែត បានធ្វើឲ្យខ្ញុំនឹកចាំ អំពីការលើកទឹកចិត្តដ៏កក់ក្តៅរបស់សាវ័កប៉ុល ដល់ពួកជំនុំនៅទីក្រុងកូល៉ុសឲ្យ “ចូរប្រដាប់កាយ ដោយចិត្តក្ដួលអាណិត សប្បុរស សុភាព សំឡូត និងចិត្តអត់ធ្មត់”(កូល៉ុស ៣:១២)។ ពេលណាជីវិតយើង បានសង់ឡើងនៅលើព្រះយេស៊ូវ(២:៧) យើងក្លាយជា “ពួកអ្នករើសតាំង ដែលបរិសុទ្ធ ហើយស្ងួនភ្ងាដល់ព្រះ”(៣:១២)។ ព្រះអង្គជួយយើង ដោះ“មនុស្សចាស់” របស់យើងចេញ ហើយប្រដាប់ខ្លួន ដោយ “មនុស្សថ្មី”(ខ.៩-១០) ដោយរស់នៅជាមនុស្ស ដែលស្រឡាញ់ និងអត់ទោសឲ្យអ្នកដទៃ ដ្បិតព្រះទ្រង់ស្រឡាញ់ និងអត់ទោសឲ្យយើង(ខ.១៣-១៤)។
នៅជុំវិញខ្លួនយើង មានមនុស្សជាច្រើន ដែលត្រូវការឲ្យយើងយល់ចិត្ត និងមានក្តីអាណិតចំពោះពួកគេ ក្នុងបញ្ហាប្រឈមក្នុងការរស់នៅរៀងរាល់ថ្ងៃ។ ការធ្វើដូចនេះ គឺបានយកតម្រាប់តាមព្រះយេស៊ូវ ជាមហាក្សត្ររបស់យើង ដែលតែងតែមានព្រះទ័យអាណិតចំពោះយើងជានិច្ច។—James Banks
តើព្រះទ្រង់មានព្រះទ័យអាណិតចំពោះអ្នក ដូចម្តេចខ្លះ? តើអ្នកអាចបង្ហាញសេចក្តីស្រឡាញ់របស់ព្រះអង្គ ដល់នរណាខ្លះ នៅថ្ងៃនេះ?
ឱព្រះយេស៊ូវ ទូលបង្គំសូមអរព្រះគុណព្រះអង្គ សម្រាប់ការអត់ទោសបាប និងសេចក្តីស្រឡាញ់ ចំពោះទូលបង្គំ។ សូមព្រះអង្គជួយទូលបង្គំឲ្យទទួល និងចែកចាយដល់អ្នកដទៃ។
គម្រោងអានព្រះគម្ពីររយៈពេល១ឆ្នាំ : ជនគណនា ៤-៦ និង ម៉ាកុស ៤:១-២០
