ព្រះចេស្តារបស់ព្រះខ្លាំងពូកែជាង
ដោយTom Felten
March 4, 2024
ពួកចៅហ្វាយ ៧:៧-៨,១៦-២២
ព្រះយេហូវ៉ាទ្រង់មានព្រះបន្ទូលប្រាប់លោកថា ចូរក្រោកឡើងចុះទៅឯទីបោះទ័ពរបស់គេទៅ ដ្បិតអញបានប្រគល់គេមកក្នុងកណ្តាប់ដៃឯងហើយ។ ពួកចៅហ្វាយ ៧:៩
កាលពីឆ្នាំ ១៩៤៥ “កងទ័ពខ្មោច” បានជួយកងទ័ពអាមេរិក ឲ្យទទួលបានជ័យជម្នះនៅក្នុងការឆ្លងកាត់ទន្លេរ៉ាញ ចូលទឹកដីប្រទេសអាឡឺម៉ង់ ដោយបានជួយឲ្យកងទ័ពសម្ព័ន្ធមិត្ត ទទួលបានមូលដ្ឋានកងទ័ពដ៏សំខាន់ នៅក្នុងប្រតិបត្តិការណ៍សឹក នៅសមរភូមិខាងលិច នៃសង្គ្រាមលោកលើកទី២។ តាមពិត កងទ័ពទាំងនោះសុទ្ធតែជាមនុស្ស មិនមែនជាខ្មោចឡើយ ដែលជាផ្នែកមួយរបស់ទីបញ្ជាការកងទ័ពពិសេសទី២៣។ កាលនោះ កងទ័ពដែលមានគ្នា១១០០នាក់ បានធ្វើឲ្យសត្រូវយល់ឃើញថា ពួកគេមានគ្នា៣ម៉ឺននាក់ ដោយពួកគេប្រើរថក្រោះក្លែងក្លាយ និងចាក់មេក្រូបញ្ចេញសូរសន្ធឹកកងទ័ព និងយានយន្តជាច្រើនគ្រឿងបន្លាស់ទី ។ល។ ដូចនេះ សមាជិករបស់កងទ័ពខ្មោច ដែលមានគ្នាតិចជាងសត្រូវ បានធ្វើឲ្យសត្រូវជឿថា ពួកគេមានគ្នាច្រើនសន្ធឹក។
ពួកសាសន៍ម៉ាឌាន និងសម្ព័ន្ធមិត្តរបស់ពួកគេ ក៏មានការភ័យខ្លាចផងដែរ នៅចំពោះសត្រូវដែលមានគ្នាតិច ដែលធ្វើឲ្យគេគិតស្មានថា ពួកគេមានគ្នាច្រើន(ពួកចៅហ្វាយ ៧:៨-២២)។ ព្រះអម្ចាស់បានប្រើលោកគេឌាន ជាពួកចៅហ្វាយ ជាហោរា និងជាអ្នកដឹកនាំកងទ័ពអ៊ីស្រាអែល ឲ្យប្រើប្រាស់កងទ័ពដ៏តូចរបស់គាត់ ឲ្យធ្វើជាប្រភពនៃការភ័យខ្លាចរបស់ពួកខ្មាំងសត្រូវ។ ពួកគេក៏បានប្រើសម្លេងផ្លុំត្រែ សម្លេងបោកក្អម និងសម្លេងមនុស្ស និងរូបភាពបន្លាច ដោយដុតភ្លើងចន្លុះភ្លឺចិញ្ចាច ធ្វើឲ្យសត្រូវគិតស្មានថា ពួកគេមានគ្នាច្រើន ដូចហ្វូងសត្វកណ្តូប(ខ.១២)។ ពួកអ៊ីស្រាអែលបានប្រយុទ្ធឈ្នះពួកសត្រូវនៅយប់នោះ ដោយប្រើកងទ័ពដែលបន្ថយចំនួនពី៣២០០០នាក់ មកនៅត្រឹម៣០០នាក់ ស្ថិតក្រោមការបញ្ជារបស់ព្រះអម្ចាស់(ខ.២-៨)។ តើហេតុអ្វី? គឺដើម្បីឲ្យមនុស្សដឹងច្បាស់ថា នរណាពិតជាបានឈ្នះសង្រ្គាមនោះ។ គឺដូចព្រះអង្គប្រាប់លោកគេឌានថា “ចូរក្រោកឡើងចុះទៅឯទីបោះទ័ពរបស់គេទៅ ដ្បិតអញបានប្រគល់គេមកក្នុងកណ្តាប់ដៃឯងហើយ”(ខ.៩)។
ពេលណាយើងមានអារម្មណ៍ទន់ខ្សោយ និងតូចទៀប ចូរយើងស្វែងរកព្រះអម្ចាស់ ហើយសម្រាកនៅក្នុងកម្លាំងរបស់ព្រះអង្គ។ “កំឡាំងអញបានពេញខ្នាត ដោយសេចក្តីកំសោយ”(២កូរិនថូស ១២:៩)។—Tom Felten
តើមានសត្រូវ ឬបញ្ហាប្រឈមដ៏ធំអ្វីខ្លះ ដែលអ្នកកំពុងជួបប្រទះ? តើអ្នកអាចសម្រាកនៅក្នុងព្រះចេស្តារបស់ព្រះ ដូចម្តេចខ្លះ ខណៈពេលដែលអ្នកប្រឈមមុខដាក់បញ្ហាទាំងនោះ?
ឱព្រះយេស៊ូវ សូមព្រះអង្គជួយទូលបង្គំ ឲ្យរកឃើញកម្លាំងរបស់ព្រះអង្គ ក្នុងភាពកម្សោយរបស់ទូលបង្គំ។
គម្រោងអានព្រះគម្ពីររយៈពេល១ឆ្នាំ : ជនគណនា ៣៤-៣៦ និង ម៉ាកុស ៩:៣០-៥០