អេភេសូរ ៣:១៤-២០
ឲ្យព្រះគ្រីស្ទបានសណ្ឋិតក្នុងចិត្តអ្នករាល់គ្នា ដោយសារសេចក្តីជំនឿ។ អេភេសូរ ៣:១៧
ខណៈពេលដែលអាកាសធាតុត្រជាក់ខ្លាំងបានវាយប្រហារមកលើរដ្ឋរបស់ខ្ញុំ នៅភាគខាងលិចនៃសហរដ្ឋអាមេរិក ម្តាយរបស់ខ្ញុំជាស្រ្តីមេម៉ាយ បានព្រមមកស្នាក់នៅជាមួយគ្រួសារខ្ញុំ ទំរាំខ្យល់ព្យុះទឹកកកកន្លងផុតទៅ។ ទោះជាយ៉ាងណាក៏ដោយ បន្ទាប់ពីគ្រោះធម្មជាតិនេះបានកន្លងផុតទៅ គាត់មិនដែលបានត្រឡប់ទៅផ្ទះគាត់វិញទេ។ គាត់បានផ្លាស់មករស់នៅជាមួយគ្រួសារខ្ញុំអស់មួយជីវិត។ វត្តមានរបស់គាត់បានផ្លាស់ប្តូរក្រុមគ្រួសារខ្ញុំ តាមរបៀបវិជ្ជមានជាច្រើន។ ជារៀងរាល់ថ្ងៃ គាត់តែងតែមានពេលចែកចាយប្រាជ្ញា ផ្តល់យោបល់ល្អៗដល់សមាជិកគ្រួសារ និងចែកចាយអំពីរឿងរបស់បុព្វបុរសរបស់យើង។ គាត់និងស្វាមីរបស់ខ្ញុំបានក្លាយជាមិត្តល្អបំផុត ដោយពួកគេចូលចិត្តរឿងកំប្លែង និងមើលកីឡាដូចគ្នា។ គាត់មិនមែនជាភ្ញៀវរបស់គ្រួសារយើងទេ តែជាសមាជិកគ្រួសារអចិន្ត្រៃយ៍ដ៏សំខាន់ ដែលនាំមកនូវការផ្លាស់ប្តូរ ក្នុងចិត្តគំនិតយើង តាំងពីមុនពេលព្រះទ្រង់យកគាត់ទៅជាមួយព្រះអង្គ។
អនុស្សាវរីយ៍នេះបានធ្វើឲ្យខ្ញុំនឹកចាំ អំពីការពិពណ៌នារបស់សាវ័កយ៉ូហាន អំពីព្រះយេស៊ូវថា ព្រះអង្គ“ស្នាក់នៅជាមួយនឹងយើងរាល់គ្នា”(យ៉ូហាន ១:១៤)។ នេះជាការពិពណ៌នាដែលប៉ះពាល់ចិត្តយ៉ាងខ្លាំង ព្រោះក្នុងព្រះគម្ពីរដើមភាសាក្រិក ពាក្យ ស្នាក់នៅជាមួយ គឺមានន័យថា “តាំងទីលំនៅជាមួយ”។
យើងទទួលព្រះយេស៊ូវដោយជំនឿ ជាព្រះដែលគង់នៅក្នុងចិត្តយើង។ គឺដូចដែលសាវ័កប៉ូលបានបង្រៀនថា “ដើម្បីឲ្យទ្រង់បានប្រោសប្រទាន ឲ្យអ្នករាល់គ្នាបានព្រះចេស្តា ចំរើនកំឡាំងនៃមនុស្សខាងក្នុង ដោយសារព្រះវិញ្ញាណទ្រង់ តាមសិរីល្អនៃទ្រង់ដ៏ប្រសើរក្រៃលែង ឲ្យព្រះគ្រីស្ទបានសណ្ឋិតក្នុងចិត្តអ្នករាល់គ្នា ដោយសារសេចក្តីជំនឿ ប្រយោជន៍ឲ្យអ្នករាល់គ្នាបានចាក់ឫស ហើយតាំងមាំមួនក្នុងសេចក្តីស្រឡាញ់”(អេភេសូរ ៣:១៦-១៧)។
ព្រះយេស៊ូវបានយាងមកគង់នៅជាមួយយើង គឺមិនមែនជាភ្ញៀវរបស់យើងនោះទេ។ ព្រះអង្គគង់នៅជាមួយ ដើម្បីប្រទានកម្លាំងដល់អស់អ្នកដែលដើរតាមព្រះអង្គ។ ចូរយើងបើកទ្វារចិត្តរបស់យើងឲ្យធំទូលាយ ដើម្បីទទួលស្វាគមន៍ព្រះអង្គគង់នៅក្នុងជីវិតយើង ដោយសោយរាជ្យលើបល្ល័ង្កចិត្តយើង ដើម្បីដឹកនាំជីវិតយើងជារៀងរាល់ថ្ងៃ។—Patricia Raybon
តើការបើកចិត្តរបស់យើងទទួលព្រះគ្រីស្ទចូលគង់ មានន័យដូចម្តេចចំពោះអ្នក? តើអ្នកអាចចុះចូលនឹងការដឹកនាំរបស់ព្រះអង្គ ឲ្យកាន់តែខ្លាំងឡើង យ៉ាងដូចម្តេចខ្លះ?
ឱព្រះយេស៊ូវ ជាព្រះនៃសេចក្តីស្រឡាញ់ ខណៈពេលដែលព្រះអង្គគង់នៅក្នុងចិត្តទូលបង្គំ សូមព្រះអង្គកែប្រែទូលបង្គំឲ្យមានលក្ខណៈកាន់តែដូចព្រះអង្គ។
Visit ODBU.org/courses/NT111 to learn more about the life of Jesus.
គម្រោងអានព្រះគម្ពីររយៈពេល១ឆ្នាំ : ជនគណនា ៣១-៣៣ និង ម៉ាកុស ៩:១-២៩
