សុភាសិត ១៨:១០-១២
ព្រះនាមព្រះយេហូវ៉ា ជាប៉មមាំមួន មនុស្សសុចរិតរត់ចូលទៅពឹងជ្រក ហើយមានសេចក្តីសុខ។ សុភាសិត ១៨:១០
ខ្សែភាពយន្តដែលគួរឲ្យកត់សំគាល់ នៅឆ្នាំ២០១៩ មានចំណងជើងថា ស្រ្តីតូចតាច បានធ្វើឲ្យខ្ញុំនឹកចាំ អំពីសៀវភៅរឿងប្រលោមលោកចាស់មួយក្បាលដែលបានដាច់ដោច ជាពិសេសគឺពាក្យលើកទឹកចិត្តរបស់តួអង្គឈ្មោះ ម៉ាមី(Marmee) ជាម្តាយដែលមានប្រាជ្ញា និងមានចិត្តសុភាព។ ខ្ញុំមានការចាប់អារម្មណ៍ចំពោះការពិពណ៌នារបស់សៀវភៅប្រលោមលោកនេះ អំពីសេចក្តីជំនឿដ៏រឹងមាំរបស់គាត់ ដែលបានបង្កប់នៅក្នុងពាក្យសម្តីលើកទឹកចិត្តជាច្រើន ទៅកាន់ កូនស្រីទាំងអស់របស់គាត់។ ខ្ញុំមានការចាប់អារម្មណ៍បំផុត ចំពោះពាក្យសម្តីរបស់គាត់ ដែលបានលើកទឹកចិត្តថា “អ្នកអាចជួប … បញ្ហា និងការល្បួងជាច្រើន ប៉ុន្តែ អ្នកអាចជម្នះបញ្ហា និងការល្បួងទាំងអស់ បើសិនជាអ្នករៀនទទួលកម្លាំង និងភាពស្រទន់ពីព្រះវរបិតារបស់អ្នកដែលគង់នៅស្ថានសួគ៌”។
សម្រង់សម្តីនេះបានធ្វើឲ្យខ្ញុំនឹកចាំ អំពីសេចក្តីពិត ដែលបានចែងក្នុងបទគម្ពីរសុភាសិតថា “ព្រះនាមព្រះយេហូវ៉ា ជាប៉មមាំមួន មនុស្សសុចរិតរត់ចូលទៅពឹងជ្រក ហើយមានសេចក្តីសុខ”(១៨:១០)។ គេសង់ប៉មក្នុងទីក្រុង នៅសម័យបុរាណ ធ្វើជាកន្លែងជ្រកកោន ក្នុងពេលមានគ្រោះថ្នាក់ ប្រហែលដោយសារការវាយប្រហារពីសត្រូវ។ ដូចគ្នានេះដែរ គឺតាមរយៈការរត់ទៅរកព្រះ ដែលអ្នកជឿព្រះយេស៊ូវ អាចដកពិសោធន៍នឹងសន្តិភាព ក្នុងការថែរក្សារបស់ព្រះអង្គ ដែលជាទីជ្រកកោន និងកម្លាំងរបស់យើង(ទំនុកដំកើង ៤៦:១)។
បទគម្ពីរសុភាសិត ១៨:១០ បានប្រាប់យើង អំពីការពារដែលចេញមកពី “ព្រះនាម” របស់ព្រះ ដែលបង្ហាញថា ព្រះអង្គជានរណា។ ព្រះគម្ពីរបានពិពណ៌នាថា ព្រះអង្គជា “ជាព្រះទ្រង់មានព្រះហឫទ័យមេត្តាករុណា ហើយទន់សន្តោស ទ្រង់យឺតនឹងខ្ញាល់ ហើយមានសេចក្តីសប្បុរស និងសេចក្តីទៀងត្រង់ ជាបរិបូរ”(និក្ខមនំ ៣៤:៦)។ ការការពាររបស់ព្រះអម្ចាស់ គឺបានមកពីកម្លាំង ក៏ដូចជាសេចក្តីស្រទន់ និងសេចក្តីស្រឡាញ់របស់ព្រះអង្គ ដែលបានបណ្តាលព្រះទ័យព្រះអង្គឲ្យប្រទានកន្លែងជ្រកកោនដល់មនុស្សដែលមានការឈឺចាប់។ សម្រាប់អស់អ្នកដែលកំពុងមានទុក្ខលំបាក ព្រះវរបិតានៃយើងដែលគង់នៅស្ថានសួគ៌ បានប្រទានកន្លែងជ្រកកោន នៅក្នុងកម្លាំង និងភាពស្រទន់របស់ព្រះអង្គ។—Lisa M. Samra
តើអ្នកបានដកពិសោធន៍នឹងកម្លាំងរបស់ព្រះអម្ចាស់ ក្នុងពេលមានបញ្ហាដូចម្តេចខ្លះ? តើអ្នកបានឃើញព្រះអង្គថែរក្សា ដោយការកម្សាន្តចិត្ត នៅពេលណាខ្លះ?
ឱព្រះវរបិតា ដែលគង់នៅស្ថានសួគ៌ សូមព្រះអង្គជួយទូលបង្គំ ឲ្យរត់ទៅរកព្រះអង្គ ទាំងក្នុងពេលមានក្តីសុខ ក៏ដូចជាពេលមានទុក្ខលំបាក។
គម្រោងអានព្រះគម្ពីររយៈពេល១ឆ្នាំ : ចោទិយកថា ៣-៤ និង ម៉ាកុស ១០:៣២-៥២
