មើលរំលងចំណេះដឹងមូលដ្ឋាន
ដោយWinn Collier
March 25, 2024
ម៉ាថាយ ២២:២៣-៣៣
អ្នករាល់គ្នាភាន់ច្រឡំទេ ពីព្រោះមិនយល់គម្ពីរ ឬព្រះចេស្តានៃព្រះសោះ។ ម៉ាថាយ ២២:២៩
ក្រុមហ៊ុនមែកដូណាល់ បានកាន់កាប់ដំណែងជាស្តេចលក់អាហាររហ័ស អស់រយៈពេលជាច្រើនទសវត្សរ៍មកហើយ ដោយសារនំបឺហ្គ័រ១ភាគ៤របស់ខ្លួន។ ក្នុងទសវត្សរ៍ឆ្នាំ១៩៨០ ក្រុមហ៊ុនអាហាររហ័សមួយទៀត ដែលជាគូរប្រជែង មានគំនិតថ្មីមួយ ដើម្បីដណ្តើមដំណែងពីក្រុមហ៊ុននេះ។ ក្រុមហ៊ុនA&W បានផ្តល់ឲ្យអតិថិជននូវនំបឺហ្គ័រ១ភាគ៣ ដែលមានទំហំធំជាងនំបឺហ្គ័ររបស់ក្រុមហ៊ុមមែកដូណាល់ តែលក់ក្នុងតម្លៃដូចគ្នា។ ជាងនេះទៅទៀត នំបឺហ្គ័ររបស់ក្រុមហ៊ុនA&W បានឈ្នះការប្រកួតភ្លក់រស់ជាតិ ដោយបិទភ្នែកជាច្រើនលើកច្រើនសារ។ ប៉ុន្តែ ក្រុមហ៊ុននេះបានបរាជ័យ ដោយសារលក់នំបឺហ្គ័រនោះមិនដាច់។ ទីបំផុតគេក៏បានឈប់ធ្វើនំបឺហ្គ័រនោះលក់ទៀត។ ការស្រាវជ្រាវបានបង្ហាញថា អតិថិជនបានគិតលេខខុស ដោយគិតស្មានថា នំបឺហ្គ័រ១ភាគ៣ តូចជាងនំបឺហ្គ័រ១ភាគ៤។ គំនិតដ៏ឆ្លាតវ័យបានបរាជ័យ ដោយសារមនុស្សមានការយល់ច្រឡំ ក្នុងចំណេះដឹងមូលដ្ឋាន។
ព្រះយេស៊ូវបានដាស់តឿនយើង អំពីការយល់ច្រឡំដែលងាយនឹងកើតមាន។ អ្នកដឹកនាំសាសនាបានរៀបគម្រោងដាក់អន្ទាក់ ដើម្បីបង្ខូចព្រះនាមព្រះអង្គ ក្នុងអំឡុងសប្តាហ៍ដែលព្រះអង្គត្រូវសុគតនៅលើឈើឆ្កាង។ ពួកគេបានលើកយករឿងដ៏ចម្លែកមួយ អំពីស្រ្តីម្នាក់ ដែលក្លាយជាស្ត្រីមេម៉ាយ៧ដង ដោយសារប្តីរបស់គាត់ទាំងអស់បានស្លាប់ចោលគាត់(ម៉ាថាយ ២២:២៣-២៨)។ ព្រះយេស៊ូវក៏បានឆ្លើយតប ដោយបង្ហាញឲ្យគេដឹងថា រឿងនេះមិនពិបាកយល់ទេ។ ផ្ទុយទៅវិញ បញ្ហាស្ថិតនៅត្រង់ថា ពួកគេមិនយល់បទគម្ពីរ និងព្រះចេស្តារបស់ព្រះ(ខ.២៩)។ ព្រះអង្គមានបន្ទូលថា គោលបំណងជាចម្បងរបស់ព្រះគម្ពីរ គឺមិនមែនដើម្បីឆ្លើយតបសំណួរ ឬប្រស្នាដែលឡូហ្សិក ឬទស្សនវិជ្ជានោះទេ តែដើម្បីនាំយើងឲ្យស្គាល់ និងស្រឡាញ់ព្រះយេស៊ូវ ហើយ “មានជីវិតអស់កល្ប” ក្នុងព្រះអង្គ(យ៉ូហាន ៥:៣៩)។ នេះជាចំណេះដឹងមូលដ្ឋានដែលអ្នកដឹកនាំសាសនាទាំងនោះមិនយល់។
យើងក៏មានការយល់ច្រឡំអំពីចំណេះដឹងមូលដ្ឋានជាញឹកញាប់ផងដែរ។ គោលបំណងធំបំផុតរបស់ព្រះគម្ពីរ គឺដើម្បីជួយមនុស្សឲ្យមានការប្រកបទាក់ទងជាមួយព្រះយេស៊ូវ ជាព្រះដ៏រស់។ យើងនឹងជួបរឿងដ៏ឈឺចាប់ បើសិនជាយើងមើលរំលងចំណុចនេះ។—Winn Collier
តើអ្នកមានការមើលរំលងចំណេះដឹងមូលដ្ឋានក្នុងព្រះគម្ពីរ យ៉ាងដូចម្តេចខ្លះ? តើអ្នកអាចវិលត្រលប់មកចំណេះមូលដ្ឋានក្នុងព្រះគម្ពីរអំពីព្រះយេស៊ូវ ដូចម្តេចខ្លះ?
ឱព្រះអម្ចាស់ ពេលទូលបង្គំមានការវង្វេង សូម្បីតែនៅក្នុងរឿងដ៏សាមញ្ញ សូមព្រះអង្គជួយទូលបង្គំឲ្យមានការយល់ដឹងដ៏ត្រឹមត្រូវ។
គម្រោងអានព្រះគម្ពីររយៈពេល១ឆ្នាំ : យ៉ូស្វេ ២២-២៤ និង លូកា ៣