ព្រះយេស៊ូវបានរងទុក្ខ និងសុគតជំនួសយើង
ដោយMarvin Williams
March 28, 2024
១ពេត្រុស ៣:១៣-១៨
ព្រោះព្រះគ្រីស្ទទ្រង់បានរងទុក្ខម្តង ដោយព្រោះបាបដែរ គឺជាព្រះដ៏សុចរិត ទ្រង់រងទុក្ខជំនួសមនុស្សទុច្ចរិត ដើម្បីនឹងនាំយើងរាល់គ្នាទៅដល់ព្រះ ដោយទ្រង់ត្រូវគេធ្វើគុតខាងសាច់ឈាម តែបានវិញ្ញាណប្រោសឲ្យរស់វិញ។ ១ពេត្រុស ៣:១៨
មានរឿងព្រេងដំណាលមកថា ស្តេចលេអូនីដាស ទី១(Leonidas I) បានដឹកនាំកងទ័ពនគរស្ប៉ាតា ដែលមានគ្នាតែ៣រយនាក់ ទៅតទល់នឹងកងទ័ពចក្រភពព័រស៊ីដែលមានគ្នាច្រើនជាងរាប់សែននាក់ ដឹកនាំដោយស្តេចសើរស៊ី(Xerxes) ក្នុងអំឡុងពេលនៃការឈ្លានពានរបស់ចក្រភពពើស៊ី ចូលទឹកដីក្រិក។ ស្តេចលេអូនីដាសជ្រាបថា កងទ័ពសត្រូវមានគ្នាច្រើនជាងកងទ័ពទ្រង់យ៉ាងលើសលប់ ដូចនេះ ទ្រង់ក៏បានសម្រេចព្រះទ័យប្រយុទ្ធដោយចិត្តអង់អាច រហូតដល់ដង្ហើមចុងក្រោយ នៅក្នុងច្រកផ្លូវធើម៉ូភីលេ ជាច្រកផ្លូវដ៏ចង្អៀតចូលទឹកដីក្រិក។ ការលះបង់របស់ទ្រង់ និងកងទ័ពរបស់ទ្រង់បានពន្យារពេលការឈ្លានពានរបស់កងទ័ពពើស៊ីចូលទឹកដីក្រិក ដោយបានផ្តល់ឱកាសឲ្យកងទ័ពមកពីនគរក្រិកផ្សេងទៀតអាចដកថយ ដើម្បីទៅប្រមូលផ្តុំគ្នានៅពេលក្រោយទៀត ហើយទីបំផុត កងទ័ពក្រិកអាចយកជ័យជម្នះមកលើកងទ័ពពើស៊ីក្នុងសង្រ្គាមដ៏ធំនេះ។
ការលះបង់របស់ស្តេចលេអូនីដាស និងកងទ័ពស្ប៉ាតារបស់ទ្រង់ បានជួយសង្គ្រោះប្រជាជនក្រិករាប់លាននាក់ ឲ្យរួចផុតពីការកាប់សម្លាប់ និងការកៀបសង្កត់របស់ចក្រភពពើស៊ី។ រឿងនេះបានធ្វើឲ្យខ្ញុំនឹកចាំអំពីការលះបង់ព្រះជន្មរបស់ព្រះយេស៊ូវ កាលពីជាង២ពាន់ឆ្នាំមុន ដើម្បីបុព្វហេតុធំលើសនេះទៀត ដែលជាការរំដោះមនុស្សឲ្យរួចផុតពីបាប និងសេចក្តីស្លាប់ខាងវិញ្ញាណអស់កល្បជានិច្ច។ “ទ្រង់បានរងទុក្ខម្តង ដោយព្រោះបាបដែរ គឺជាព្រះដ៏សុចរិត ទ្រង់រងទុក្ខជំនួសមនុស្សទុច្ចរិត ដើម្បីនឹងនាំយើងរាល់គ្នាទៅដល់ព្រះ”(១ពេត្រុស ៣:១៨)។ ក្នុងនាមព្រះអង្គជាដង្វាយលោះបាប ដែលគ្មានបាបសោះ ព្រះអង្គបានរងទុក្ខ និងសុគតម្តងជាសម្រេច(ហេព្រើរ ១០:១០) សម្រាប់មនុស្សទាំងអស់ដែលជឿព្រះអង្គ។ ព្រះអង្គបានទទួលយកទោសបាបរបស់យើងដាក់នៅលើអង្គទ្រង់ នៅលើឈើឆ្កាង។ ការសុគតរបស់ព្រះគ្រីស្ទជំនួសយើង នៅលើឈើឆ្កាងបានផ្តល់ឲ្យនូវ “ក្តីសង្ឃឹម” ដល់យើង(១ពេត្រុស ៣:១៥,១៨ យ៉ូហាន ១០:១៥) ហើយក៏បានផ្សះផ្សាយើងឲ្យជានឹងព្រះផងដែរ។
បានជាយើងអាចអរសប្បាយ និងរកឃើញការកម្សាន្តចិត្ត និងទំនុកចិត្ត ក្នុងសេចក្តីពិតដែលថា មានតែតាមរយៈការសុគតរបស់ព្រះគ្រីស្ទជំនួសយើង ជាមនុស្សមានបាបទេ ទើបយើងអាចរួចផុតពីបាប និងសេចក្តីស្លាប់អស់កល្បជានិច្ច ហើយមានផ្លូវចូលទៅរកការប្រកបទាក់ទងជាមួយព្រះនៃសេចក្តីស្រឡាញ់។—Marvin Williams
តើការសុគតរបស់ព្រះគ្រីស្ទជំនួសអ្នក បានកែប្រែជីវិតអ្នកដូចម្តេចខ្លះ? តើការដែលអ្នកមានផ្លូវចូលទៅរកព្រះ និងមានជីវិតអស់កល្ប មានន័យយ៉ាងណាសម្រាប់អ្នក?
ឱព្រះយេស៊ូវ ទូលបង្គំសូមអរព្រះគុណព្រះអង្គ សម្រាប់ការសុគតជំនួសទូលបង្គំ ដើម្បីឲ្យទូលបង្គំមានផ្លូវចូលទៅរកព្រះវរបិតា។
Learn more at odb.org/personal-relationship-with-god/
គម្រោងអានព្រះគម្ពីររយៈពេល១ឆ្នាំ : ពួកចៅហ្វាយ ៧-៨ និង លូកា ៥:១-១៦