អ្នកដឹកនាំ ក្នុងទំនុកដំកើង ៧២
ដោយSheridan Voysey
April 2, 2024
ទំនុកដំកើង ៧២:១-៧
សូមឲ្យទ្រង់បានដូចជាភ្លៀងធ្លាប់ចុះមកលើវាល ដែលច្រូតស្មៅហើយ គឺដូចជាភ្លៀង១មេៗដែលស្រោចដី។ ទំនុកដំកើង ៧២:៦
កាលពីខែកក្កដា ឆ្នាំ២០២២ នាយករដ្ឋមន្ត្រីនៃប្រទេសអង់គ្លេស ត្រូវបង្ខំចិត្តចុះចេញពីតំណែង បន្ទាប់ពីមនុស្សជាច្រើនបានយល់ឃើញថា លោកស្រីបានបរាជ័យ នៅក្នុងការរក្សាភាពស្អាតស្អំ(នាយករដ្ឋមន្រ្តីរូបនេះបានលាលែងពីតំណែង បន្ទាប់ពីបានទទួលការតែងតាំងបានតែ៣ខែប៉ុណ្ណោះ)។ ព្រឹត្តិការណ៍នេះបានកើតឡើង នៅពេលដែលរដ្ឋមន្រ្តីក្រសួងសុខាភិបាល បានចូលរួមពិធីអធិស្ឋានក្នុងពេលបរិភោគអាហារពេលព្រឹកប្រចាំឆ្នាំរបស់សមាជិកសភា ហើយក៏បានទទួលការបណ្តាលចិត្ត ឲ្យរស់នៅដោយភាពស្អាតស្អំ ហើយក៏បានសម្រេចចិត្តចុះចេញពីតំណែង។ នៅពេលដែលរដ្ឋមន្រ្តីដទៃទៀតចុះចេញពីតំណែងជាបន្តបន្ទាប់ នាយករដ្ឋមន្រ្តីរូបនោះក៏បានដឹងថា គាត់ក៏ត្រូវចុះចេញផងដែរ។ នេះជារឿងដែលគួរឲ្យកត់សំគាល់ណាស់ ដែលបានកើតឡើង បន្ទាប់ពីពួកគេបានចូលរួមកម្មវិធីជួបជុំគ្នាអធិស្ឋានដ៏ស្ងប់ស្ងាត់។
ព្រះគម្ពីរក៏បានបង្រៀនអ្នកជឿព្រះយេស៊ូវឲ្យអធិស្ឋាន ឲ្យអ្នកដឹកនាំនយោបាយផងដែរ(១ធីម៉ូថេ ២:១-២) ហើយបទគម្ពីរ ទំនុកដំកើង ជំពូក៧២ ក៏បានផ្តល់ឲ្យនូវលំនាំនៃការអធិស្ឋានដ៏ល្អ ដោយបានពិពណ៌នាអំពីតួនាទីរបស់អ្នកដឹកនាំប្រទេស និងការអធិស្ឋានឲ្យអ្នកដឹកនាំប្រទេសបំពេញតួនាទីទាំងនោះឲ្យបានល្អ។ បទគម្ពីរនេះក៏បានបកស្រាយថា អ្នកដឹកនាំល្អ ជាអ្នកដឹកនាំដែលប្រកាន់ខ្ជាប់នូវយុត្តិធម៌ និងភាពស្អាតស្អំ(ខ.១-២) ជាអ្នកការពារមនុស្សដែលងាយរងគ្រោះ(ខ.៤) បម្រើអ្នកក្រ(ខ.១២-១៣) ហើយទាស់ប្រឆាំងនឹងការកៀបសង្កត់(ខ.១៤)។ ការកាន់កាប់តំណែងរបស់ពួកគេ ពិតជានាំមកនូវភាពស្រស់ថ្លាណាស់ គឺប្រៀបដូចជា ភ្លៀងដែលស្រោចស្រពដី(ខ.៦) ដោយនាំភាពសម្បូរសប្បាយដល់ប្រទេសជាតិ(ខ.៣,៧,១៦)។ មានតែព្រះមែស៊ីទេ ដែលអាចបំពេញតួនាទីទាំងនោះបានល្អឥតខ្ចោះ(ខ.១១) ដូចនេះ តើមាននរណាអាចធ្វើជាគំរូនៃអ្នកដឹកនាំបានល្អជាងព្រះអង្គទៀត?
សុខុមាលភាពរបស់ប្រទេសជាតិ មានការពឹងផ្អែកយ៉ាងខ្លាំងមកលើភាពស្អាតស្អំរបស់អ្នកដឹកនាំប្រទេស។ ចូរយើងអធិស្ឋាន សូមឲ្យប្រទេសជាតិយើងមានអ្នកដឹកនាំ ដែលមានលក្ខណៈដូចអ្នកដឹកនាំ ដែលមានចែងក្នុងបទគម្ពីរទំនុកដំកើង ជំពូក៧២ ចូរយើងអធិស្ឋានសូមព្រះអង្គជួយពួកគេ ឲ្យមានចារិកលក្ខណៈ ដូចមានចែងក្នុងបទគម្ពីរទំនុកដំកើងនេះ។—Sheridan Voysey
តើអ្នកស្វែងរកលក្ខណៈសម្បត្តិអ្វីខ្លះ ក្នុងអ្នកដឹកនាំ? តើអ្នកអាចអធិស្ឋានកាន់តែញឹកញាប់ដូចម្តេចខ្លះ ឲ្យអ្នកដឹកនាំក្នុងតំបន់ និងក្នុងប្រទេសរបស់អ្នក?
ឱព្រះវរបិតា សូមព្រះអង្គប្រទានកម្លាំងដល់អ្នកដឹកនាំរបស់យើងខ្ញុំ ឲ្យធ្វើជាមនុស្សប្រកាន់ខ្ជាប់នូវសេចក្តីយុត្តិធម៌ ភាពស្អាតស្អំ និងសេចក្តីល្អ។
Visit ODBU.org/topic/ot020-04-lecture to learn more about Psalm 72.
គម្រោងអានព្រះគម្ពីររយៈពេល១ឆ្នាំ : ពួកចៅហ្វាយ ១៦-១៨ និង លូកា ៧:១-៣០