ក្នុងព្រះហស្តព្រះអង្គ
ដោយLeslie Koh
April 4, 2024
ទំនុកដំកើង ៩១:១-២,១៤-១៦
អញនឹងនៅជាមួយនឹងវាក្នុងគ្រាទុក្ខលំបាក។ ទំនុកដំកើង ៩១:១៥
នៅពេលដែលក្មេងស្រីអាយុ៥ឆ្នាំ ឈ្មោះសារ៉ា(Sarah) ឮសម្លេងម៉ូទ័រខួងធ្មេញ នាងមានការភ័យខ្លាចយ៉ាងខ្លាំង។ នាងក៏បានស្ទុះលោតចេញពីកៅអីពេទ្យធ្មេញ ហើយបដិសេធន៍មិនព្រមឡើងអង្គុយនៅលើកៅអីនោះទៀត។ ពេទ្យធ្មេញក៏បានងក់ក្បាលដោយយល់អំពីស្ថានភាព ហើយក៏បានប្រាប់ប៉ារបស់នាងឲ្យអង្គុយនៅលើកៅអីនោះ។ លោកចេសិន(Jason) ជាឪពុកគិតស្មានថា ពេទ្យឲ្យគាត់ធ្វើដូចនេះ ដើម្បីបង្ហាញកូនស្រីគាត់ថា ការឲ្យពេទ្យព្យាបាលធ្មេញមានភាពងាយស្រួលប៉ុណ្ណា។ ប៉ុន្តែ បន្ទាប់មក ពេទ្យធ្មេញក៏បានងាកទៅក្មេងស្រីនោះ ហើយប្រាប់នាងឲ្យឡើងអង្គុយនៅលើភ្លៅរបស់ប៉ានាង។ ដោយសារនាងស្ថិតក្នុងរង្វង់ដៃនៃការធានារបស់ឪពុកនាង នាងក៏បានសម្រួលអារម្មណ៍បានទាំងស្រុង ហើយគ្រូពេទ្យអាចបន្តការព្យាបាលធ្មេញរបស់នាង។
នៅថ្ងៃនោះ លោកចេសិន បានរៀនសូត្រមេរៀនដ៏ប្រសើរ អំពីការកម្សាន្តចិត្តនៃព្រះវត្តមាននៃព្រះវរបិតារបស់គាត់ ដែលគង់នៅស្ថានសួគ៌។ គាត់ថា “ជួនកាល ព្រះទ្រង់មិនដកបញ្ហា ដែលយើងកំពុងឆ្លងកាត់ តែព្រះអង្គកំពុងបង្ហាញខ្ញុំថា ព្រះអង្គនឹងគង់នៅជាមួយខ្ញុំជានិច្ច”។
កណ្ឌគម្ពីរទំនុកដំកើង ជំពូក៩១ បានចែងអំពីព្រះវត្តមាននៃការកម្សាន្តចិត្ត និងព្រះចេស្តារបស់ព្រះអង្គ ដែលផ្តល់ឲ្យយើងនូវកម្លាំង ដើម្បីប្រឈមមុខដាក់ការលំបាក។ ពេលណាយើងដឹងថា យើងអាចសម្រាកក្នុងព្រះហស្តដ៏មានចេស្តា ដែលបានផ្តល់ឲ្យយើងនូវការធានា គឺដូចដែលព្រះអង្គបានសន្យាអ្នកដែលស្រឡាញ់ព្រះអង្គថា អស់អ្នកដែលស្រែករកព្រះអង្គ ព្រះអង្គនឹងឆ្លើយតប ហើយនឹងគង់នៅជាមួយពួកគេ ក្នុងគ្រាមានទុក្ខលំបាក(ខ.១៥)។
មានបញ្ហាប្រឈម និងទុក្ខលំបាកជាច្រើនក្នុងជីវិតយើង ដែលមិនងាយជៀសរួច ហើយយើងត្រូវឆ្លងកាត់ការឈឺចាប់ និងទុក្ខវេទនា។ ប៉ុន្តែ ព្រះពាហុនៃការធានារបស់ព្រះអង្គឱបយើង បានជាយើងអាចស៊ូទ្រាំនឹងវិបត្តិ និងកាលៈទេសៈរបស់យើង ហើយអនុញ្ញាតឲ្យព្រះអង្គពង្រឹងជំនឿយើង ខណៈពេលដែលយើងឆ្លងកាត់បញ្ហាទាំងនោះ។—Leslie Koh
តើអ្នកកំពុងឆ្លងកាត់ទុក្ខលំបាកអ្វីខ្លះ ពេលឥឡូវនេះ? តើអ្នកអាចរំឭកខ្លួនឯងថា ព្រះអង្គតែងតែគង់នៅក្បែរអ្នកដូចម្តេចខ្លះ?
ឱព្រះវរបិតាប្រកបដោយព្រះគុណ ទូលបង្គំសូមអរព្រះគុណព្រះអង្គ សម្រាប់ព្រះវត្តមានដែលបានធានាទូលបង្គំ ក្នុងទុក្ខលំបាករបស់ទូលបង្គំ។ សូមព្រះអង្គជួយទូលបង្គំឆ្លងកាត់បញ្ហាទាំងនោះ ដោយដឹងថា ព្រះអង្គតែងតែគង់នៅជាមួយទូលបង្គំជានិច្ច។
គម្រោងអានព្រះគម្ពីររយៈពេល១ឆ្នាំ : នាងរស់ ១-៤ និង លូកា ៨:១-២៥