យ៉ូហាន ១៦:២៥-៣៣
ខ្ញុំប្រាប់សេចក្តីទាំងនេះ ដើម្បីឲ្យអ្នករាល់គ្នា បានសេចក្តីសុខសាន្ត ដោយសារខ្ញុំ។ យ៉ូហាន ១៦:៣៣
កាលពីថ្ងៃទី៣០ ខែធ្នូ ឆ្នាំ១៨៦២ សង្គ្រាមស៊ីវិលនៅអាមេរិកបានរីករាលដាលកាន់តែខ្លាំង។ កងទ័ពរដ្ឋសហព័ន្ធ និងកងទ័ពរដ្ឋសហភាពបានបោះជំរុំនៅចម្ងាយ៧រយម៉ែត្រពីគ្នា នៅលើត្រើយម្ខាងម្នាក់ នៃទន្លេស្ទោន ក្នុងរដ្ឋថេនេស៊ី។ ខណៈពេលដែលពួកគេកំពុងកំដៅខ្លួន នៅជុំវិញភ្លើងជំរុំ កងទ័ពរដ្ឋសហព័ន្ធក៏បានចាប់កាន់វីយូឡុង និងហាម៉ូនីកាមកប្រគំភ្លេងបទ “យែងគី ឌូឌល”។ កងទ័ពរដ្ឋសហភាពក៏បានឆ្លើយតប ដោយប្រគុំបទ “ឌីស៊ី”។ អ្វីដែលគួរឲ្យកត់សំគាល់នោះ កងទ័ពទាំងពីរក៏បានប្រគំភ្លេងរួមគ្នា នូវបទ “ឱផ្ទះដ៏កក់ក្តៅ”។ ទោះជាយ៉ាងណាក៏ដោយ ភាពត្រូវរ៉ូវគ្នា ដោយសូរសម្លេងតន្រ្តីមិនមានរយៈពេលយូរទេ។ នៅពេលព្រឹកឡើង ពួកគេក៏បានដាក់វីយូឡុងចុះ ហើយចាប់កាន់កាំភ្លើងឡើងវិញ។ នៅថ្ងៃនោះ ការប្រយុទ្ធគ្នាបានបណ្តាលឲ្យទាហានជាង ២ម៉ឺននាក់ បាត់បង់ជីវិត។
ការប្រឹងប្រែងរបស់យើងជាមនុស្ស ក្នុងការបង្កើតសន្តិភាព ពិតជាមានភាពរួញខ្លីណាស់។ ការប្រយុទ្ធគ្នាបានបញ្ចប់នៅកន្លែងមួយ ហើយក៏បានផ្ទុះឡើង នៅកន្លែងផ្សេងទៀត។ ជំលោះក្នុងទំនាក់ទំនង អាចរកឃើញភាពសុខដុម តែប៉ុន្មានខែក្រោយមក ជំលោះក៏បានកើតឡើងជាថ្មី។ ព្រះគម្ពីរប៊ីបបានបង្រៀនយើងថា មានតែព្រះអម្ចាស់ទេ ដែលអាចប្រទានសន្តិភាពដ៏ស្ថិតស្ថេរបាន។ ព្រះយេស៊ូវមានបន្ទូលយ៉ាងច្បាស់ថា “ខ្ញុំប្រាប់សេចក្តីទាំងនេះ ដើម្បីឲ្យអ្នករាល់គ្នា បានសេចក្តីសុខសាន្ត ដោយសារខ្ញុំ”(១៦:៣៣)។ យើងមានសន្តិភាព ឬសេចក្តីសុខសាន្តក្នុងព្រះយេស៊ូវ។ ខណៈពេលដែលយើងចូលរួម ក្នុងបេសកកម្មសន្តិភាពរបស់ព្រះអង្គ មានតែការផ្សះផ្សា និងការបង្កើតជាថ្មីរបស់ព្រះអង្គទេ ដែលធ្វើឲ្យសន្តិភាពពិតប្រាកដកើតមានបាន។
ព្រះគ្រីស្ទបានប្រាប់យើងថា យើងមិនអាចជៀសវាងការប៉ះទង្គិចគ្នា នៅលើផែនដីនេះបានទេ។ ព្រះយេស៊ូវមានបន្ទូលថា “នៅលោកីយ៍នេះ នោះអ្នករាល់គ្នាមានសេចក្តីវេទនាមែន ប៉ុន្តែ ត្រូវសង្ឃឹមឡើង ដ្បិតខ្ញុំបានឈ្នះលោកីយ៍ហើយ”(ខ.៣៣)។ ការប្រឹងប្រែងរបស់យើងដោយពឹងអាងខ្លួនឯង ច្រើនតែនាំឲ្យមានការខកចិត្ត តែព្រះនៃសេចក្តីស្រឡាញ់របស់យើង (ខ.២៧) បង្កើតឲ្យមានសន្តិភាព ក្នុងលោកិយដែលមានការប្រេះបែក។—Winn Collier
តើអ្នកបានឃើញមនុស្សបង្កើតឲ្យមានសន្តិភាព នៅកន្លែងណាខ្លះ? តើការបង្កើតសន្តិភាពរបស់ព្រះអម្ចាស់ មានភាពខុសប្លែកពីសន្តិភាពរបស់មនុស្សដូចម្តេចខ្លះ?
ឱព្រះអម្ចាស់ សូមព្រះអង្គបង្ហាញទូលបង្គំ នូវផ្លូវឆ្ពោះទៅរកសន្តិភាព។
For further study, read Finding Peace in a Troubled World at DiscoverySeries.org/Q1126.
គម្រោងអានព្រះគម្ពីររយៈពេល១ឆ្នាំ : ២សាំយ៉ូអែល ១៦-១៨ និង លូកា ១៧:២០-៣៧
