យ៉ូហាន ៣:១០-១៧
ដ្បិតព្រះទ្រង់ស្រឡាញ់មនុស្សលោក ដល់ម៉្លេះបានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ។ យ៉ូហាន ៣:១៦
តួអង្គ “មនុស្សចម្លែក” ក្នុងរឿងហ្វ្រេងគិនស្តាញ(Frankenstein) ដែលអ្នកស្រីម៉ារី សេលី(Mary Shelley) បាននិពន្ធ ស្ថិតក្នុងចំណោមតួអង្គដែលគេបានស្គាល់ច្រើនជាងគេ ក្នុងរឿងនិទាន ដែលកើតចេញពីការស្រមើស្រមៃ ក្នុងវប្បធម៌បស្ចិមប្រទេស។ ក្នុងរឿងប្រលោមលោកដ៏ល្បីល្បាញនេះ លោកវីចទ័រ ហ្វ្រែងគិនស្តាញ(Victor Frankenstein) ជាអ្នកវិទ្យាសាស្ត្រ ដែលមានការស្រមើស្រមៃ បានបង្កើតមនុស្សចម្លែកនោះ ពីសាកសពរបស់មនុស្ស។ ប៉ុន្តែ អ្នកដែលចូលចិត្តអានរឿងប្រលោមលោកដ៏ល្បីល្បាញនេះ ក៏បានដឹងផងដែរថា ភាគច្រើនគេអាចធ្វើការសន្និដ្ឋានថា អ្នកស្រីសេលីពិតជាបានបង្ហាញធាតុពិតរបស់តួអង្គអ្នកវិទ្យាសាស្ត្ររូបនេះ ថាជាមនុស្សចម្លែកពិតប្រាកដ។ បន្ទាប់ ពីគាត់បានបង្កើតមនុស្សចម្លែកនោះ ឲ្យមានបញ្ញា គាត់បានបដិសេធន៍មិនព្រមស្តាប់ការណែនាំរបស់វា ក៏មិនព្រមរាប់រកវា ឬធ្វើឲ្យវាសង្ឃឹមថា វានឹងមានសុភមង្គលឡើយ។ អាកប្បកិរិយានេះហាក់ដូចជាកំពុងតែធ្វើឲ្យមនុស្សចម្លែកនោះ ធ្លាក់ចូលទៅក្នុងការបាក់ទឹកចិត្ត និងកំហឹង។ មនុស្សចម្លែកនោះក៏បានប្រឈមមុខដាក់លោកវិកទ័រ ដោយពោលទំនួញថា “ឱលោក ដែលជាអ្នកបង្កើតខ្ញុំអើយ តើលោកនឹងបំផ្លាញខ្ញុំវិញ យ៉ាងជោគជ័យ ដោយគ្មានក្តីអាណិតឬ”។
ព្រះគម្ពីរបានបង្ហាញឲ្យយើងដឹងថា ព្រះដែលជាអ្នកបង្កើតអ្វីៗគ្រប់យ៉ាង មានភាពខុសប្លែកយ៉ាងណាពីអ្នកវិទ្យាសាស្រ្តក្នុងរឿងប្រលោកលោកនេះ ដោយព្រះអង្គមានសេចក្តីស្រឡាញ់មិនចេះប្រែប្រួល និងមិនចេះនឿយណាយ ចំពោះស្នាព្រះហស្តរបស់ព្រះអង្គ។ ព្រះអង្គមិនមែនចេះតែបង្កើតអ្វីៗមក តែបានបង្កើតពិភពលោក ដោយសេចក្តីស្រឡាញ់ ឲ្យមានភាពស្រស់ស្អាត(លោកុប្បត្តិ ១:៣១)។ ហើយសូម្បីតែនៅពេលដែលមនុស្សជាតិបានងាកបែរពីព្រះអង្គ ហើយជ្រើសរើសយកសេចក្តីអាក្រក់ ការប្ដេជ្ញាព្រះទ័យ និងសេចក្តីស្រឡាញ់ដែលព្រះអង្គមានចំពោះពួកគេ នៅតែមិនប្រែប្រួល។
គឺដូចដែលព្រះយេស៊ូវបានពន្យល់លោកនីកូដេមថា ព្រះអម្ចាស់មានសេចក្តីស្រឡាញ់ចំពោះមនុស្សខ្លាំងណាស់ បានជាព្រះអង្គស្ម័គ្រព្រះទ័យលះបង់ព្រះរាជបុត្រាតែមួយ ដែលព្រះអង្គស្រឡាញ់បំផុត(យ៉ូហាន ៣:១៦) ដើម្បីសង្គ្រោះមនុស្សជាតិឲ្យរួចពីបាប។ ព្រះយេស៊ូវបានលះបង់ព្រះជន្ម ដោយទទួលទោសនៃអំពើបាបរបស់យើង “ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ”(ខ.១៥)។
យើងមានព្រះអាទិករមួយអង្គ ដែលយើងអាចទុកចិត្ត អស់ពីចិត្ត និងជីវិតរបស់យើង។—Monica La Rose
តើការប្ដេជ្ញាព្រះទ័យ ដែលព្រះអង្គមានចំពោះស្នាព្រះហស្តព្រះអង្គ បាននាំមកនូវការផ្លាស់ប្តូរយ៉ាងណា ក្នុងជីវិតអ្នក? តើអ្នកអាចឆ្លើយតបចំពោះសេចក្តីស្រឡាញ់របស់ព្រះអង្គ ដូចម្តេចខ្លះ?
ឱព្រះអង្គអើយ ទូលបង្គំសូមអរព្រះគុណព្រះអង្គ ដែលបានធ្វើជាព្រះអាទិករ ដែលទូលបង្គំអាចទុកចិត្ត។
គម្រោងអានព្រះគម្ពីររយៈពេល១ឆ្នាំ : ១ពង្សាវតាក្សត្រ ១២-១៣ និង លូកា ២២:១-២០
