២ពង្សាវតាក្សត្រ ២០:១-៦
អញបានឮពាក្យអធិស្ឋានរបស់ឯង ក៏បានឃើញទឹកភ្នែកឯងហើយ មើល អញនឹងប្រោសឲ្យឯងបានជា។ ២ពង្សាវតាក្សត្រ ២០:៥
នៅព្រះវិហារខ្ញុំ មានក្រុមការងារដែលទទួលសំណូមពរអធិស្ឋានផ្សេងៗ ពីសមាជិកពួកជំនុំ រៀងរាល់សប្តាហ៍ ដើម្បីឲ្យយើងអាចអធិស្ឋានឲ្យពួកគេម្នាក់ៗ ហើយសរសេរសំបុត្រផ្ញើទៅពួកគេផងដែរ។ ក្នុងចំណោមពួកគេ មានអ្នកខ្លះបានសំណូមពរឲ្យយើងអធិស្ឋានសូមព្រះអង្គប្រទានពរ សម្រាប់ការស្គែនក្បាលនៅមន្ទីរពេទ្យ ក្នុងពេលខាងមុខ។ អ្នកខ្លះសុំឲ្យយើងអធិស្ឋានឲ្យកូនពួកគេវិលត្រឡប់មកព្រះវិហារវិញ។ ហើយខ្លះទៀត សូមព្រះអង្គកម្សាន្តចិត្តលោកដេវ(Dave) ដែលបានបាត់បង់ភរិយា។ ហើយមានសំណូមពរជាច្រើនរាប់មិនអស់ទៀត ដែលធ្វើឲ្យយើងមានអារម្មណ៍ថា យើងមិនមានពេលវេលាគ្រប់គ្រាន់ ដើម្បីអធិស្ឋានឲ្យពួកគេឲ្យបានគ្រប់គ្នា ហើយក៏មានអារម្មណ៍ថា គេមិនឲ្យតម្លៃមកលើការប្រឹងប្រែងរបស់យើង។ បញ្ហានេះមានការផ្លាស់ប្តូរ បន្ទាប់ពីខ្ញុំបានទទួលកាតថ្លែងអំណរគុណអស់ពីចិត្ត ពីលោកដេវ ជាស្វាមីដែលប្រពន្ធទើបតែលាចាកលោក ដោយគាត់បានភ្ជាប់ជាមួយដំណឹងមរណៈភាពរបស់ភរិយាគាត់ផងដែរ។ ពេលនោះ ខ្ញុំមានការយល់ដឹងជាថ្មីថា ការអធិស្ឋានឲ្យអ្នកដទៃនៅតែមានមានភាពចាំបាច់។
ព្រះយេស៊ូវបានធ្វើជាគំរូនៃការអធិស្ឋានជាទៀងទាត់ អស់ពីចិត្ត និងដោយជំនឿពេញដោយក្តីសង្ឃឹម។ មុនពេលព្រះអង្គយាងឡើងស្ថានសួគ៌វិញ ព្រះអង្គបានដាក់អាទិភាពឲ្យការចេញទៅរកកន្លែងស្ងប់ស្ងាត់ដើម្បីអធិស្ឋាន(ម៉ាកុស ១:៣៥ ៦:៤៦ ១៤:៣២)។
រយៈពេលរាប់រយឆ្នាំ មុនពេលព្រះអង្គយាងមកប្រសូត ស្តេចអ៊ីស្រាអែល ព្រះនាមហេសេគា បានរៀនសូត្រអំពីមេរៀនដ៏សំខាន់នេះផងដែរ។ ទ្រង់ជ្រាបថា ទ្រង់នឹងសុគតដោយសារជំងឺ ក្នុងពេលដ៏ខ្លីខាងមុខ(២ពង្សាវតាក្សត្រ ២០:១)។ ទ្រង់ក៏បានព្រះកន្សែង ដោយព្រះទ័យសោកសៅយ៉ាងខ្លាំង តែទ្រង់ក៏បាន “បែរព្រះភក្ត្រទៅឯជញ្ជាំង អធិស្ឋានដល់ព្រះយេហូវ៉ា”(ខ.២)។ នៅពេលនោះ ព្រះអម្ចាស់ក៏បានឆ្លើយតបចំពោះទ្រង់ភ្លាមៗ។ ព្រះអង្គក៏បានប្រោសជំងឺរបស់ស្តេចហេសេគាឲ្យជា ដោយបន្ថែមអាយុឲ្យទ្រង់រស់នៅបាន១៥ឆ្នាំទៀត ហើយក៏បានសន្យាថា នឹងជួយសង្រ្គោះនគររបស់ទ្រង់ ឲ្យរួចផុតពីកងទ័ពខ្មាំងសត្រូវ(ខ.៥-៦)។ ព្រះអម្ចាស់បានឆ្លើយតបការអធិស្ឋានរបស់ស្តេចហេសេគា មិនមែនដោយសារទ្រង់បានរស់នៅ ក្នុងជីវិតដ៏ល្អនោះទេ តែដើម្បីថ្វាយព្រះកិត្តិនាមដល់អង្គទ្រង់ ហើយដោយយល់ដល់ស្តេចដាវីឌជាអ្នកបម្រើព្រះអង្គ(ខ.៦)។ យើងមិនតែងតែទទួលការឆ្លើយតប សម្រាប់ការអធិស្ឋានរបស់យើងនោះទេ តែយើងអាចទុកចិត្តថា ព្រះអម្ចាស់កំពុងធ្វើការ នៅក្នុង និងតាមរយៈការអធិស្ឋាននីមួយៗ។—Karen Pimpo
តើនរណាខ្លះត្រូវការឲ្យអ្នកអធិស្ឋានឲ្យ នៅថ្ងៃនេះ? តើអ្នកអាចរំឭកខ្លួនឯងដូចម្តេចខ្លះ ឲ្យឈប់បង្អង់សិន ដើម្បីអធិស្ឋានឲ្យបានញឹកញាប់?
ឱព្រះវរបិតា ដែលគង់នៅស្ថានសួគ៌ ទូលបង្គំសូមអរព្រះគុណព្រះអង្គ ដែលបានស្តាប់ទូលបង្គំអធិស្ឋាន។
គម្រោងអានព្រះគម្ពីររយៈពេល១ឆ្នាំ : ១ពង្សាវតាក្សត្រ ១៤-១៥ និង លូកា ២២:២១-៤៦
