បុគ្គលិកលក្ខណៈ និង​អំណោយ​ទាន​ដែល​ព្រះ​ប្រទាន


រ៉ូម ១២:៤-៨

ដូច្នេះ ដែល​មាន​អំណោយ​ទាន​ផ្សេង​ពី​គ្នា តាម​ព្រះគុណ​ដែល​ផ្តល់​មក​យើង ទោះ​បើជា​សេចក្តី​ទំនាយ នោះ​ក៏​ត្រូវ​ទាយ​តាម​ខ្នាត​នៃ​សេចក្តី​ជំនឿ​។ រ៉ូម ១២:៦

កាល​ប៉ុន្មាន​ទសវត្សរ៍​មុន ខ្ញុំ​បាន​ទៅ​ចូល​រួម​ដំណើរ​កម្សាន្ត​មួយ​របស់​និស្សិតមហាវិទ្យាល័យ ដែល​នៅពេល​នោះ ម្នាក់ៗ​សុទ្ធតែ​និយាយ​អំពី​ការ​ធ្វើ​តេស្ត​បុគ្គលិកលក្ខណៈ​របស់​អ្នក​ចូល​រួម​។ ក្នុង​ចំណោម​ពួកគេ មាន​អ្នក​ខ្លះ​ថា ពួកគេ​មាន​បុគ្គលិកលក្ខណៈ​បែប​នេះ ហើយ​ខ្លះ​ទៀត​ថា​បែប​នោះ​។ ខ្ញុំ​ក៏បាន​និយាយ​កំប្លែង​ជាមួយ​ពួកគេ អំពី​បុគ្គលិកលក្ខណៈ​របស់​ខ្ញុំ​។

ចាប់​តាំងពី​ពេល​នោះ​មក ខ្ញុំ​បាន​រៀន​សូត្រ​ច្រើន អំពី​ការ​ធ្វើ​តេស្ដ​នោះ និង​ការ​ធ្វើ​តេស្ដ​ដទៃ​ទៀត ដែល​មាន​ដូចជា​ការ​ធ្វើ​តេស្ដ​បុគ្គលិកលក្ខណៈ​ភាពជា​អ្នក​ដឹកនាំ​ជាដើម​។ ខ្ញុំ​យល់​ឃើញថា ការ​ធ្វើ​តេស្ដ​ទាំង​នោះ​មាន​លក្ខណៈ​គួរ​ឲ្យ​ចាប់​អារម្មណ៍​ណាស់ ព្រោះ​ពួកវា​អាច​ជួយ​យើង ឲ្យ​យល់​អំពី​ខ្លួនឯង និង​អ្នក​ដទៃ តាម​របៀប​ដែល​មាន​ប្រយោជន៍ និង​បើក​បង្ហាញ​ឲ្យ​យើង​ដឹង​អំពី​ចំណង់​ចំណូល​ចិត្ត ចំណុច​ខ្លាំង និង​ចំណុច​ខ្សោយ​របស់​យើង​។ ដរាបណា​យើង​មិន​ផ្ដោត​ទៅលើ​ពួកវា​ខ្លាំង​ពេក យើង​អាច​ប្រើ​ពួកវា​ជា​ឧបករណ៍​មាន​ប្រយោជន៍ ដែល​ព្រះអម្ចាស់​ប្រើ ដើម្បី​ជួយ​យើង​ឲ្យ​មាន​ការ​លូត​លាស់​។

ព្រះ​គម្ពីរប៊ីប​មិន​បាន​ផ្តល់​ឲ្យ​យើង​នូវ​ការ​ធ្វើ​តេស្ដ​បុគ្គលិកលក្ខណៈ​របស់​យើង ប៉ុន្តែ ព្រះ​គម្ពីរប៊ីប​ពិតជា​បាន​បញ្ជាក់ អំពី​លក្ខណៈ​ពិសេស​របស់​មនុស្ស​ម្នាក់​ៗ​ក្នុង​ព្រះនេត្រ​ព្រះ(មើល​ទំនុក​ដំកើង ១៣៩:១៤-១៦ យេរេមា ១:៥) ហើយ​បង្ហាញ​យើង អំពី​របៀប​ដែល​ព្រះ​ទ្រង់​ប្រទាន​យើង​ម្នាក់ៗ​នូវ​បុគ្គលិកលក្ខណៈ និង​អំណោយ​ទាន​ពិសេស​រៀង​ខ្លួន ដើម្បី​បម្រើ​អ្នក​ដទៃ ក្នុង​នគរ​ព្រះអង្គ​។ ហេតុ​នេះ​ហើយ ក្នុង​បទ​គម្ពីរ រ៉ូម ១២:៦ សាវ័ក​ប៉ុល​បាន​បង្រៀន​យើង​ថា យើង “មាន​អំណោយ​ទាន​ផ្សេង​ពី​គ្នា តាម​ព្រះគុណ​ដែល​ផ្តល់​មក​យើង”។

គាត់​ក៏​បាន​ពន្យល់​ថា អំណោយ​ទាន​ទាំង​នោះ មិនមែន​សម្រាប់​ឲ្យ​យើង​ប្រើ​ដើម្បី​តែ​ខ្លួន​យើង​នោះ​ទេ តែ​ដើម្បី​បម្រើ​រាស្រ្ត​របស់​ព្រះ ដែល​ជា​រូបកាយ​ព្រះគ្រីស្ទ(ខ.៥)។ អំណោយ​ទាន​ទាំង​នោះ បាន​បង្ហាញ​ព្រះគុណ និង​សេចក្តី​ល្អ​របស់​ព្រះអង្គ ដែល​ធ្វើ​ការ នៅ​ក្នុង និង​តាមរយៈ​យើង​រាល់​គ្នា ហើយក៏​បាន​អញ្ជើញ​យើង​ម្នាក់ៗ ឲ្យ​រស់នៅ​ជា​ឧបករណ៍​ដ៏​ពិសេស នៅ​ក្នុង​ការ​ធ្វើ​ការ​បម្រើ​ព្រះអង្គ​។—Adam R. Holz

តើមាន​អំណោយ​អ្វី ដែល​ព្រះ​ទ្រង់​បាន​ប្រទាន​អ្នក ដើម្បី​បម្រើ​អ្នក​ដទៃ?
បើ​អ្នក​មិន​ដឹង​ថា ខ្លួនឯង​មាន​អំណោយ​ទាន​អ្វី តើមាន​នរណា​ខ្លះ​អាច​ជួយ​អ្នក ឲ្យ​មាន​ការ​យល់​ដឹង​កាន់តែ​ច្បាស់ អំពី​អំណោយ​ទាន​ដែល​ព្រះអង្គ​បាន​ប្រទាន?

ឱ​ព្រះវរបិតា ទូល​បង្គំ​សូម​អរ​ព្រះគុណ​ព្រះអង្គ សម្រាប់​អំណោយ​ដែល​ព្រះអង្គ​បាន​ប្រទាន​ទូល​បង្គំ​។
សូម​ព្រះ​អង្គ​ជួយ​ទូល​បង្គំ ឲ្យ​ឱប​ក្រសោប​យក​របៀប​ដែល​ព្រះ​អង្គ​បាន​ជួយ​ទូល​បង្គំ​ឲ្យ​ស្រឡាញ់ និង​បម្រើ​អ្នក​ដទៃ ក្នុង​នគរ​ព្រះអង្គ​។
Visit ODBU.org/SF108 to find out how you can understand yourself and others better.

គម្រោងអានព្រះគម្ពីររយៈពេល១ឆ្នាំ : ២ពង្សាវតាក្សត្រ ១-៣ និង លូកា ២៤:១-៣៥

Share this post:
Facebook
Twitter
LinkedIn
WhatsApp

More articles