ហ៊ាន​ប្រឆាំង​នឹង​ទស្សនៈ​ដែល​ពេញ​និយម

២របាក្សត្រ ១៨:៩-១៦

ខ្ញុំ​ស្បថ​ដោយនូវ​ព្រះយេហូវ៉ា ដ៏​មាន​ព្រះ​ជន្ម​រស់​ថា សេចក្តី​ណា​ដែល​ព្រះ​នៃ​ខ្ញុំ​ទ្រង់​មាន​ព្រះ​បន្ទូល​មក នោះ​ខ្ញុំ​នឹង​បញ្ចេញ​តាម​សេចក្តី​នោះ​ឯង​។ ២របាក្សត្រ ១៨:១៣

បន្ទាប់​ពី​សន្និសីទ​សន្តិភាព​នៅ​ទីក្រុង​ប៉ារីស ​សង្គ្រាម​លោក​លើកទី១​ក៏បាន​បញ្ចប់ លោក​ហ្វឺឌីណង់ ហ្វូច(Ferdinand Foch) ជា​អគ្គ​មេបញ្ជាការ​​នៃ​កងទ័ព​ប្រទេស​បារាំង បាន​ធ្វើ​ការ​សង្កេត​មើល​ស្ថាន​ការណ៍​ពិភពលោក ហើយក៏​បាន​មាន​ប្រសាសន៍​ដោយ​ចិត្ត​ជូរ​ល្វីង​ថា “ពិភពលោក​មិន​ទាន់​មាន​សន្តិភាព​នៅឡើយ​ទេ​។ នេះ​គ្រាន់តែ​ជា​បទ​ឈប់​បាញ់​គ្នា ដែល​មាន​រយៈ​ពេល២០ឆ្នាំ”។ ទស្សនៈ​របស់​លោក​ហ្វូច បាន​ប្រាស​ចាក​ទស្សនៈ​ដ៏​ពេញ​និយម​របស់​មនុស្ស​នៅ​សម័យ​នោះ ដែល​បាន​យល់​ឃើញថា សង្រ្គាម​លោក​លើកទី១ ដ៏​គួរ​ឲ្យ​តក់ស្លុត​នេះ គឺជា “សង្រ្គាម​ដែល​បាន​បញ្ចប់​សង្រ្គាម​ទាំង​អស់”។ ២០ឆ្នាំ និង២ខែ​ក្រោយមក សង្រ្គាម​លោក​លើកទី២ ក៏បាន​ផ្ទុះ​ឡើង​។ លោក​ហ្វូច​ពិតជា​និយាយ​ត្រូវ​។

តាំងពី​យូរ​មក​ហើយ លោក​មីកាយ៉ា ជា​ហោរា​ពិតតែ​មួយ​របស់​ព្រះ ក្នុង​តំបន់​ដែល​គាត់​រស់នៅ ក្នុង​សម័យ​របស់​គាត់​ ​បាន​ថ្លែង​ទំនាយ​យ៉ាង​ត្រឹម​ត្រូវ​សម្រាប់​នគរ​អ៊ីស្រាអែល អំពី​លទ្ធផល​នៃ​សឹក​សង្រ្គាម(២របាក្សត្រ ១៨:៧)។ ផ្ទុយ​ទៅវិញ ហោរា​ក្លែង​ក្លាយ​ទាំង៤០០នាក់ របស់​ស្តេច​អ័ហាប់ បាន​ថ្លែង​ទំនាយ​ថា ស្តេច​នឹង​មាន​ជ័យ​ជម្នះ​ក្នុង​សង្រ្គាម​ទៅ​វិញ។ ហេតុ​នេះ​ហើយ មន្រ្តី​ម្នាក់​ដែល​នាំ​ហោរា​មីកាយ៉ា​ចូល​គាល់​ស្តេច ក៏បាន​ប្រាប់​គាត់​ថា “មើល ពួក​ហោរា​ទាំង​អស់​សុទ្ធ​តែ​ទាយ​ល្អ ដល់​ស្តេច​ព្រម​គ្នា ដូច្នេះ សូម​ឲ្យ​ពាក្យ​លោក​បាន​ដូចជា​ពាក្យ​របស់​ហោរា​ទាំង​នោះ ដោយ​ពោល​តែ​សេចក្តី​ល្អ​ដែរ”(ខ.១២)។

លោក​មីកា​យ៉ាក៏​បាន​ឆ្លើយ​តប​ថា “សេចក្តី​ណា​ដែល​ព្រះ​នៃ​ខ្ញុំ​ទ្រង់​មាន​ព្រះ​បន្ទូល​មក នោះ​ខ្ញុំ​នឹង​បញ្ចេញ​តាម​សេចក្តី​នោះ​ឯង”(ខ.១៣)។ គាត់​បាន​ថ្លែង​ទំនាយ​ថា ពួក​អ៊ីស្រាអែល​នឹង “ខ្ចាត់ខ្ចាយ​ទៅ នៅ​លើ​ភ្នំ ប្រៀប​ដូច​ជា​ហ្វូង​ចៀម ដែល​គ្មាន​អ្នក​គង្វាល”(ខ.១៦)។ លោក​មីកាយ៉ា​ពិតជា​និយាយ​ត្រូវ​។ ពួក​សាសន៍​ស៊ីរី​ក៏​បាន​សម្លាប់​ស្តេច​អ័ហាប់ ហើយ​កងទ័ព​ទ្រង់​ក៏​បាន​បាក់ទ័ព​រត់​ខ្ចាត់ខ្ចាយ(ខ.៣៣-៣៤ ១ពង្សាវតាក្សត្រ ២២:៣៥-៣៦)។

យើង​ដែល​ជា​អ្នក​ដើរ​តាម​ព្រះយេស៊ូវ ក៏​ត្រូវ​ចែក​ចាយ​ព្រះរាជសារ​របស់​ព្រះអង្គ តាម​គំរូ​លោក​មីកាយ៉ា​ផង​ដែរ ទោះ​អ្វី​ដែល​យើង​ត្រូវ​ចែក​ចាយ​នោះ ផ្ទុយ​នឹង​ទស្សនៈ​ដ៏​ពេញ​និយម​របស់​មនុស្ស​ភាគ​ច្រើន​ក៏ដោយ​។ ព្រះយេស៊ូវ​មាន​បន្ទូល​ថា “ខ្ញុំ​ជា​ផ្លូវ ជា​សេចក្តី​ពិត ហើយ​ជា​ជីវិត បើ​មិន​មក​តាម​ខ្ញុំ នោះ​គ្មាន​អ្នកណា​ទៅ​ឯ​ព្រះវរបិតា​បាន​ឡើយ”(យ៉ូហាន ១៤:៦)។ មនុស្ស​ជា​ច្រើន​មិន​ចូល​ចិត្ត​ព្រះបន្ទូល​ព្រះអង្គ ក្នុង​បទ​គម្ពីរ​នេះ​ទេ ព្រោះ​ពួកគេ​យល់​ឃើញថា ព្រះបន្ទូល​ព្រះអង្គ​ហាក់​ដូចជា​មាន​ភាព​ចង្អៀត​ចង្អល់​ពេក​។ ពួក​គេ​ថា ព្រះបន្ទូល​ព្រះអង្គ​មាន​ភាព​ត្រឹម​ត្រូវ​ផ្តាច់​មុខតែ​ម្នាក់ឯង​ពេក​។ ប៉ុន្តែ ព្រះគ្រីស្ទ​បាន​នាំមក​នូវ​ព្រះបន្ទូល​កម្សាន្ត​ចិត្ត ដល់​មនុស្ស​ទាំង​អស់​។ ព្រះ​អង្គ​ស្វាគមន៍​នរណា​ក៏​ដោយ​ដែល​ងាក​បែរ​មក​រក​ព្រះអង្គ​។—Tim Gustafson

ពេលណា​ព្រះវិញ្ញាណបរិសុទ្ធ​ដឹកនាំ​អ្នក ឲ្យ​និយាយ ឬ​ធ្វើ​អ្វីមួយ តើ​អ្នក​នឹង​និយាយ ឬ​ធ្វើ​ដោយ​សេចក្តី​ស្រឡាញ់​ដូច​ម្តេច​ខ្លះ?
តើ​អ្នក​ត្រូវ​កែ​តម្រង់​ការ​សន្និដ្ឋាន​របស់​អ្នក ដោយ​ព្រះបន្ទូល​ព្រះអង្គ​ដូច​ម្តេច​ខ្លះ?

ឱ​ព្រះវរបិតា សូម​ព្រះ​អង្គ​ប្រទាន​ទូល​បង្គំ​នូវ​ប្រាជ្ញា ដើម្បី​ឲ្យ​អាច​យល់​សេចក្តី​ពិត​របស់​ព្រះអង្គ​។

គម្រោងអានព្រះគម្ពីររយៈពេល១ឆ្នាំ: ២ពង្សាវតាក្សត្រ ១៧-១៨ និង យ៉ូហាន ៣:១៩-៣៦

Share this post:
Facebook
Twitter
LinkedIn
WhatsApp

More articles