ការ​កុហក និង​សេចក្តី​ពិត

យ៉ូហាន ៨:៣១-៣២,៣៦,៤២-២៧

[សាតាំង] ជា​អ្នក​កំភូត ហើយ​ជា​ឪពុក​នៃ​សេចក្តី​នោះ​ឯង​។ យ៉ូហាន ៨:៤៤

លោក​អាដូហ្វ អ៊ី​ត្លែរ(Adolf Hitler) ជឿ​ថា ការ​កុហក​ធំៗ​មាន​អំណាច​ជាង​ការ​កុហក​តូចៗ ហើយ​គួរ​ឲ្យ​សោក​ស្តាយ​ណាស់ គាត់​បាន​យក​ទ្រឹស្ដី​នេះ​មក​អនុវត្តន៍​យ៉ាង​ជោគជ័យ​។ ក្នុង​ដើម​ដំបូង​នៃ​អាជីព​នយោបាយ​របស់​គាត់ គាត់​បាន​អះអាង​ថា គាត់​មិន​មាន​មហិច្ឆតា​ទេ តែ​គាត់​ពេញ​ចិត្ត​ក្នុង​ការ​គាំទ្រ​អ្នក​ដទៃ​ឲ្យ​សម្រេច​គោលដៅ​របស់​ពួក​គេ។ ពេល​គាត់​ឡើង​កាន់​អំណាច​ដឹកនាំ​ប្រទេស​អាឡឺម៉ង់ គាត់​និយាយ​ថា គណៈ​បក្ស​របស់​គាត់​មិន​មាន​ចេតនា​ធ្វើ​ទុក្ខ​បុក​ម្នេញ​មក​លើ​នរណា​ម្នាក់​ទេ​។ ក្រោយមក គាត់​ក៏បាន​ប្រើ​ប្រាស់​ប្រព័ន្ធ​ផ្សព្វផ្សាយ ដើម្បី​បង្ហាញ​ឲ្យ​គេ​យល់​ឃើញថា គាត់​ជា​បិតា​ជាតិ និង​ជា​អ្នក​ដឹកនាំ​ប្រកបដោយ​ក្រម​សីលធម៌​។ ប៉ុន្តែ មនុស្ស​រាប់​សិប​លាន​នាក់​បាន​រង​គ្រោះ និង​បាត់បង់​ជីវិត​ដោយសារ​សង្គ្រាម​លោក​លើក​ទីពីរ និង​អំពើ​ប្រល័យ​ពូជ​សាសន៍​ដែល​គាត់​បាន​បង្ក​ឡើង​។

សាតាំង​បាន​ប្រើ​ការ​កុហក ដើម្បី​គ្រប់​គ្រង​ជីវិត​យើង​ផង​ដែរ​។ ឲ្យតែ​មាន​ឱកាស វា​តែងតែ​បង្ក​ការ​ភ័យ​ខ្លាច កំហឹង និង​ភាព​អស់​សង្ឃឹម ព្រោះ​វា​ជា អ្នក​កំភូត និង​ជា​ឪពុក​នៃ​សេចក្តី​កំភូត(យ៉ូហាន ៨:៤៤)។ សាតាំង​មិន​អាច​និយាយ​ការ​ពិត​បានទេ ព្រោះ​ព្រះយេស៊ូវ​មាន​បន្ទូល​ថា មិន​មាន​សេចក្តី​ពិត​នៅ​ក្នុង​ខ្លួន​វា​​។

មាន​ការ​កុហក​មួយ​ចំនួន ដែល​អារក្ស​ជា​ខ្មាំង​សត្រូវ​របស់​យើង​បាន​ប្រើ​។ ទីមួយ វា​នាំ​យើង​គិត​ថា ការ​អធិស្ឋាន​របស់​យើង​មិន​សំខាន់​ទេ​។ ទេ ការ​អធិស្ឋាន​សំខាន់​ណាស់​។ ព្រះ​គម្ពីរ​បាន​ចែងថា “សេចក្តី​ទូល​អង្វរ​ដ៏​អស់ពី​ចិត្ត​របស់​មនុស្ស​សុ​ចរិត នោះ​ពូកែ​ណាស់”(យ៉ាកុប ៥:១៦)។ ទីពីរ វា​កុហក​ទៀត​ថា ពេលណា​យើង​មាន​បញ្ហា យើង​គ្មាន​ច្រក​ចេញ​ឡើយ​។ វា​និយាយ​ខុស​ទៀត​ហើយ​។ គ្មាន​ការ​អ្វី​ដែល​ព្រះ​ទ្រង់​ធ្វើ​មិន​កើត​នោះ​ឡើយ(ម៉ាកុស ១០:២៧) ហើយ “ទ្រង់​ក៏​រៀប​ផ្លូវ​ឲ្យ​ចៀស​រួច ដើម្បី​ឲ្យ​អ្នក​រាល់​គ្នា​អាច​នឹង​ទ្រាំ​បាន”(១កូរិនថូស ១០:១៣)។ ទីបី វា​នាំ​ឲ្យ​យើង​គិតថា ព្រះអង្គ​មិន​ស្រឡាញ់​យើង​ទេ​។ ការ​គិត​ដូច​នេះ​ក៏​ខុស​ដែរ ព្រោះ គ្មាន​អ្វី​អាច “ពង្រាត់​យើង” ចេញពី​សេចក្តី​ស្រឡាញ់​របស់​ព្រះ ដែល​នៅ​ក្នុង​ព្រះយេស៊ូវគ្រីស្ទ​បាន​ឡើយ(រ៉ូម ៨:៣៨-៣៩)។

សេចក្តី​ពិត​របស់​ព្រះ មាន​អំណាច​ជាង​ការ​កុហក​របស់​សាតាំង​។ បើ​យើង​ស្តាប់​បង្គាប់​តាម​ការ​បង្រៀន​របស់​ព្រះយេស៊ូវ ដោយ​ពឹង​អាង​កម្លាំង​មកពី​ព្រះអង្គ ហើយ “យើង​បាន​ស្គាល់​សេចក្តី​ពិត” និង​បដិសេធន៍​សេចក្តី​កុហក នោះ​សេចក្តី​ពិត នឹង​រំដោះ​យើង​ឲ្យ​មាន​សេរី​ភាព(យ៉ូហាន ៨:៣១-៣២)។—Jennifer Benson Schuldt

តើមាន​ការ​កុហក​អ្វី​ខ្លះ ដែល​អ្នក​ទំនង​ជា​ជឿ? តើ​ព្រះ​ទ្រង់​សព្វ​ព្រះទ័យ​ឲ្យ​អ្នក​កែ​ប្រែ​គំនិត​ជា​ថ្មី ដោយ​សេចក្តី​ពិត​របស់​ព្រះអង្គ​ដូច​ម្តេច​ខ្លះ?

ឱ​ព្រះយេស៊ូវ ព្រះអង្គ​ជា​ផ្លូវ ជា​សេចក្តី​ពិត និង​ជា​ជីវិត​។ សូម​ព្រះ​អង្គ​បង្ហាញ​ទូល​បង្គំ​ឲ្យ​ឃើញ​ការ​កុហក ដែល​ទូល​បង្គំ​កំពុង​ជឿ​តាម ហើយ​សូម​ជួយ​ទូល​បង្គំ​ឲ្យ​តោង​ជាប់​សេចក្តី​ពិត ដែល​ទូល​បង្គំ​បាន​អាន​ក្នុង​ព្រះ​គម្ពីរប៊ីប​។

គម្រោងអានព្រះគម្ពីររយៈពេល១ឆ្នាំ: ២ពង្សាវតាក្សត្រ ២២-២៣ និង យ៉ូហាន ៤:៣១-៥៤

Share this post:
Facebook
Twitter
LinkedIn
WhatsApp

More articles