ទំនុកដំកើង ៨
ព្រះនាមទ្រង់ប្រសើរគ្រប់លើផែនដីយ៉ាងណាទៅ។ ទំនុកដំកើង ៨:១
កាលពីថ្ងៃទី១២ ខែកក្កដា ឆ្នាំ២០២២ អ្នកវិទ្យាសាស្ត្របានទន្ទឹងរង់ចាំ រូបភាពដំបូងបំផុតនៃទីអវកាស ស្ថិតនៅឆ្ងាយបំផុត ដែលកែវយឺតអវកាស ចេមស៍ វេប(James Web)ថតបាន។ កែវយឺតមើលផ្កាយដែលមានបច្ចេកវិទ្យាទំនើបបំផុតនេះ អាចអនុញ្ញាតឲ្យអ្នកវិទ្យាសាស្ត្រ ឆ្លុះមើលរូបភាពបានចម្ងាយកាន់តែឆ្ងាយ ចូលទៅក្នុងចក្រវាល ដែលមនុស្សជាតិមិនដែលបានមើលដល់កាលពីមុនមក។ បន្ទាប់ពីបានបាញ់បង្ហោះ ដោយជោគជ័យ ភ្លាមៗនោះ រូបភាពដ៏គួរឲ្យពេចពិលរមិលមើលក៏បានលេចឡើង នៅលើអេក្រង់កុំព្យូទ័រ ហើយគេក៏បានឃើញបណ្ដុំផ្កាយ ខារីណា នេប៊ូឡា ដែលមានទេសភាពពពកបែបអវកាសដ៏ស្រស់ស្អាត ដែលគេមិនបានឃើញស្អាតដូចនេះពីមុនមកទេ។ តារាវិទូនៅអង្គការណាសាម្នាក់ បានដកស្រស់សម្តីលោក ខាល សាហ្គិន(Carl Sagan) ជាអ្នកមិនជឿថាព្រះមានមែនដ៏ល្បីល្បាញ ដែលបាននិយាយថា “មានអ្វីមួយអស្ចារ្យ កំពុងរង់ចាំយើង នៅកន្លែងដ៏អស្ចារ្យនោះ”។
ជួនកាល មនុស្សអាចមើលទៅព្រះ ដោយមិនបានឃើញព្រះអង្គ។ ប៉ុន្តែ ស្តេចដាវីឌជាអ្នកនិពន្ធបទគម្ពីរទំនុកដំកើង បានសម្លឹងមើលមេឃ ហើយដឹងច្បាស់ថា ទ្រង់កំពុងទតឃើញអ្វី។ ហេតុនេះហើយ ទ្រង់មានបន្ទូលថា “ទ្រង់បានតម្កល់សិរីល្អទ្រង់ទុកនៅលើស្ថានសួគ៌”(ទំនុកដំកើង ៨:១)។ លោកសាហ្គិនមិនបាននិយាយខុសទេ នៅពេលដែលគាត់ថា “មានអ្វីមួយដ៏អស្ចារ្យកំពុងរង់ចាំយើង” ប៉ុន្តែ គាត់មិនបានទទួលស្គាល់អ្វីដែលស្តេចដាវីឌបានយល់ច្បាស់ និងពោលថា “កាលណាទូលបង្គំពិចារណាមើលផ្ទៃមេឃ ជាការដែលព្រះហស្តទ្រង់បានធ្វើ គឺទាំងខែ និងផ្កាយ ដែលទ្រង់បានប្រតិស្ឋានទុក នោះតើមនុស្សជាអ្វី ដែលទ្រង់នឹករឭកដល់គេ ហើយកូនមនុស្សផង ដែលទ្រង់ប្រោសដូច្នេះ”(ខ.៣-៤)។
ពេលណាយើងមើលឃើញរូបភាពទីអវកាសជ្រៅបំផុត យើងនឹងមានចិត្តស្ញប់ស្ញែង ភាគច្រើនមិនមែនដោយសារបច្ចេកវិទ្យាទំនើប ដែលជួយឲ្យយើងមើលឃើញរូបភាពទាំងនោះ តែដោយសារយើងកំពុងមើលឃើញស្នាព្រះហស្តដែលព្រះអង្គបានបង្កើត។ យើងស្ញប់ស្ញែង ព្រោះក្នុងវិសាលភាពនៃស្នាព្រះហស្តដ៏ច្រើនលើសលប់ ព្រះអង្គបានបង្កើតយើង “ឲ្យត្រួតលើអស់ទាំងការនៃព្រះហស្តទ្រង់”(ខ.៦)។ ជាការពិតណាស់ “អ្វីមួយដ៏អស្ចារ្យដែលកំពុងរង់ចាំយើងនោះ” គឺជាព្រះអម្ចាស់ ដែលកំពុងរង់ចាំលើកអ្នកជឿព្រះយេស៊ូវ ឲ្យទៅនៅជាមួយព្រះអង្គ នៅពេលដែលព្រះអង្គយាងមកវិញ។ ពេលនោះនឹងមានទិដ្ឋភាពដែលគួរឲ្យពេចពិលរមិលមើល លើសរូបភាពណាៗទាំងអស់ដែលយើងធ្លាប់ឃើញ។—Kenneth Petersen
តើអ្នកមានការយល់ឃើញដូចម្តេចខ្លះ នៅពេលដែលអ្នកមើលទៅរូបភាពនៃទីអវកាសដ៏សែនជ្រៅ?
តើអ្នកបានដកពិសោធន៍នឹងព្រះវត្តមានព្រះអង្គ ដូចម្តេចខ្លះ នៅក្នុងការមើលរូបភាពទាំងនោះ?
ឱព្រះអាទិករ ទូលបង្គំមានចិត្តស្ញប់ស្ញែង ចំពោះសិរីល្អនៃស្ថានសួគ៌ និងសម្រស់នៃស្នាព្រះហស្តព្រះអង្គ។
ទូលបង្គំសូមអរព្រះគុណព្រះអង្គ សម្រាប់ការថែរក្សាទូលបង្គំ នៅក្នុងចំណោមស្នាព្រះហស្តដ៏អស្ចារ្យរបស់ព្រះអង្គ។
គម្រោងអានព្រះគម្ពីររយៈពេល១ឆ្នាំ: ២ពង្សាវតាក្សត្រ ២៤-២៥ និង យ៉ូហាន ៥:១-២៤
