បន្តមានភាពរឹងមាំខាងវិញ្ញាណ
ដោយMike Wittmer
May 21, 2024
២របាក្សត្រ ១៦:១-៩
ដ្បិតព្រះនេត្រនៃព្រះយេហូវ៉ាចេះតែទតច្រវាត់ នៅគ្រប់លើផែនដីទាំងមូល ដើម្បីនឹងសំដែងព្រះចេស្តា ជួយដល់អស់អ្នកណាដែលមានចិត្តស្មោះត្រង់ចំពោះទ្រង់។ ២របាក្សត្រ ១៦:៩
ខ្សែភាពយន្ត រឿង ដឹ រ៉ក់គី(The Rocky) និយាយអំពីកីឡាករប្រដាល់សកលម្នាក់ ដែលទទួលការជំរុញចិត្ត ពីការប្ដេជ្ញាចិត្ត ស៊ូស្លាប់មិនព្រមបោះបង់ចោលការតស៊ូ ដែលបានជម្នះឧបសគ្គដ៏ពិបាកបំផុត ដើម្បីក្លាយជាជើងឯកទម្ងន់ធ្ងន់។ ក្នុងខ្សែភាពយន្ត ដឹ រ៉ក់គី វគ្គ៣ តួអង្គរ៉ក់គី មានការស្ញប់ស្ញែង ចំពោះភាពជោគជ័យរបស់ខ្លួនឯង។ ដោយសារភាពល្បីល្បាញរបស់គាត់ គាត់ក៏បានទៅថតស្ប៉តពាណិជ្ជកម្ម ដែលគេចាក់ផ្សាយតាមទូរទស្សន៍ធ្វើឲ្យគាត់មិនមានពេលគ្រប់គ្រាន់សម្រាប់ការហ្វឹកហាត់។ ជើងឯកកីឡាប្រដាល់រូបនេះក៏បានប្រែជាទន់ជ្រាយ ហើយគេក៏បានបបួលគាត់ប្រកួតគ្នាក្រៅសង្វៀន ហើយក៏ត្រូវគេវាយឲ្យសន្លប់។ បន្ទាប់មក គាត់ក៏បានព្យាយាមស្តាសមត្ថភាពប្រយុទ្ធរបស់គាត់ឲ្យខ្លាំងឡើងវិញ។
ក្នុងន័យខាងវិញ្ញាណ ស្តេចអេសានៃនគរយូដាក៏បានបាត់បង់សមត្ថភាពប្រយុទ្ធផងដែរ។ ក្នុងដើមដំបូងនៃការគ្រប់គ្រងរបស់ទ្រង់ ទ្រង់បានពឹងផ្អែកទៅលើព្រះអម្ចាស់ នៅក្នុងការប្រឈមមុខដាក់បញ្ហាធំៗ។ ខណៈពេលដែលកងទ័ពរបស់សត្រូវមានគ្នាច្រើនជាង លើកទ័ពចូលទឹកដីទ្រង់ ទ្រង់ក៏បានអធិស្ឋានថា “ព្រះយេហូវ៉ា ជាព្រះនៃយើងរាល់គ្នាអើយ សូមជួយយើងខ្ញុំផង ដ្បិតយើងខ្ញុំផ្អែកលើទ្រង់ជាទីពឹង គឺដោយនៅតែព្រះនាមទ្រង់ប៉ុណ្ណោះ ដែលយើងរាល់គ្នាបានមក ទាស់នឹងពួកមានគ្នាច្រើនទាំងនេះ”(២របាក្សត្រ ១៤:១១)។ ព្រះអម្ចាស់ក៏បានឆ្លើយតបការអធិស្ឋានរបស់ទ្រង់ ដោយប្រទានពរកងទ័ពរបស់សាសន៍យូដាក៏បានវាយបំបាក់កងទ័ពសត្រូវឲ្យរត់ខ្ចាត់ខ្ចាយ(ខ.១២-១៥)។
ជាច្រើនឆ្នាំក្រោយមក នគរយូដាក៏បានទទួលរងការគំរាមកំហែងសារជាថ្មី។ នៅពេលនេះ ស្តេចអេសា ដែលមានទំនុកចិត្តលើខ្លួនឯង បានព្រងើយកន្តើយចំពោះព្រះអម្ចាស់ ហើយក៏បានពឹងស្តេចរបស់នគរស៊ីរី(១៦:២-៣)។ ពេលនោះ ទ្រង់ហាក់ដូចជាមានជ័យជម្នះទៀត។ ប៉ុន្តែ ព្រះអម្ចាស់មិនបានសព្វព្រះទ័យទេ។ ហោរាហាណានី ក៏បានប្រាប់ស្តេចអេសាថា ទ្រង់បានឈប់ទុកចិត្តលើព្រះអម្ចាស់ហើយ(ខ.៧-៨)។ ហេតុអ្វីទ្រង់មិនបានពឹងផ្អែកលើព្រះអម្ចាស់ដូចកាលពីមុន?
ព្រះនៃយើងមានលក្ខណៈដែលយើងអាចទុកចិត្តបានទាំងស្រុង។ ព្រះនេត្រព្រះអង្គ “ចេះតែទតច្រវាត់ នៅគ្រប់លើផែនដីទាំងមូល ដើម្បីនឹងសំដែងព្រះចេស្តា ជួយដល់អស់អ្នកណាដែលមានចិត្តស្មោះត្រង់ចំពោះទ្រង់”(ខ.៩)។ ពេលណាយើងបន្តមានភាពរឹងមាំខាងវិញ្ញាណ ដោយពឹងផ្អែកលើព្រះអង្គទាំងស្រុង យើងនឹងបានដកពិសោធន៍ជាមួយព្រះចេស្តាព្រះអង្គ។—Mike Wittmer
ពេលដែលអ្នកមានវ័យកាន់តែចាស់ តើអ្នកកាត់តែងាយស្រួល ឬកាន់តែពិបាកទុកចិត្តព្រះវរបិតាដែលគង់នៅស្ថានសួគ៌?
ហេតុអ្វីអ្នកគិតថា កាន់តែពិបាក? តើព្រះអង្គបានពង្រឹងជំនឿអ្នកដូចម្តេចខ្លះ?
ឱព្រះយេស៊ូវ ទូលបង្គំសូមសម្រាកក្នុងព្រះអង្គជាបន្ថែមទៀត ជារៀងរាល់ថ្ងៃ។
គម្រោងអានព្រះគម្ពីររយៈពេល១ឆ្នាំ : ១របាក្សត្រ ១៦:១៨ និង យ៉ូហាន ៧:២៨-៥៣