យូដាស ១:១៧-២៣
ចូរមានចិត្តអាណិតដល់ពួកអ្នកខ្លះ ដែលមានសេចក្តីសង្ស័យផង។ យូដាស ១:២២
កាលខ្ញុំនៅរៀន ការអញ្ជើញទៅញាំអាហារពេលល្ងាច ពីអ្នកដឹកនាំពួកជំនុំរបស់ខ្ញុំគឺលោកគ្រូ ហារ៉ូល(Harold) និងអ្នកគ្រូផាម ជាភរិយា(Pam) បានធ្វើឲ្យខ្ញុំមានអារម្មណ៍កក់ក្តៅ តែក៏បានធ្វើឲ្យខ្ញុំមានអារម្មណ៍ភ័យអរផងដែរ។ ថ្មីៗនេះ ខ្ញុំបានចូលរួមការសិក្សាព្រះគម្ពីរជាមួយក្រុម ដែលមានការបង្រៀនប្រាសចាកគោលលទ្ធិក្នុងព្រះគម្ពីរប៊ីប។ ដូចនេះ ខ្ញុំបារម្ភថា តើពួកគាត់នឹងស្តីប្រដៅខ្ញុំ អំពីរឿងនោះឬទេ?
ពេលយើងញាំនំភីហ្សាជុំគ្នានៅពេលល្ងាចនោះ ពួកគាត់ក៏បានចែកចាយអំពីគ្រួសាររបស់ពួកគាត់ ហើយក៏បានសួរអំពីក្រុមគ្រួសាររបស់ខ្ញុំ។ ពួកគាត់ក៏បានស្តាប់ខ្ញុំចែកចាយ អំពីកិច្ចការដែលគ្រូដាក់ឲ្យធ្វើនៅផ្ទះ អំពីឆ្កែរបស់ខ្ញុំឈ្មោះប៊ូឈិ(Buchi) និងមនុស្សដែលខ្ញុំចូលចិត្ត។ ក្រោយមកពួកគេក៏បានដាស់តឿនខ្ញុំយ៉ាងប្រុងប្រយ័ត្ន អំពីក្រុមដែលខ្ញុំកំពុងចូលរួមការសិក្សាព្រះគម្ពីរជាមួយ ហើយក៏បានពន្យល់ថា ក្រុមនោះមានការបង្រៀន ដែលខុសឆ្គងនៅត្រង់ចំណុចណាខ្លះ។
ការដាស់តឿនរបស់ពួកគេបាននាំខ្ញុំចេញពីការកុហក ដែលក្រុមនោះបានបង្រៀនខ្ញុំ ហើយនាំខ្ញុំចូលទៅជិតសេចក្តីពិតក្នុងព្រះគម្ពីរប៊ីប។ កណ្ឌគម្ពីរយូដាសបានប្រើពាក្យសម្តីធ្ងន់ៗ ក្នុងការដាស់តឿន អំពីពួកគ្រូខុសឆ្គង ដោយជំរុញអ្នកជឿ ឲ្យ “ការពារសេចក្តីជំនឿ” (យូដាស ១:៣)។ ហើយក៏បានដាស់តឿនយើងថា នៅគ្រាចុងក្រោយ នឹងមានមនុស្សចំអក … ជាមនុស្សដែលនៅដោយវិស័យសាច់ឈាម ដែលគ្មានព្រះវិញ្ញាណទេ(ខ.១៨-១៩)។ ទោះជាយ៉ាងណាក៏ដោយ កណ្ឌគម្ពីរនេះក៏បានបង្រៀនអ្នកជឿ ឲ្យមានសេចក្តីអាណិតដល់ពួកអ្នកខ្លះ ដែលមានការសង្ស័យ ឬដើរតាមការបង្រៀនខុសឆ្គង (ខ.២២) ដោយទៅក្បែរពួកគេ និងបង្ហាញក្តីអាណិត ដោយមិនបន្ថែមបន្ថយសេចក្តីពិត។
កាលនោះ លោកគ្រូហារ៉ូល និងអ្នកគ្រូផាម ដឹងថា ខ្ញុំមិនបានចាក់ឫសមាំក្នុងជំនឿទេ តែគាត់មិនបានប្រកាន់ទោសខ្ញុំផ្ទុយទៅវិញ គាត់បានផ្តល់ឲ្យនូវការកែតម្រង់ និងប្រាជ្ញា ក្នុងនាមជាបងប្អូនក្នុងជំនឿ។ សូមព្រះអម្ចាស់ប្រទានពរយើង ឲ្យមានសេចក្តីស្រឡាញ់ និងការអត់ធ្មត់ដូចនេះផងដែរ ដោយប្រើប្រាជ្ញា និងសេចក្តីអាណិត ក្នុងការទំនាក់ទំនងជាមួយអ្នកដែលមានជំនឿខ្សោយ ឬដើរតាមការបង្រៀនខុសឆ្គង។—Karen Huang
តើអ្នកអាចឈោងទៅរកនរណាខ្លះ ដែលកំពុងមានជំនឿខ្សោយ ឬកំពុងដើរតាមការបង្រៀនខុសឆ្គង?
តើអ្នកអាចណែនាំពួកគេយ៉ាងដូចម្តេចខ្លះ ឲ្យងាកទៅរកសេចក្តីពិតនៃព្រះគម្ពីរ ដោយសេចក្តីស្រឡាញ់?
ឱព្រះវរបិតា ទូលបង្គំត្រូវការប្រាជ្ញា និងការដឹកនាំមកពីព្រះអង្គ ដើម្បីជួយអ្នកដែលកំពុងដើរតាមការបង្រៀនខុសឆ្គង។
សូមព្រះអង្គប្រទានពាក្យសម្តី ឲ្យទូលបង្គំណែនាំពួកគេ។
គម្រោងអានព្រះគម្ពីររយៈពេល១ឆ្នាំ : ២របាក្សត្រ ១៣-១៤ និង យ៉ូហាន ១២:១-២៦
