២ធីម៉ូថេ ៤:១-៨
តែឯអ្នក ចូរឲ្យមានគំនិតនឹងធឹង ក្នុងគ្រប់ការទាំងអស់វិញ ចូរទ្រាំទ្រនឹងសេចក្តីលំបាក ចូរឲ្យអ្នកធ្វើការជាគ្រូផ្សាយដំណឹងល្អចុះ។ ២ធីម៉ូថេ ៤:៥
កាលកប៉ាល់ទីតានិចបុកផ្ទាំងទឹកកក ក្នុងខែមេសា ឆ្នាំ១៩១២ លោកគ្រូគង្វាល ចន ហាភ័រ(John Harper) រកបានកន្លែងអង្គុយមួយ សម្រាប់កូនស្រីគាត់ មានអាយុ៦ឆ្នាំ នៅលើទូកសង្រ្គោះបន្ទាន់ ដែលមានចំនួនកំណត់។ គាត់ក៏បានប្រគល់អាវសុវត្ថិភាពរបស់គាត់ ទៅអ្នកដំណើរម្នាក់ ហើយក៏បានផ្សាយដំណឹងល្អ ដល់នរណាក៏ដោយ ដែលចង់ស្តាប់គាត់ចែកចាយ។ ខណៈពេលដែលកប៉ាល់ទីតានិចកំពុងលិច មនុស្សរាប់រយនាក់កំពុងរង់ចាំ ការជួយសង្រ្គោះ ដែលមិនទំនងជាអាចកើតមាន លោកហាភ័រក៏បានហែលទឹកទៅរកមនុស្សម្នាក់ហើយម្នាក់ទៀត ដែលកំពុងអណ្តែតនៅលើទឹក ហើយប្រាប់ពួកគេថា “ចូរជឿដល់ព្រះអម្ចាស់យេស៊ូវគ្រីស្ទទៅ នោះនឹងបានសង្គ្រោះហើយ”(កិច្ចការ ១៦:៣១)។
ក្នុងអំឡុងពេលនៃការជួបជុំនៅទីក្រុងអនតារីយ៉ូ សម្រាប់អ្នកដែលបានរួចជីវិត ក្នុងហេតុការណ៍លិចកប៉ាល់ទីតានិច បុរសម្នាក់បានប្រាប់គេថា គាត់គឺជា “មនុស្សចុងក្រោយ ដែលលោកគ្រូគង្វាល ចន ហាភ័របាននាំឲ្យជឿព្រះ”។ ពីដំបូងគាត់បានបដិសេធន៍ នៅពេលដែលលោកគ្រូហាភ័រប្រាប់គាត់ឲ្យទទួលជឿព្រះយេស៊ូវ តែបន្ទាប់មក គាត់ក៏បានទទួលជឿព្រះអង្គ នៅពេលដែលគ្រូអធិប្បាយរូបនេះបានប្រាប់គាត់ម្តងទៀត ឲ្យទទួលជឿព្រះអង្គ។ គាត់បានឃើញលោកគ្រូហាភ័រលះបង់ពេលវេលាចុងក្រោយនៃជីវិតរបស់ខ្លួន ដើម្បីចែកចាយដំណឹងល្អរបស់ព្រះយេស៊ូវ មុនពេលដែលគ្រូគង្វាលរូបនេះបាត់បង់ជីវិត ដោយសារទឹកសមុទ្រត្រជាក់ពេក ហើយក៏បានលិចចុះទៅក្នុងទឹក។
ក្នុងសំបុត្រដែលសាវ័កប៉ុលបានសរសេរផ្ញើលោកធីម៉ូថេ គាត់បានលើកទឹកចិត្តលោកធីម៉ូថេ ឲ្យមានការផ្សាយដំណឹងល្អ ដោយការបន្ទាន់ និងការប្តេជ្ញាចិត្ត និងការលះបង់ស្រដៀងនេះផងដែរ។ គាត់បានបញ្ជាក់ដល់លោកធីម៉ូថេ អំពីព្រះវត្តមានរបស់ព្រះយេស៊ូវ ដែលតែងតែគង់នៅជាមួយ និងបញ្ជាក់អំពីការយាងមកវិញរបស់ព្រះអង្គ ហើយទន្ទឹមនឹងនោះ គាត់ក៏បានបង្គាប់លោកធីម៉ូថេ ឲ្យផ្សាយដំណឹងល្អ ដោយចិត្តអត់ធ្មត់ និងភាពច្បាស់លាស់(២ធីម៉ូថេ ៤:១-២)។ លោកសាវ័កក៏បានរំឭកគ្រូអធិប្បាយវ័យក្មេងនេះ ឲ្យនៅតែផ្ដោតចិត្តទៅលើការផ្សាយដំណឹងល្អ ទោះអ្នកខ្លះនឹងបដិសេធន៍ព្រះយេស៊ូវក៏ដោយ(ខ.៣-៥)។
ពេលវេលាដែលយើងនៅសល់ នៅលើផែនដីនេះ មានចំនួនកំណត់ ដូចនេះ ចូរយើងប្រើពេលនីមួយៗឲ្យមានប្រយោជន៍។ យើងអាចទុកចិត្តថា ព្រះវរបិតានៃយើងបានរៀបចំកន្លែងឲ្យយើងនៅនគរស្ថានសួគ៌ ខណៈពេលដែលយើងប្រកាសថា “ព្រះយេស៊ូវជាព្រះអង្គសង្គ្រោះ!”—Xochitl Dixon
តើការដឹងថា ចំនួនថ្ងៃរបស់យើងមានកំណត់ បានបង្កើនភាពបន្ទាន់របស់អ្នក ក្នុងការផ្សាយដំណឹងល្អអំពីសេចក្តីស្រឡាញ់របស់ព្រះយេស៊ូវ ដូចម្តេចខ្លះ? តើអ្នកនឹងឈោងទៅរកអ្នកដទៃ នៅថ្ងៃនេះ ដោយរបៀបណា?
ឱព្រះយេស៊ូវ សូមព្រះអង្គប្រទានទូលបង្គំនូវឱកាសចែកចាយ អំពីសេចក្តីស្រឡាញ់របស់ព្រះអង្គ ដល់អ្នកដទៃ។
គម្រោងអានព្រះគម្ពីររយៈពេល១ឆ្នាំ : ២របាក្សត្រ ៣៤-៣៦ និង យ៉ូហាន ១៩:១-២២
