ទំនុកដំកើង ១៣៩:១៣-១៨
ទូលបង្គំនឹងអរព្រះគុណដល់ទ្រង់ ដ្បិតទ្រង់បានបង្កើតទូលបង្គំមកយ៉ាងគួរកោត គួរអស្ចារ្យ ឯស្នាដៃនៃទ្រង់ ក៏សុទ្ធតែអស្ចារ្យទាំងអស់ ព្រលឹងទូលបង្គំក៏ដឹងច្បាស់ហើយ។ ទំនុកដំកើង ១៣៩:១៤
វិទ្យាសាស្ត្រផ្នែកប្រព័ន្ធប្រសាទមានការរីកចម្រើនយ៉ាងខ្លាំង ក្នុងការយល់ដឹងអំពីរបៀបដែលខួរក្បាលមានដំណើរការ ប៉ុន្តែ ទោះជាយ៉ាងណាក៏ដោយ អ្នកវិទ្យាសាស្ត្របានទទួលស្គាល់ថា ពួកគេស្ថិតនៅក្នុងដំណាក់កាលដំបូងនៃការយល់ដឹងអំពីខួរក្បាលមនុស្ស។ ពួកគេមានយល់ដឹងអំពីរចនាសម្ព័ន្ធរបស់ខួរក្បាល ផ្នែកខ្លះនៃមុខងាររបស់វា និងផ្នែកនៃខួរក្បាល ដែលឆ្លើយតបចំពោះបរិស្ថានជុំវិញ ភ្ញោចញាណរបស់យើងឲ្យមានការឆ្លើយតប បង្កើតឲ្យមានចលនា និងផ្ទុកទៅដោយអារម្មណ៍។ ប៉ុន្តែ ពួកគេនៅតែមិនអាចយល់ អំពីរបៀបដែលទំនាក់ទំនងទាំងអស់នេះ រួមចំណែកនៅក្នុងការបង្កើតឲ្យមានអាកប្បកិរិយា ការយល់ដឹង និងការចងចាំឡើយ។ មនុស្សជាតិ គឺជាស្នាព្រះហស្តដែលមានភាពស្មុគស្មាញយ៉ាងខ្លាំង ដែលនៅតែមានអាថ៌កំបាំងជាច្រើនដែលយើងមិនដឹង។
ស្តេចដាវីឌបានទទួលស្គាល់ ភាពអស្ចារ្យនៃរូបកាយរបស់មនុស្ស។ ទ្រង់បានប្រើពាក្យប្រៀបប្រដូច ក្នុងការសរសើរដំកើងព្រះចេស្តារបស់ព្រះអម្ចាស់ ដែលបានបង្ហាញចេញមក តាមរយៈការគ្រប់គ្រងរបស់ព្រះអង្គ មកលើដំណើរការនៃធម្មជាតិទាំងមូល គឺដូចដែលព្រះអង្គ “ផ្សំគ្រឿងនៃស្តេចដាវីឌនៅក្នុងផ្ទៃម្តាយ”(ទំនុកដំកើង ១៣៩:១៣)។ ទ្រង់បានរៀបរាប់ទៀតថា “ដ្បិតទ្រង់បានបង្កើតទូលបង្គំមកយ៉ាងគួរកោត គួរអស្ចារ្យ ឯស្នាដៃនៃទ្រង់ ក៏សុទ្ធតែអស្ចារ្យទាំងអស់”(ខ.១៤)។ មនុស្សនៅសម័យបុរាណបានយល់ឃើញថា ការលូតលាស់របស់ទារកក្នុងផ្ទៃម្តាយ គឺជាអាថ៌កំបាំងដ៏អស្ចារ្យ(មើលសាស្តា ១១:៥)។ ទោះស្តេចដាវីឌមានការយល់ដឹងមានកំណត់ អំពីភាពស្មុគស្មាញដ៏អស្ចារ្យរបស់រូបកាយមនុស្សក៏ដោយ ក៏ទ្រង់នៅតែឈរស្ញប់ស្ញែង ចំពោះស្នាព្រះហស្ត និងព្រះវត្តមានដ៏អស្ចារ្យរបស់ព្រះអម្ចាស់(ទំនុកដំកើង ១៣៩:១៧-១៨)។
ភាពអស្ចារ្យ និងគួរស្ញប់ស្ញែងនៃភាពស្មុគស្មាញរបស់រូបកាយមនុស្ស បានឆ្លុះបញ្ចាំងអំពីព្រះចេស្តា និងអំណាចគ្រប់គ្រងរបស់ព្រះដ៏អស្ចារ្យនៃយើង។ បានជាយើងអាចឆ្លើយតប ដោយការសរសើរដំកើង ការកោតខ្លាច និងការស្ញប់ស្ញែង!—Marvin Williams
តើការយល់ដឹងអំពីការរចនាដ៏ស្មុគស្មាញរបស់រូបកាយអ្នក បាននាំឲ្យអ្នកសរសើរដំកើងព្រះដូចម្តេចខ្លះ? តើអ្នកអាចអរព្រះគុណព្រះ តាមរបៀបដ៏ប៉ិនប្រសប់ដូចម្តេចខ្លះ?
ឱព្រះអម្ចាស់ ទូលបង្គំសូមសរសើរដំកើងព្រះអង្គ សម្រាប់ការបង្កើតទូលបង្គំមក យ៉ាងគួរកោត គួរអស្ចារ្យ។ ព្រះអង្គជាព្រះអាទិករដ៏អស្ចារ្យ!
Learn more here: DiscoverODB.org/articles/what-is-worship-living-in-response-to-god.
គម្រោងអានព្រះគម្ពីររយៈពេល១ឆ្នាំ : អ៉ែសរ៉ា ៣-៥ និង យ៉ូហាន ២០
