ម៉ាថាយ ២៤:៣៦-៤៤
ដូច្នេះ ឲ្យអ្នករាល់គ្នាប្រុងប្រៀបខ្លួនជាស្រេចដែរ ដ្បិតកូនមនុស្សនឹងមកនៅវេលាដែលអ្នករាល់គ្នាមិនគិត។ ម៉ាថាយ ២៤:៤៤
មានពេលមួយ មិត្តភក្តិខ្ញុំម្នាក់ ឈ្មោះ ប៉ុល(Paul) កំពុងរង់ចាំជាងមកជួសជុលទូរទឹកកករបស់គាត់។ គាត់ក៏បានបើកទូរស័ព្ទរបស់គាត់ ឃើញសារដែលក្រុមហ៊ុនលក់គ្រឿងអេឡិចត្រូនិកបានផ្ញើមក។ ក្នុងសារនោះ គាត់ឃើញគេសរសេរថា “យេស៊ូវ កំពុងធ្វើដំណើរមកហើយ រំពឹងថា នឹងមកដល់នៅម៉ោងប្រហែល ១១:៣៥នាទីព្រឹក”។ មិនយូរប៉ុន្មាន លោកប៉ុលក៏បានដឹងថា តាមពិត ជាងជួសជុលនោះមានឈ្មោះយេស៊ូវ។
ប៉ុន្តែ តើយើងអាចរំពឹងថា ព្រះយេស៊ូវ ជាព្រះរាជបុត្រានៃ នឹងយាងមកដល់នៅពេលណា? កាលព្រះអង្គបានយាងមកយកកំណើតជាមនុស្ស កាលពីជាង២ពាន់ឆ្នាំមុន ហើយបានទទួលទោសនៃបាបរបស់យើង ព្រះអង្គមានបន្ទូលថា ព្រះអង្គនឹងយាងមកវិញ តែមានតែព្រះវរបិតាទេ ដែលបានជ្រាបថា ព្រះអង្គនឹងយាងមក “នៅថ្ងៃ និងម៉ោងណា”(ម៉ាថាយ ២៤:៣៦)។ តើយើងនឹងមានការផ្លាស់ប្តូរអាទិភាពរបស់យើង ក្នុងការរស់នៅប្រចាំថ្ងៃ ដូចម្តេចខ្លះ បើសិនជាយើងពិតជាបានដឹង អំពីពេលដែលព្រះអង្គសង្រ្គោះរបស់យើងនឹងយាងមកវិញ?(យ៉ូហាន ១៤:១-៣)។
ដើម្បីដាស់តឿនយើងឲ្យមានការប្រុងប្រយ័ត្ន ក្នុងការត្រៀមខ្លួនសម្រាប់ការយាងមកវិញរបស់ព្រះយេស៊ូវ ព្រះអង្គបានមានបន្ទូលថា “ដូច្នេះ ឲ្យអ្នករាល់គ្នាប្រុងប្រៀបខ្លួនជាស្រេចដែរ ដ្បិតកូនមនុស្សនឹងមកនៅវេលាដែលអ្នករាល់គ្នាមិនគិត”(ម៉ាថាយ ២៤:៤៤)។ ព្រះអង្គបានក្រើនរំឭកយើង ឲ្យ “ចាំយាម ដ្បិតអ្នករាល់គ្នាមិនដឹងជាពេលណា ដែលព្រះអម្ចាស់នៃអ្នករាល់គ្នានឹងយាងមកទេ”(ខ.៤២)។
នៅថ្ងៃដែលព្រះគ្រីស្ទយាងមកវិញ យើងនឹងមិនទទួលសារក្នុងស័ព្ទ ដែលនឹងដាស់តឿនយើងឲ្យប្រុងប្រៀបខ្លួនទេ។ ហេតុនេះហើយ តាមរយៈព្រះចេស្តានៃព្រះវិញ្ញាណ ធ្វើការតាមរយៈយើង ចូរយើងរស់នៅរៀងរាល់ថ្ងៃ ដោយសម្លឹងឆ្ពោះទៅរកភាពអស់កល្បជានិច្ច ដោយបម្រើព្រះអង្គ និងឆក់ឱកាសនីមួយៗ ដើម្បីចែកចាយព្រះបន្ទូលនៃសេចក្តីស្រឡាញ់ និងក្តីសង្ឃឹមដល់អ្នកដទៃ។—Cindy Hess Kasper
តើការរង់ចាំការយាងមកវិញរបស់ព្រះយេស៊ូវ បានលើកទឹកចិត្តអ្នកឲ្យមានការផ្លាស់ប្តូរដូចម្តេចខ្លះ? តើអ្នករំពឹងថា នឹងទទួលបានអ្វី នៅពេលដែលព្រះអង្គយាងមកវិញ?
ឱព្រះវរបិតា ខណៈពេលដែលទូលបង្គំកំពុងរង់ចាំព្រះយេស៊ូវយាងមកវិញ ដោយចិត្តអត់ធ្មត់ សូមព្រះអង្គជួយទូលបង្គំឲ្យស្តាប់បង្គាប់ព្រះអង្គ ដេញតាមសេចក្តីបរិសុទ្ធ និងរស់នៅ ក្នុងការរំពឹងថា ព្រះគ្រីស្ទនឹងយាងមកវិញក្នុងពេលឆាប់ៗ។
គម្រោងអានព្រះគម្ពីររយៈពេល១ឆ្នាំ : អែសរ៉ា ៦-៨ និង យ៉ូហាន ២១
