ម៉ាកុស ៥:២១-៣៤
កូនស្រីអើយ សេចក្តីជំនឿនាង បានជួយសង្គ្រោះនាងហើយ។ ម៉ាកុស ៥:៣៤
ក្នុងអំឡុងពេលនៃការសិក្សាព្រះគម្ពីរ ក្នុងពេលព្រឹកថ្ងៃសៅរ៍ សមាជិករបស់យើងម្នាក់មានការភ័ន្តភាំង ព្រោះកូនស្រីជាទីស្រឡាញ់របស់គាត់ដែលបានដើរផ្លូវខុស បានវិលត្រឡប់មកទីក្រុងវិញហើយ ប៉ុន្តែ គាត់មានអារម្មណ៍ថាពិបាក ក្នុងការរស់នៅជាមួយនាង នៅក្រោមដំបូលផ្ទះតែមួយ ដោយសារអាកប្បកិរិយារបស់នាង។ អ្នកចូលរួមការសិក្សាព្រះគម្ពីរម្នាក់ទៀត មិនមានសុខភាពល្អក្នុងរូបកាយរបស់ខ្លួន ដោយសារផលប៉ះពាលរបស់ជម្ងឺរ៉ាំរ៉ៃ និងការមានវ័យកាន់តែចាស់។ ការទៅជួបគ្រូពេទ្យជាច្រើនលើក បានផ្តល់ឲ្យនូវភាពធូរស្រាលតែបន្តិចបន្តួច។ គាត់មានការបាក់ទឹកចិត្ត។ តែដោយសារការរៀបចំរបស់ព្រះ បទគម្ពីរម៉ាកុស ជំពូក៥ ជាបទគម្ពីរដែលពួកគេលើកយកមកសិក្សាជាមួយគ្នា នៅថ្ងៃនោះ។ ហើយនៅពេលដែលការសិក្សាបានបញ្ចប់ គាត់កើតមានក្តីសង្ឃឹម និងក្តីអំណរយ៉ាងខ្លាំង។
ក្នុងបទគម្ពីរម៉ាកុស ៥:២៣ លោកយ៉ៃរ៉ូស ជាឪពុកដែលមានកូនស្រីកំពុងឈឺធ្ងន់ បានទូលអង្វរព្រះយេស៊ូវថា “កូនស្រីទូលបង្គំជិតស្លាប់ហើយ សូមទ្រង់យាងទៅដាក់ព្រះហស្តលើវា ឲ្យបានជា នោះវានឹងរស់វិញ”។ នៅតាមផ្លូវទៅកាន់ផ្ទះរបស់ក្មេងស្រីនោះ ព្រះយេស៊ូវបានប្រោសស្រ្តីម្នាក់ ឲ្យជាសះស្បើយពីជំងឺដ៏រ៉ាំរ៉ៃ ដោយមានបន្ទូលថា “កូនស្រីអើយ សេចក្តីជំនឿនាង បានជួយសង្គ្រោះនាងហើយ”(ខ.៣៤)។ លោកយ៉ៃរ៉ូស និងស្រ្តីនោះ បានទទួលការជំរុញចិត្តពីសេចក្តីជំនឿ ដែលពួកគេមានចំពោះព្រះអង្គ បានជាពួកគេទៅរកព្រះអង្គ ហើយពួកគេមិនបានខកចិត្តឡើយ។ ប៉ុន្តែ ក្នុងករណីទាំងពីរនេះ មុនពេលពួកគេជួបព្រះយេស៊ូវ ស្ថានភាពរបស់ពួកគេកាន់តែមានការលំបាក តែក្រោយមក អ្វីៗក៏បានល្អប្រសើរឡើង។
ទុក្ខលំបាកក្នុងជីវិតកើតមានចំពោះមនុស្សគ្រប់រូប ដោយមិនរើសមុខ។ ទោះយើងមានភេទ អាយុ ជាតិសាសន៍ ឬឋានៈអ្វីក៏ដោយ យើងរាល់គ្នាសុទ្ធតែជួបស្ថានភាព ដែលធ្វើឲ្យយើងភ័ន្តភាំង ហើយបណ្តាលឲ្យយើងស្វែងរកដំណោះស្រាយ។ ចូរយើងកុំបណ្តោយឲ្យបញ្ហាប្រឈម រារាំងយើងមិនឲ្យងាកទៅរកព្រះយេស៊ូវឡើយ តែផ្ទុយទៅវិញ ចូរយើងប្រើវាជាឱកាស ដើម្បីប្រើសេចក្តីជំនឿកាន់តែជ្រាលជ្រៅ ចំពោះព្រះដែលជ្រាបអំពីអារម្មណ៍របស់យើង ពេលយើងឈោងទៅរកព្រះអង្គ(ខ.៣០) ហើយអាចធ្វើឲ្យអ្វីៗមានភាពល្អប្រសើរឡើង ក្នុងជីវិតយើង។—Arthur Jackson
តើមានស្ថានភាពអ្វីខ្លះ ដែលកំពុងជំរុញអ្នក ឲ្យស្វែងរកព្រះយេស៊ូវ? តើអ្នកចង់អធិស្ឋានអស់ពីចិត្តដូចម្តេចខ្លះ នៅថ្ងៃនេះ?
ឱព្រះយេស៊ូវ ព្រះអង្គជ្រាបអំពីស្ថានភាពដ៏ឈឺចាប់ ក្នុងជីវិតទូលបង្គំ។
សូមព្រះអង្គធ្វើឲ្យទូលបង្គំមានភាពរឹងមាំក្នុងជំនឿ ទោះអ្វីៗប្រែក្លាយពីអាក្រក់ ទៅជាអាក្រក់កាន់តែខ្លាំងយ៉ាងណាក៏ដោយ។
Visit ODBU.org/CC205 to uncover how we can work through life’s pain.
គម្រោងអានព្រះគម្ពីររយៈពេល១ឆ្នាំ : អែសរ៉ា ៩-១០ និង កិច្ចការ ១
