ចិត្តដែលចូលចិត្តបម្រើអ្នកដទៃ
ដោយBill Crowder
June 14, 2024
កាឡាទី ៥:១៣-១៨
កុំឲ្យប្រើសេរីនោះ ទុកជាឱកាសដល់សាច់ឈាមឡើយ គឺត្រូវបំរើគ្នាទៅវិញទៅមក ដោយសេចក្តីស្រឡាញ់វិញកាឡាទី។ ៥:១៣
កាល “ពូ” របស់ខ្ញុំ ឈ្មោះ អេម៉ូរី(Emory) លាចាកលោក មនុស្សជាច្រើនបានបង្ហាញចេញនូវការគោរពដល់គាត់។ ប៉ុន្តែ ការផ្តល់កិត្តិយសទាំងនោះ បានបង្កប់នូវខ្លឹមសាររួមដ៏ជាប់លាប់មួយគឺ លោកពូ អេម៉ូរីបានបង្ហាញសេចក្តីស្រឡាញ់របស់គាត់ ដល់ព្រះ តាមរយៈការបម្រើអ្នកដទៃ។ គំរូល្អបំផុតរបស់គាត់គឺបានធ្វើឡើង ក្នុងអំឡុងសម័យសង្គ្រាមលោកលើកទី១ ក្នុងជួរកងទ័ព ដែលនៅទីនោះ គាត់បានបម្រើការជាពេទ្យទាហាន ដែលចូលទៅក្នុងសមរភូមិ ដោយមិនកាន់អាវុធក្នុងដៃ។ គាត់ទទួលបានមេដាយកិត្តិយសដ៏ខ្ពង់ខ្ពស់របស់កងទ័ព សម្រាប់វីរភាពរបស់គាត់ ប៉ុន្តែ គេបាននឹកចាំអំពីគាត់ ដោយសារការបម្រើ ដោយសេចក្តីស្រឡាញ់ ទាំងក្នុងអំឡុងសម័យសង្គ្រាម និងក្រោយសម័យសង្គ្រាម។
ការដែលលោកអេម៉ូរីបម្រើអ្នកដទៃ ដោយមិនគិតប្រយោជន៍ផ្ទាល់ខ្លួន គឺស្របទៅតាមការបង្រៀនរបស់សាវ័កប៉ុល ទៅកាន់ពួកជំនុំនៅទីក្រុងកាឡាទី យ៉ាងដូចនេះថា “បងប្អូនអើយ ព្រះទ្រង់បានហៅអ្នករាល់គ្នាមក ឲ្យមានសេរីភាព តែកុំឲ្យប្រើសេរីនោះ ទុកជាឱកាសដល់សាច់ឈាមឡើយ គឺត្រូវបំរើគ្នាទៅវិញទៅមក ដោយសេចក្តីស្រឡាញ់វិញ”(កាឡាទី ៥:១៣)។ ប៉ុន្តែ តើយើងបម្រើដោយរបៀបណា? ក្នុងភាពប្រេះបែករបស់យើង សាច់ឈាមរបស់យើងទាញនាំយើងគិតប្រយោជន៍ខ្លួនឯងជាមុន ជាជាងខ្វល់អំពីអ្នកដទៃ ដូចនេះ តើការមិនគិតប្រយោជន៍ផ្ទាល់ខ្លួន ខុសពីនិស្ស័យសាច់ឈាមយើង មានប្រភពចេញពីណា?
ក្នុងបទគម្ពីរភីលីព ២:៥ សាវ័កប៉ុលបានផ្តល់ឲ្យនូវការលើកទឹកចិត្តថា ក្នុងទំនាក់ទំនងជាមួយអ្នកដទៃ យើង “ត្រូវតែមានគំនិតគិតដូចជាព្រះគ្រីស្ទយេស៊ូវវិញ”។ សាវ័កប៉ុលក៏បានពិពណ៌នា អំពីព្រះគ្រីស្ទដែលបានស្ម័គ្រព្រះទ័យសុគត នៅលើឈើឆ្កាង ដោយសារសេចក្តីស្រឡាញ់ដ៏លើសលប់ចំពោះយើងរាល់គ្នា។ ទាល់តែព្រះវិញ្ញាណព្រះអង្គកែប្រែគំនិតយើង ឲ្យគិតដូចព្រះគ្រីស្ទ ទើបព្រះអង្គញែកយើងចេញ ហើយជួយឲ្យយើងអាចធ្វើការលះបង់ ដើម្បីអ្នកដទៃ ដោយឆ្លុះបញ្ចាំងអំពីការលះបង់ដ៏ខ្ពស់បំផុតរបស់ព្រះយេស៊ូវ ដើម្បីយើងរាល់គ្នា។ ចូរយើងចុះចូលនឹងព្រះរាជកិច្ចរបស់ព្រះយេស៊ូវ ដែលកំពុងធ្វើការក្នុងចិត្តយើង។—Bill Crowder
តើអ្នកដទៃបានធ្វើការលះបង់ ដើម្បីបម្រើអ្នកដូចម្តេចខ្លះ? តើអ្នកអាចបម្រើអ្នកដទៃ ដូចម្តេចខ្លះ ដោយរាប់ចាប់ពីគ្រួសាររបស់អ្នកទៅ?
ឱព្រះវរបិតានៃសេចក្តីស្រឡាញ់ ទូលបង្គំសូមអរព្រះគុណព្រះអង្គ សម្រាប់ការប្រទានគំរូដ៏ឥតខ្ចោះរបស់ព្រះយេស៊ូវ
និងការលះបង់របស់ព្រះអង្គ ដើម្បីទូលបង្គំ។ សូមព្រះអង្គជួយទូលបង្គំ ឲ្យមានគំនិតគិតដូចព្រះយេស៊ូវវិញ។
For further study, visit DiscovertheWord.org/series/the-compassion-of-jesus.
គម្រោងអានព្រះគម្ពីររយៈពេល១ឆ្នាំ : នេហេមា ១-៣ និង កិច្ចការ ២:១-២១