ព្រះ​នៃ​សេរី​ភាព

និក្ខមនំ ៣:១-១០

អញ​នឹង​ចាត់​ឯង​ឲ្យ​ទៅផារ៉ោន ដើម្បី​ឲ្យឯង​បាន​នាំ​រាស្ត្រអញ គឺជា​ពួក​កូនចៅ​អ៊ីស្រាអែល​ចេញពី​ស្រុក​អេ​ស៊ីព្ទមក​។ និក្ខមនំ ៣:១០

បន្ទាប់ពី លោក​ប្រធានាធិបតី អេ​ប្រាហាំ លិនខិន(Abraham Lincoln) បាន​ចេញ​សេចក្តី​ប្រកាស​ដោះ​លែង​ទាសករ​ទាំង​អស់ នៅ​ភាគ​ខាង​ត្បូង​នៃ​សហរដ្ឋអាមេរិក រដ្ឋ​សហព័ន្ធ​ដែល​មិន​ចង់​ដោះ​លែង​ទាសករ​ក៏​បាន​ផ្តាច់​ខ្លួន បណ្តាល​ឲ្យ​មាន​សង្រ្គាម​សីវិល​ផ្ទុះ​ឡើង​។ ប៉ុន្តែ បន្ទាប់​ពី​រដ្ឋ​សហព័ន្ធ​បាន​ចុះ​ចាញ់ រដ្ឋ​តិចសាស់ នៅតែ​មិន​ទទួល​ស្គាល់​សេរី​ភាព​របស់​ទាសករ​។ ទោះជា​យ៉ាងណា​ក៏ដោយ នៅ​ថ្ងៃទី១៩ ខែ​មិថុនា ឆ្នាំ១៨៦៥ លោក​ហ្គរដិន គ្រែងជ័រ(Gordon Granger) ជា​មេទ័ព​របស់​លោក​អ័ប្រាហាំ លីនខិន ក៏​បាន​ជិះ​សេះ​ចូល​ទៅ​ក្នុង​ទីក្រុង​កាល់​វេស្តុន រដ្ឋ​តិច​សាសន៍ ហើយ​បាន​ធ្វើ​ការ​ទាម​ទា ឲ្យ​គេ​ដោះ​លែង​ទាសករ​ទាំង​អស់​។ សូម​យើង​ស្រមៃ​អំពី​ការ​ភ្ញាក់​ផ្អើល និង​ក្តី​អំណរ​របស់​ទាសករ នៅពេល​ដែល​គេ​ដោះ​ខ្នោះ​ច្រវាក់​ចេញពី​ជើង​ពួកគេ បន្ទាប់ពី​គេ​បានឮ​ការ​ប្រកាស​នោះ​។

ព្រះ​អម្ចាស់​ទត​ឃើញ​មនុស្ស​ដែល​ត្រូវ​គេ​សង្កត់សង្កិន ហើយ​នៅ​ទី​បំផុត ព្រះអង្គ​ក៏​ប្រកាស​ថា ព្រះអង្គ​នឹង​ប្រទាន​សេរី​ភាព ដល់​អ្នក​ដែល​រស់នៅ​ក្រោម​ភាព​អយុត្តិធម៌​។ ព្រះ​អង្គ​ប្រកាស​អំពី​សេរី​ភាព​ក្នុង​សម័យ​បច្ចុប្បន្ន ក៏​ដូច​នៅ​សម័យ​របស់​លោក​ម៉ូសេ​។ ព្រះអង្គ​បាន​បង្ហាញ​អង្គ​ទ្រង់ នៅ​ក្នុង​គុម្ព​បន្លា​ឆេះ ដោយ​មាន​បន្ទូល​ជា​លក្ខណៈ​បន្ទាន់​ថា ព្រះអង្គ​បាន​ឃើញ​សេចក្តី​វេទនា​របស់​រាស្ត្រ​ព្រះអង្គ ដែល​នៅ​ស្រុក​អេស៊ីព្ទ​ហើយ(និក្ខមនំ ៣:៧)។ ព្រះអង្គ​មិន​គ្រាន់តែ​បាន​ទត​ឃើញ​អំពើ​សាហាវ​ព្រៃ​ផ្សៃ​ដែល​សាសន៍​ដទៃ​ បាន​ប្រព្រឹត្ត​ចំពោះ​ពួក​អ៊ីស្រាអែល​ប៉ុណ្ណោះ​ទេ តែ​ព្រះ​អង្គ​ថែម​ទាំង​មាន​ផែនការ​រំដោះ​ពួកគេ​ផង​ដែរ​។ គឺ​ដូច​ដែល​ព្រះ​អង្គ​ប្រកាស​ថា “អញ​បាន​ចុះ​មក ដើម្បី​នឹង​ជួយ​ដោះ​គេ​ឲ្យ​រួច​ចេញពី​កណ្តាប់​ដៃ​នៃ​ពួក​សាសន៍​អេស៊ីព្ទ អញ​នឹង​នាំ​គេ​ឡើង​ចេញពី​ស្រុក​នោះ ទៅ​ឯ​ស្រុក​យ៉ាង​ល្អ​ដ៏​ធំ​ទូលាយ​ជា​ស្រុក​ដែល​មាន​ទឹកដោះ និងទឹក​ឃ្មុំ​ហូរហៀរ​វិញ”(ខ.៨)។ ព្រះអង្គ​សព្វ​ព្រះទ័យ​នឹង​ប្រើ​លោក​ម៉ូសេ ឲ្យ​ចេញ​ទៅ​ប្រកាស​អំពី​សេរី​ភាព​ដល់​ប្រជាជន​អ៊ីស្រាអែល​។ គឺ​ដូច​ដែល​ព្រះអង្គ​បាន​បង្គាប់​គាត់​ថា “អញ​នឹង​ចាត់​ឯង​ឲ្យ​ទៅ​ផារ៉ោន ដើម្បី​ឲ្យ​ឯង​បាន​នាំ​រាស្ត្រ​អញ គឺជា​ពួក​កូនចៅ​អ៊ីស្រាអែល​ចេញពី​ស្រុក​អេស៊ីព្ទ​មក”(ខ.១០)។

ថ្ងៃ​ណាមួយ​ព្រះអង្គ​នឹង​រំដោះ​យើង ឲ្យ​រួច​ផុត​ពី​ចំណង និង​ភាព​អយុត្តិធម៌​ទាំង​អស់ ទោះ​ព្រះអង្គ​មិន​បាន​សម្រេច​ផែនការ​ឲ្យ​បាន​ឆាប់​រហ័ស តាម​ការ​រំពឹង​គិត​របស់​យើង​ក៏ដោយ​។ ព្រះ​អង្គ​ប្រទាន​ក្តី​សង្ឃឹម និង​សេរី​ភាព​ដល់​មនុស្ស​ទាំង​អស់ ដែល​កំពុង​ស្ថិត​ក្រោម​ការ​សង្កត់សង្កិន​។—Winn Collier

តើ​អ្នក​បាន​ឃើញ​ព្រះអម្ចាស់​ធ្វើ​ការ​ក្នុង​ជីវិត​អ្នក​ដែលគេ​សង្កត់សង្កិន ដើម្បី​ជួយ​ពួកគេ​ដូច​ម្តេច​ខ្លះ?
តើ​ព្រះអង្គ​បាន​អញ្ជើញ​អ្នក ឲ្យ​ចូល​រួម​ក្នុង​ព្រះ​រាជ​កិច្ច​របស់​ព្រះអង្គ ដូច​ម្តេច​ខ្លះ?

ឱ​ព្រះអម្ចាស់ លោកិយ​នេះ​មាន​ពេញ​ទៅ​ដោយ​ការ​សង្កត់សង្កិន​។ មនុស្ស​ងាយ​នឹង​ធ្លាក់​ចូល​ក្នុង​ភាព​អស់​សង្ឃឹម​។
សូម​ព្រះ​អង្គ​ជួយ​ទូល​បង្គំ​ឲ្យ​នៅ​តែ​ជឿ​ជាក់ មក​លើ​បំណង​ព្រះទ័យ​របស់​ព្រះអង្គ ក្នុង​ការ​ប្រទាន​សេរី​ភាព​ដល់​មនុស្ស​ទាំង​អស់​។

គម្រោងអានព្រះគម្ពីររយៈពេល១ឆ្នាំ : នេហេមា ១២-១៣ និង​កិច្ចការ ៤:២៣-២៧

Share this post:
Facebook
Twitter
LinkedIn
WhatsApp

More articles