តើអំពល់អ្វីដល់អ្នក?
ដោយKaren Huang
June 30, 2024
យ៉ូហាន ២១:១៥-២២
នោះតើអំពល់អ្វីដល់អ្នក ចូរឲ្យអ្នកមកតាមខ្ញុំចុះ។ យ៉ូហាន ២១:២២
មានពេលមួយក្មួយស្រីខ្ញុំអាយុ៦ឆ្នាំ បានសួរខ្ញុំថា ហេតុអ្វីគាត់ទទួលបានស្ករគ្រាប់ មានរស់ជាតិស្តូ្របឺរី តែបងប្អូនគាត់ទទួលបានស្ករគ្រាប់មានរស់ជាតិទំពាំងបាយជូរ? តាមរយៈអាកប្បកិរិយារបស់ក្មួយប្រុសក្មួយស្រីរបស់ខ្ញុំ ខ្ញុំរៀនសូត្របានថា ក្មេងៗច្រើនតែប្រៀបធៀបរបស់អ្វីដែលគាត់បានទទួល ជាមួយនឹងរបស់អ្វីដែលអ្នកដទៃបានទទួល។ បញ្ហានេះមានន័យថា ក្នុងនាមខ្ញុំជាម្តាយមីងដែលស្រឡាញ់ពួកគាត់ ខ្ញុំត្រូវធ្វើការសម្រេចចិត្តប្រកបដោយប្រាជ្ញា មុននឹងឲ្យអ្វីមួយដល់ពួកគេ។
ជួនកាល ខ្ញុំក៏បានប្រៀបធៀបរបស់អ្វីដែលព្រះប្រទានខ្ញុំ ជាមួយនឹងរបស់ដែលព្រះអង្គប្រទានអ្នកដទៃផងដែរ។ ខ្ញុំទូលសួរព្រះអង្គថា “ហេតុអ្វីទូលបង្គំបានរបស់នេះ តែនាងបានរបស់នោះអញ្ចឹង?” សំណួរនេះបានធ្វើឲ្យខ្ញុំនឹកចាំ អំពីអ្វីដែលលោកស៊ីម៉ូន ពេត្រុសបានសួរព្រះយេស៊ូវ នៅសមុទ្រកាលីឡេ។ កាលនោះ ព្រះយេស៊ូវទើបតែបានប្រទានការស្អាងឡើងវិញ និងការអត់ទោសបាបដល់គាត់ បន្ទាប់ពីគាត់បានបដិសេធន៍ព្រះអង្គ ហើយព្រះអង្គក៏បានប្រាប់គាត់ថា គាត់នឹងបានថ្វាយសិរីល្អដល់ព្រះ ដោយការស្លាប់ ដោយសារសេចក្តីជំនឿ(យ៉ូហាន ២១:១៥-១៩)។ ពេលនោះ គាត់មិនបានឆ្លើយតបថា បាទ ចំពោះការត្រាស់ហៅរបស់ព្រះយេស៊ូវទេ តែគាត់បែរជាសួរព្រះអង្គថា “ព្រះអម្ចាស់អើយ តើអ្នកនោះនឹងបានដូចម្តេចទៅ?”(ខ.២១)។
ព្រះយេស៊ូវក៏បានឆ្លើយតបថា “បើសិនជាខ្ញុំចង់ឲ្យអ្នកនោះនៅ ទាល់តែខ្ញុំមក នោះតើអំពល់អ្វីដល់អ្នក ចូរឲ្យអ្នកមកតាមខ្ញុំចុះ”(ខ.២២)។ ខ្ញុំជឿថា ព្រះយេស៊ូវក៏មានបន្ទូលដូចនេះ ចំពោះយើងផងដែរ។ ពេលណាព្រះអង្គបានប្រទានយើងនូវទិសដៅ ក្នុងផ្នែកណាមួយនៃជីវិតយើងហើយ ព្រះអង្គសព្វព្រះទ័យឲ្យយើងទុកចិត្តព្រះអង្គ។ យើងមិនត្រូវប្រៀបធៀបផ្លូវដើររបស់យើង ជាមួយផ្លូវដែលអ្នកដទៃដើរទេ ប៉ុន្តែ យើងគ្រាន់តែត្រូវដើរតាមព្រះអង្គប៉ុណ្ណោះ។
សាវ័កពេត្រុសក៏បានដើរតាមព្រះអម្ចាស់ ជាង៣០ឆ្នាំ ក្នុងនាមជាអ្នកដឹកនាំពួកជំនុំដំបូង ប្រកបដោយចិត្តក្លាហាន។ កំណត់ត្រាប្រវត្តិសាស្រ្តក៏បានបង្ហាញផងដែរថា គាត់បានទទួលយកសេចក្តីស្លាប់ ដោយគ្មានការភ័យខ្លាច នៅក្រោមការគ្រប់គ្រងរបស់អធិរាជនេរ៉ូ ជាស្តេចដ៏សាហាវព្រៃផ្សៃនៃចក្រភពរ៉ូម៉ាំង។ ចូរយើងមានចិត្តប្តូរផ្តាច់ដោយគ្មានងាករេ និងគ្មានការប្រៀបធៀបជាមួយអ្នកដទៃ ក្នុងការដើរតាមព្រះ ដោយទុកចិត្តលើសេចក្តីស្រឡាញ់ និងទិសដៅរបស់ព្រះអង្គ។—Karen Huang
តើអ្នកបានប្រៀបធៀបស្ថានភាពរបស់អ្នកជាមួយអ្នកដទៃ នៅពេលណាខ្លះ? តើអ្នកអាចដើរតាមព្រះអង្គ តាមរបៀបដ៏ត្រឹមត្រូវដូចម្តេចខ្លះ?
ឱព្រះយេស៊ូវ សូមព្រះអង្គជួយទូលបង្គំឲ្យទុកចិត្ត និងដើរតាមព្រះអង្គ ដោយមិនប្រៀបធៀបខ្លួនឯងជាមួយអ្នកដទៃ។
គម្រោងអានព្រះគម្ពីររយៈពេល១ឆ្នាំ : យ៉ូប ១៧-១៩ និងកិច្ចការ ១០:១-២៣