អាវុធរបស់យើងក្នុងសង្គ្រាម
ដោយArthur Jackson
July 6, 2024
២កូរិនថូស ១០:៣-៦
ព្រោះគ្រឿងសស្ត្រាវុធពិជ័យសង្គ្រាមរបស់យើងខ្ញុំ មិនមែនជារបស់ខាងសាច់ឈាម។ ២កូរិនថូស ១០:៤
មិត្តភក្តិថ្មីរបស់លោកគ្រូគង្វាលបេលេយ(Bailey) បានចែកចាយដល់លោកគ្រូបេលេយ អំពីបញ្ហារបស់គាត់ ដែលមានការបំពានផ្លូវភេទ និងការញៀនរូបអាសអាភាស។ យុវជនម្នាក់នោះជាអ្នកជឿព្រះយេស៊ូវ ប៉ុន្តែ គាត់បានជួបការបំពានផ្លូវភេទ និងបានមើលរូបអាសអាភាស ក្នុងវ័យក្មេង ធ្វើឲ្យគាត់ជួបបញ្ហា ដែលគាត់មិនអាចដោះស្រាយដោយខ្លួនឯងបាន។ គាត់ក៏បានធ្លាក់ចូលក្នុងភាពអស់សង្ឃឹម ហើយក៏បានឈោងទៅរកជំនួយ។
ក្នុងនាមយើងជាអ្នកជឿព្រះគ្រីស្ទ យើងតយុទ្ធនឹងអំណាចនៃសេចក្តីអាក្រក់ដែលយើងមើលមិនឃើញ(២កូរិនថូស ១០:៣-៦)។ ប៉ុន្តែ ព្រះអង្គបានប្រទានអាវុធ សម្រាប់ឲ្យយើងតយុទ្ធក្នុងសង្គ្រាមខាងវិញ្ញាណ។ ទោះជាយ៉ាងណាក៏ដោយ អាវុធនោះ មិនមែនជាអាវុធរបស់លោកិយទេ។ ផ្ទុយទៅវិញ យើងមាន “ឥទ្ធិឫទ្ធិដែលមកពីព្រះ សំរាប់នឹងរំលំទីមាំមួនវិញ”(ខ.៤)។ តើការបកស្រាយនេះមានន័យដូចម្តេច? “ទីមាំមួន” ត្រូវបានគេសង់ឡើងយ៉ាងរឹងមាំ។ អាវុធដែលព្រះនៃយើងបានប្រទាន គឺរាប់បញ្ចូលអាវុធនៃសេចក្តីសុចរិត នៅដៃខាងស្តាំសម្រាប់ប្រយុទ្ធ និងនៅខាងឆ្វេងសម្រាប់ការពារ(៦:៧)។ បទគម្ពីរអេភេសូរ ៦:១៣-១៨ ក៏បានរៀបរាប់អំពីអាវុធជាច្រើន ដែលជួយការពារយើង ដែលរួមមានព្រះបន្ទូល សេចក្តីជំនឿ សេចក្តីសង្គ្រោះ ការអធិស្ឋាន និងការទ្រទ្រង់របស់អ្នកជឿដទៃទៀត។ ពេលណាយើងប្រឈមមុខដាក់កម្លាំងដែលធំជាង និងខ្លាំងជាងយើង ការប្រើប្រាស់អាវុធទាំងនេះឲ្យបានត្រឹមត្រូវ អាចជួយយើងឲ្យឈរមាំមួន ដោយមិនជំពប់ដួល។
ព្រះអម្ចាស់ក៏ជាអ្នកប្រឹក្សាយោបល់ និងមានឯកទេសដទៃទៀត សម្រាប់ជួយអស់អ្នកដែលកំពុងតយុទ្ធនឹងអំណាច ដែលធំពេក មិនអាចជម្នះដោយខ្លួនឯងបាន។ នៅក្នុង និងតាមរយៈព្រះយេស៊ូវ យើងមិនចាំបាច់ត្រូវចុះចាញ់ ក្នុងការតយុទ្ធនោះទេ។ នេះជាដំណឹងដ៏ល្អ ដែលលើកទឹកចិត្តយើងឲ្យមានសង្ឃឹម និងចិត្តក្លាហានឡើង។ យើងមានគ្រឿងសឹករបស់ព្រះអង្គហើយ ចូរកុំរាថយឡើយ!—Arthur Jackson
តើអ្នកអាចឈោងទៅរកនរណាខ្លះ ដើម្បីស្វែងរកជំនួយ ក្នុងពេលមានទុក្ខលំបាក? តើអ្នកនឹងប្រើអាវុធអ្វីខ្លះ?
ឱព្រះយេស៊ូវ ព្រះអង្គមានព្រះចេស្ដាជាងអំណាចគ្រប់យ៉ាង ដែលទូលបង្គំអាចមើលឃើញ និងមើលមិនឃើញ។ ទូលបង្គំត្រូវការព្រះវត្តមាន និងព្រះចេស្ដាព្រះអង្គ ធ្វើការក្នុងជីវិតទូលបង្គំ នៅថ្ងៃនេះ។
គម្រោងអានព្រះគម្ពីររយៈពេល១ឆ្នាំ: យ៉ូប ៣២-៣៣ និង កិច្ចការ ១៤