១សាំយ៉ូអែល ១៦:៤-១២
ដែលមនុស្សលោកពិចារណាមើលទេ ឯមនុស្សលោក តែងមើលតែឫកពាខាងក្រៅប៉ុណ្ណោះ តែព្រះយេហូវ៉ាទ្រង់ទតចំពោះក្នុងចិត្តវិញ។ ១សាំយ៉ូអែល ១៦:៧
ដើម្បីកាត់បន្ថយការខ្ជះខ្ជាយផលិតផលអាហារ ក្រុមហ៊ុនផ្សាទំនើបមួយ នៅប្រទេសសិង្ហបុរីបានលក់ផ្លែឈើ និងបន្លែដែលមានស្នាមជាំបន្តិចបន្តួច ក្នុងតម្លៃថោកជាងតម្លៃធម្មតា។ កម្មវិធីនេះបានកាត់បន្ថយការខ្ជះខ្ជាយផលិតផលអាហារ បាន៧៧១តោន ដែលកាលពីមុន គេអាចបោះពួកវាចោល ដោយសារពួកវាមានសោភ័ណភាពដែលមិនគ្រប់ស្តង់ដារអាហារ។ មិនយូរប៉ុន្មាន អ្នកដើរទិញឥវ៉ាន់ក៏បានដឹងថា រូបរាង្គខាងក្រៅរបស់បន្លែ និងផ្លែឈើ ស្នាមឆ្កូត និងរូបរាង្គមិនស្អាត មិនបានធ្វើឲ្យប៉ះពាល់ដល់រស់ជាតិ និងជីវជាតិរបស់ពួកវាទេ។ គេមិនតែងតែអាចកំណត់អ្វីដែលមាននៅខាងក្នុង ផ្អែកទៅលើរូបរាង្គខាងក្រៅឡើយ។
ហោរាសាំយូអែល បានយល់អំពីបញ្ហាស្រដៀងនេះផងដែរ នៅពេលដែលព្រះអម្ចាស់ចាត់គាត់ ឲ្យទៅចាក់ប្រេងតាំងឲ្យស្តេចរបស់សាសន៍អ៊ីស្រាអែល ដែលត្រូវស្នងរាជបន្ទាប់(១សាំយ៉ូអែល ១៦:១)។ កាលគាត់បានឃើញ អេលាប ជាកូនច្បងរបស់លោកអ៊ីសាយ គាត់គិតស្មានថា អេលាប ជាមនុស្សដែលព្រះអម្ចាស់បានជ្រើសរើស។ ប៉ុន្តែ ព្រះអង្គមានបន្ទូលថា “កុំឲ្យមើលតែឫកពាខាងក្រៅ ឬកំពស់ខ្លួននោះឡើយ ដ្បិតអញមិនទទួលអ្នកនេះទេ ពីព្រោះព្រះទ្រង់មិនទតចំពោះសេចក្តី ដែលមនុស្សលោកពិចារណាមើលទេ ឯមនុស្សលោក តែងមើលតែឫកពាខាងក្រៅប៉ុណ្ណោះ តែព្រះយេហូវ៉ាទ្រង់ទតចំពោះក្នុងចិត្តវិញ”(ខ.៧)។ ក្នុងចំណោមកូនប្រុសទាំង៨នាក់ របស់លោកអ៊ីសាយ ព្រះអម្ចាស់បានជ្រើសរើស ដាវីឌ ជាកូនពៅ ដែលកំពុងឃ្វាលហ្វូងចៀម(ខ.១១) ឲ្យធ្វើជាស្តេច ដែលត្រូវឡើងស្នងរាជបន្ទាប់។
ព្រះអម្ចាស់យកព្រះទ័យទុកដាក់ ចំពោះចិត្តរបស់យើង ជាជាងរបស់ក្រៅខ្លួនដែលយើងមាន ដូចជា ការអប់រំ ប្រាក់ចំណូល ឬការងារស្ម័គ្រចិត្តដែលយើងបានធ្វើជាដើម។ ព្រះយេស៊ូវបានបង្រៀនសិស្សព្រះអង្គ ឲ្យផ្ដោតទៅលើការសម្អាតចិត្តឲ្យបរិសុទ្ធ ដោយជម្រុះចោលភាពអាត្មានិយម និងគំនិតអាក្រក់ ព្រោះ “គឺជាសេចក្តីដែលចេញពីមនុស្សមកទេតើ ដែលធ្វើឲ្យស្មោកគ្រោកនោះ”(ម៉ាកុស ៧:២០)។ ដូចនេះ ចូរយើងពិនិត្យមើលចិត្ត គំនិត និងគោលបំណងរបស់យើង ដោយជំនួយមកពីព្រះអង្គ ក្នុងគ្រប់ការអ្វីទាំងអស់ដែលយើងធ្វើ គឺដូចដែលហោរាសាំយូអែល មិនបានរៀនទុកចិត្តលើសប្បកក្រៅរបស់មនុស្សទេ។—Jasmine Goh
តើអ្នកបានធ្វើ “ការល្អ” ដោយបំណងមិនល្អនៅពេលណា? តើធ្វើដូចម្តេចឲ្យអ្នកអាចដឹងច្បាស់ថា អ្នកបានធ្វើអ្វីមួយ ដោយចិត្តបរិសុទ្ធ?
ឱព្រះអម្ចាស់ សូមព្រះអង្គជួយទូលបង្គំ ឲ្យធ្វើអ្វីដែលថ្វាយព្រះកិត្តិនាមដល់ព្រះអង្គ។
គម្រោងអានព្រះគម្ពីររយៈពេល១ឆ្នាំ: យ៉ូប ៤១-៤២ និង កិច្ចការ ១៦:២២-៤០
