ព្យាយាមក្នុងការអធិស្ឋាន
ដោយJames Banks
July 15, 2024
កូល៉ុស ៤:២-៦,១២-១៣
ចូរព្យាយាមក្នុងសេចក្តីអធិស្ឋាន ទាំងចាំយាមក្នុងសេចក្តីនោះឯង ដោយពាក្យអរព្រះគុណ។ កូល៉ុស ៤:២
ថ្ងៃមួយ ដូនចាស់ម្នាក់បានប្រាប់ លោកលូ(Lu) ជាមិត្តភក្តិខ្ញុំថា “ខ្ញុំបានអធិស្ឋានឲ្យអ្នក៥០ឆ្នាំហើយ”។ មិត្តភក្តិខ្ញុំបានមើលមុខដូនចាស់ ដោយការដឹងគុណយ៉ាងខ្លាំង។ កាលនោះ មិត្តភក្តិខ្ញុំទៅលេងភូមិមួយ នៅប្រទេសប៊ុលហ្ការី ជាកន្លែងដែលឪពុកគាត់បានចម្រើនវ័យធំឡើង ហើយបានចាកចេញ ក្នុងវ័យជំទង់។ ដូនចាស់ ជាអ្នកជឿព្រះយេស៊ូវ ជាអ្នកជិតខាងរបស់តាយាយរបស់លោកលូ។ គាត់បានចាប់ផ្តើមអធិស្ឋានឲ្យលោកលូ ចាប់តាំងពីពេលដែលគាត់បានទទួលដំណឹងថា លោកលូបានចាប់កំណើត ក្នុងប្រទេស នៅឯនាយសមុទ្រ។ សព្វថ្ងៃនេះ ប្រហែលពាក់កណ្តាលសតវត្សរ៍ក្រោយមក លោកលូបានឈានចូលលេងភូមិនោះ ក្នុងការធ្វើដំណើរសម្រាប់មុខជំនួញរបស់គាត់ ហើយគាត់ក៏បានជជែកជាមួយមនុស្សមួយក្រុមនៅទីនោះ អំពីសេចក្តីជំនឿរបស់គាត់។ លោកលូបានទទួលជឿព្រះយេស៊ូវ នៅពេលគាត់ជិតឈានចូលដល់វ័យ៣០ឆ្នាំ ហើយនៅពេលដែលដូនចាស់ចូលមកជិតគាត់ គាត់មានការភ្ញាក់ផ្អើល ចំពោះឥទ្ធិពលនៃការអធិស្ឋានដ៏ជាប់លាប់របស់ដូនចាស់ ដែលបាននាំឲ្យគាត់ទទួលជឿព្រះយេស៊ូវ។
យើងមិនអាចដឹងច្បាស់ថា ការអធិស្ឋានរបស់យើងមានឥទ្ធិពលប៉ុណ្ណា នៅលើផែនដីនេះទេ។ ប៉ុន្តែ ព្រះគម្ពីរប៊ីបបានបង្គាប់យើងថា “ចូរព្យាយាមក្នុងសេចក្តីអធិស្ឋាន ទាំងចាំយាមក្នុងសេចក្តីនោះឯង ដោយពាក្យអរព្រះគុណ”(កូល៉ុស ៤:២)។ កាលសាវ័កប៉ុលសរសេរពាក្យពេចន៍ទាំងអស់នេះ នៅក្នុងសំបុត្រផ្ញើទៅអ្នកជឿក្នុងទីក្រុងកូល៉ុស គាត់ក៏បានសូមឲ្យគេអធិស្ឋានឲ្យគាត់ផងដែរ ដើម្បីឲ្យព្រះអម្ចាស់ “បើកទ្វារ” ឲ្យគាត់ផ្សាយព្រះបន្ទូល នៅកន្លែងណាគាត់ទៅដល់(ខ.៣)។
ជួនកាល យើងប្រហែលជាគិតថា យើងមិនមានអំណោយទាននៃការអធិស្ឋាន។ ប៉ុន្តែ ព្រះគម្ពីរបានរៀបរាប់អំពីអំណោយទានខាងវិញ្ញាណ ដែលមានដូចជា ការថ្លែងទំនាយ ការបង្រៀនជាដើម។ ប៉ុន្តែ ការអធិស្ឋានជាផ្នែកដ៏សំខាន់ក្នុងជីវិតរបស់គ្រីស្ទបរិស័ទម្នាក់ៗ និងនៅក្នុងការងារបម្រើព្រះ។ ព្រោះព្រះអម្ចាស់សព្វព្រះទ័យឲ្យយើងអធិស្ឋានដោយចិត្តស្មោះត្រង់ ដើម្បីឲ្យយើងអាចមើលឃើញកិច្ចការ ដែលមានតែព្រះអង្គទេអាចធ្វើបាន។—James Banks
តើអ្នកបានទទួលព្រះពរ ពីការអធិស្ឋានរបស់អ្នកដទៃដូចម្តេចខ្លះ? តើអ្នកកំពុងអធិស្ឋានឲ្យនរណាខ្លះ ក្នុងពេលសព្វថ្ងៃនេះ?
ឱព្រះវរបិតា ទូលបង្គំសូមអរព្រះគុណព្រះអង្គ ដែលបានសព្វព្រះទ័យស្តាប់ទូលបង្គំអធិស្ឋាន! សូមព្រះអង្គជួយទូលបង្គំ ឲ្យឱបក្រសោបយកឱកាស ជជែកជាមួយព្រះអង្គ និងអធិស្ឋានឲ្យអ្នកដទៃ នៅថ្ងៃនេះ។
Visit ODBU.org/SF120 to hear James Banks’ teachings on prayer.
គម្រោងអានព្រះគម្ពីររយៈពេល១ឆ្នាំ: ទំនុកដំកើង ១៣-១៥ និង កិច្ចការ ១៩:២១-៤១