ព្រះអង្គនៅតែអាចប្រើយើង
ដោយNancy Gavilanes
July 17, 2024
និក្ខមនំ ៧:១-១៣
ក្នុងគ្រាដែលទូលនឹងផារ៉ោន នោះម៉ូសេ លោកបានអាយុ៨០ឆ្នាំ ឯអើរ៉ុនក៏បានអាយុ៨៣ឆ្នាំហើយ។ និក្ខមនំ ៧:៧
មានដូនចាស់ពីរនាក់ មកពីរដ្ឋតិចសាស់ មានឈ្មោះល្បីល្បាញយ៉ាងខ្លាំង ក្នុងវេទិកាបណ្ដាញសង្គម ដោយសារពួកគាត់បានបញ្ចប់ការធ្វើដំណើរជុំវិញពិភពលោក ក្នុងរយៈពេល៨០ថ្ងៃ ក្នុងវ័យ៨១ឆ្នាំ។ ដូនចាស់ទាំងពីរបានរាប់អានគ្នាជាមិត្តល្អបំផុតអស់រយៈពេល២៣ឆ្នាំហើយ ដោយបានធ្វើដំណើរជាមួយគ្នា ទៅកាន់ទ្វីបទាំង៧។ ពួកគាត់បានចាប់ផ្តើមការធ្វើដំណើរពីទ្វីបអង់តាកទិច ហើយទៅរាំចង្វាក់តង់ហ្គោ នៅប្រទេសអាហ្សង់ទីន ជិះសត្វអូដ្ឋនៅប្រទេសអេស៊ីព្ទ រួចជិះគាវទឹកកក នៅតំបន់ប៉ូលខាងជើង។ ពួកគាត់បានទៅដល់១៨ប្រទេស ដែលក្នុងចំណោមនោះ ក៏រួមមានប្រទេសហ្ស៊ែមបៀ ឥណ្ឌា នេប៉ាល់ បាលី ជប៉ុន និងទីក្រុងរ៉ូមផងដែរ ហើយក៏បានបញ្ចប់ការធ្វើដំណើរ ក្នុងប្រទេសអូស្ត្រាលី។ អ្នកទាំងពីរមានប្រសាសន៍ថា ពួកគាត់សង្ឃឹមថា ពួកគាត់បានបណ្តាលចិត្តមនុស្សជំនាន់ក្រោយ ឲ្យអរសប្បាយនឹងការធ្វើដំណើរជុំវិញពិភពលោកផងដែរ ទោះពួកគេស្ថិតក្នុងវ័យណាក៏ដោយ។
ក្នុងបទគម្ពីរនិក្ខមនំ យើងឃើញថា មានបុគ្គលពីរនាក់ស្ថិតក្នុងវ័យ៨០ឆ្នាំ ដែលព្រះអម្ចាស់បានជ្រើសរើស សម្រាប់ការធ្វើដំណើរប្រភេទផ្សេងពីនេះ។ ព្រះអង្គបានត្រាស់ហៅលោកម៉ូសេ ឲ្យទៅចូលគាល់ស្តេចផារ៉ោន ហើយទាមទារឲ្យទ្រង់ដោះលែងប្រជាជនអ៊ីស្រាអែល ជារាស្រ្តរបស់ព្រះអង្គ ឲ្យមានសេរីភាព។ ព្រះអង្គក៏បានចាត់បងប្រុសរបស់លោកម៉ូសេ ឈ្មោះអើរ៉ុន ធ្វើជាជំនួយការរបស់គាត់។ “ក្នុងគ្រាដែលទូលនឹងផារ៉ោន នោះម៉ូសេលោកបានអាយុ៨០ឆ្នាំ ឯអើរ៉ុនក៏បានអាយុ៨៣ឆ្នាំហើយ”(និក្ខមនំ ៧:៧)។
ការត្រាស់ហៅនេះ ហាក់ដូចជាមិនសក្តិសមនឹងអាយុរបស់ពួកគេសោះ ប៉ុន្តែ ព្រះអម្ចាស់បានជ្រើសរើសបងប្អូនទាំងពីរនាក់ ឲ្យធ្វើបេសកកម្មនេះ ហើយពួកគេក៏បានធ្វើតាមបង្គាប់របស់ព្រះអង្គ។ គឺដូចមានសេចក្តីចែងថា “ម៉ូសេ និងអើរ៉ុនក៏ចូលទៅគាល់ផារ៉ោន ហើយបានធ្វើតាមបង្គាប់ព្រះយេហូវ៉ា”(ខ.១០)។
លោកម៉ូសេ និងលោកអើរ៉ុនមានកិត្តិយស និងឯកសិទ្ធិ ដែលបានមើលឃើញព្រះអម្ចាស់រំដោះរាស្រ្តព្រះអង្គ ឲ្យរួចពីភាពជាទាសករដែលមានរយៈពេល៤រយឆ្នាំ។ បុរសទាំងពីរគឺជាភស្តុតាងបញ្ជាក់ថា ព្រះអម្ចាស់អាចប្រើយើង ទោះយើងស្ថិតក្នុងវ័យណាក៏ដោយ។ ទោះយើងនៅក្មេង ឬចាស់ ចូរយើងដើរតាមព្រះអង្គ ទោះព្រះអង្គនាំយើងទៅណាក៏ដោយ។—Nancy Gavilanes
តើអ្នកបានឃើញព្រះអម្ចាស់មានសេចក្តីស្មោះត្រង់ ក្នុងជីវិតអ្នក យ៉ាងណាខ្លះ? តើអ្នកអាចបម្រើព្រះអង្គ ក្នុងរដូវកាលនេះ យ៉ាងដូចម្តេចខ្លះ?
ឱព្រះអម្ចាស់ សូមព្រះអង្គជួយទូលបង្គំឲ្យដើរតាមព្រះអង្គ ពេញមួយជីវិតទូលបង្គំ។
គម្រោងអានព្រះគម្ពីររយៈពេល១ឆ្នាំ: ទំនុកដំកើង ១៨-១៩ និង កិច្ចការ ២០:១៧-៣៨