អេសាយ ៤០:២៧-៣១
គេនឹងហើរឡើងទៅលើ ដោយស្លាប ដូចជាឥន្ទ្រី គេនឹងរត់ទៅឥតដែលហត់ ហើយនឹងដើរឥតដែលល្វើយឡើយ។ អេសាយ ៤០:៣១
សត្វឥន្រ្ទី១គូ បានសង់សំបុកធំមួយ នៅលើដើមឈើមួយដើម ស្ថិតនៅចម្ងាយពីរបីគីឡូម៉ែត្រពីផ្ទះខ្ញុំ។ មិនយូរប៉ុន្មាន សត្វស្លាបធំៗមួយគូរនោះក៏មានកូន។ ពួកវាបានចិញ្ចឹមកូនដែលទើបតែញាស់ជាមួយគ្នា រហូតដល់ពេលដែលពួកវាត្រូវឡានបុកងាប់អស់មួយក្បាល យ៉ាងសោកសៅ។ សត្វឥន្ទ្រីដែលនៅមានជីវិត ក៏បានហោះហើរចុះឡើងអស់បួនប្រាំថ្ងៃ នៅក្បែរទន្លេមួយ គឺហាក់ដូចជាកំពុងស្វែងរកដៃគូររបស់វា ដែលបាត់មិនឃើញត្រឡប់មកសំបុកវិញ។ ទំបំផុត វាក៏បានវិលត្រលប់មកសំបុកវាវិញតែម្នាក់ឯង ហើយបន្តទទួលខុសត្រូវទាំងស្រុង នៅក្នុងការចិញ្ចឹមកូនៗរបស់វាតែម្នាក់ឯង។
ទោះស្ថិតក្នុងស្ថានភាពណាក៏ដោយ ការចិញ្ចឹមកូនតែម្នាក់ឯង អាចមានការលំបាកខ្លាំង។ ក្តីអំណរដែលកូនបានផ្តល់ឲ្យ រួមផ្សំនឹងសំពាធផ្នែកហិរញ្ញវត្ថុ និងសំពាធផ្លូវអារម្មណ៍ដែលអាចកើតមាន អាចបង្កើតឲ្យមានបទពិសោធន៍ខុសៗគ្នាជាច្រើន។ ប៉ុន្តែ សេចក្តីសង្ឃឹមនៅតែអាចកើតមាន សម្រាប់អ្នកដែលមានតួនាទីដ៏សំខាន់នេះ ក៏ដូចជាអ្នកដែលព្យាយាមគ្រប់គ្រងស្ថានភាព ដែលហាក់ដូចជាពិបាកខ្លាំងពេក។
ព្រះអម្ចាស់គង់នៅជាមួយយើង ពេលណាយើងមានអារម្មណ៍អស់កម្លាំង និងបាក់ទឹកចិត្ត។ ដោយសារព្រះអង្គមានគ្រប់ព្រះចេស្ដា និងមិនចេះប្រែប្រួល នោះព្រះអង្គមិនចេះអស់កម្លាំងឡើយ។ យើងអាចទុកចិត្តលើបទគម្ពីរដែលបានចែងថា “អស់អ្នកណាដែលសង្ឃឹមដល់ព្រះយេហូវ៉ាវិញ នោះនឹងមានកំឡាំងចំរើនជានិច្ច”(អេសាយ ៤០:៣១)។ ភាពកម្សោយរបស់យើង អាចនាំឲ្យយើងមានបញ្ហាប្រឈម តែភាពកម្សោយទាំងនោះមិនមែនជាអ្នកកំណត់ជោគវាសនារបស់យើងទេ ព្រោះយើងអាចពឹងផ្អែកលើកម្លាំង ដែលព្រះអង្គនឹងប្រទានយើងជាថ្មី ដោយការអស្ចារ្យ។ ការមានក្តីសង្ឃឹមដល់ព្រះអង្គ ជួយឲ្យយើងដើរ ដោយមិនខ្សោះអស់កម្លាំង ព្រមទាំងហើរឡើងទៅលើ ដោយស្លាប ដូចសត្វឥន្ទ្រី(ខ.៣១)។—Jennifer Benson Schuldt
តើមានបញ្ហាអ្វីដែលធ្វើឲ្យអ្នកមានអារម្មណ៍ពិបាកពេក ក្នុងជីវិត? តើព្រះអម្ចាស់អាចលើកទឹកចិត្តអ្នកឲ្យពឹងផ្អែកលើកម្លាំងមកពីព្រះអង្គ ដូចម្តេចខ្លះ?
ឱព្រះវរបិតា ដែលគង់នៅស្ថានសួគ៌ ទូលបង្គំមិនអាចគ្រប់គ្រងជីវិតទូលបង្គំ ដោយខ្លួនឯងបានទេ។
ទូលបង្គំត្រូវការព្រះអង្គ។ សូមព្រះអង្គជួយទូលបង្គំឲ្យមានកម្លាំងជាថ្មី នៅថ្ងៃនេះ។
គម្រោងអានព្រះគម្ពីររយៈពេល១ឆ្នាំ: ទំនុកដំកើង ២០-២២ និង កិច្ចការ ២១:១-១៧
