រស់នៅស្របតាមបំណងព្រះទ័យព្រះអង្គ
ដោយAnne Cetas
July 25, 2024
ហេព្រើរ ១៣:៥-៨
ដ្បិតទ្រង់មានព្រះបន្ទូលថា «អញនឹងមិនចាកចេញពីឯង ក៏មិនបោះបង់ចោលឯងឡើយ»។ ហេព្រើរ ១៣:៥
មនុស្សរាប់ពាន់នាក់បានអធិស្ឋានឲ្យលោកគ្រូគង្វាល អ៊ែដ បប់សិន(Ed Dobson) នៅពេលដែលគាត់ទៅពិនិត្យសុខភាពរកឃើញថា គាត់មានជំងឺក្រិនសរសៃឈាមអាមីតូត្រូហ្វីក កាលពីឆ្នាំ២០០០។ មនុស្សជាច្រើនជឿថា ពេលណាពួកគេអធិស្ឋាន ដោយជំនឿ សូមការប្រោសឲ្យជា ព្រះអម្ចាស់មុខជានឹងឆ្លើយតបភ្លាមៗមិនខាន។ គាត់បានតយុទ្ធនឹងជំងឺនេះអស់រយៈពេល១២ឆ្នាំ ដែលបានបណ្តាលឲ្យសាច់ដុំគាត់រួញស្វិតបន្តិចម្តងៗ(និងមានរយៈពេល៣ឆ្នាំ មុនពេលគាត់ទទួលមរណៈភាព)។ ពេលនោះ មានគេសួរគាត់ថា ហេតុអ្វីព្រះអម្ចាស់មិនទាន់បានប្រោសគាត់ឲ្យជា។ គាត់ក៏បានឆ្លើយថា “ខ្ញុំមិនបានដឹងច្បាស់ថា ហេតុអ្វីព្រះអង្គមិនទាន់ប្រោសខ្ញុំឲ្យជាទេ ដូចនេះ ខ្ញុំក៏មិនបានសួរព្រះអង្គដែរ”។ ពេលនោះ អ្នកស្រីឡូណា(Lorna) ជាភរិយារបស់គាត់ ក៏បានមានប្រសាសន៍បន្ថែមពីលើសម្តីរបស់គាត់ថា “បើអ្នកតែងតែមានចិត្តងប់ងុលនឹងការស្វែងរកចម្លើយពីព្រះ អ្នកនឹងមិនអាចរស់នៅ ឲ្យបានត្រឹមត្រូវ តាមបំណងព្រះហឫទ័យរបស់ព្រះអង្គឡើយ”។
តើអ្នកអាចមើលឃើញពាក្យសម្តីរបស់លោកអ៊ែដ និងអ្នកស្រីឡូណា បង្ហាញការគោរពដល់ព្រះអង្គដែរឬទេ? ពួកគាត់ដឹងថា ប្រាជ្ញារបស់ព្រះអង្គ ខ្ពស់ជាងប្រាជ្ញារបស់ពួកគាត់។ តែលោកអេដបានទទួលស្គាល់ថា គាត់ស្ទើរតែមិនអាចឈប់ព្រួយបារម្ភអំពីថ្ងៃស្អែក។ គាត់ដឹងថា ជំងឺនេះបានបណ្តាលឲ្យគាត់មានពិការភាពកាន់តែធ្ងន់ធ្ងរឡើងៗ ហើយគាត់មិនដឹងថា នៅថ្ងៃបន្ទាប់គាត់នឹងជួបបញ្ហាអ្វីទៀតទេ។
ដើម្បីឲ្យគាត់អាចផ្តោតទៅលើពេលអនាគត លោកអ៊ែដក៏បានដាក់ខគម្ពីរ ក្នុងឡានរបស់គាត់ នៅលើកញ្ចក់ឆ្លុះមុខក្នុងបន្ទប់ទឹក និងនៅក្បែរគ្រែគេងរបស់គាត់ ដែលបានបន្តក្រើនរំឭកគាត់យ៉ាងដូចនេះថា “ដ្បិតទ្រង់មានព្រះបន្ទូលថា «អញនឹងមិនចាកចេញពីឯង ក៏មិនបោះបង់ចោលឯងឡើយ» បានជាយើងរាល់គ្នាអាចនឹងនិយាយ ដោយក្លាហានថា «ខ្ញុំមិនព្រមខ្លាចឡើយ ព្រោះព្រះអម្ចាស់ទ្រង់ជាជំនួយខ្ញុំ»(ហេព្រើរ ១៣:៥-៦)។ ពេលណាគាត់ចាប់ផ្តើមមានការព្រួយបារម្ភ គាត់ក៏បានរំឭកខគម្ពីរទាំងនេះ ដើម្បីឲ្យគាត់ផ្តោតគំនិតទៅលើសេចក្តីពិត ដែលមានចែងក្នុងខគម្ពីរទាំងនោះ។
គ្មាននរណាដឹងថា ថ្ងៃស្អែក នឹងមានរឿងអ្វីកើតឡើងទេ។ តាមរយៈទីបន្ទាល់របស់លោកអ៊ែដ យើងអាចរៀនសូត្របានថា ពេលណាយើងជួបទុក្ខលំបាក យើងអាចទូលសូមព្រះអង្គជួយយើងកែប្រែការព្រួយបារម្ភ ឲ្យក្លាយជាឱកាសដើម្បីទុកចិត្តព្រះអង្គ។—Anne Cetas
មានខគម្ពីរណាខ្លះ ដែលបានជួយអ្នកឲ្យផ្តោតទៅលើពេលថ្ងៃនេះ និងមិនព្រួយបារម្ភអំពីថ្ងៃស្អែក?
តើអ្នកអាចយកខគម្ពីរនោះទៅបិទនៅកន្លែងណា ដើម្បីជួយឲ្យជំនឿអ្នកមានការចម្រើនឡើង?
ឱព្រះវរបិតា សូមព្រះអង្គជួយទូលបង្គំឲ្យចាំថា ព្រះអង្គជាព្រះដែលគង់នៅជាមួយទូលបង្គំជានិច្ច។ សូមព្រះអង្គបង្រៀនទូលបង្គំឲ្យទុកចិត្តព្រះអង្គ។
គម្រោងអានព្រះគម្ពីររយៈពេល១ឆ្នាំ: ទំនុកដំកើង ៣៧-៣៩ និង កិច្ចការ ២៦