បម្រើព្រះតាមមធ្យោបាយតូចមួយ
ដោយLeslie Koh
July 26, 2024
១យ៉ូហាន ៤:៧-១,១៩-២១
ឯយើងរាល់គ្នា យើងស្រឡាញ់ទ្រង់ ពីព្រោះទ្រង់បានស្រឡាញ់យើងជាមុន។ ១យ៉ូហាន ៤:១៩
កាលអ្នកស្រីអេលស៊ី(Elsie) ទទួលរងការវាយប្រហារពីជំងឺមហារីក គាត់បានត្រៀមខ្លួនជាស្រេច ដើម្បីទៅរស់នៅជាមួយព្រះយេស៊ូវ ក្នុងនគរស្ថានសួគ៌។ ប៉ុន្តែ គាត់បានជាពីជំងឺដ៏កាចសាហាវនេះ ទោះវាបានធ្វើឲ្យគាត់ពិការមិនអាចផ្លាស់ទីដោយខ្លួនឯងក៏ដោយ។ គាត់ក៏បានឆ្ងល់ផងដែរថា ហេតុអ្វីព្រះអម្ចាស់បានទុកជីវិតឲ្យគាត់រស់នៅបន្តទៀត។ គាត់ក៏បានទូលសួរព្រះអង្គថា “តើទូលបង្គំអាចធ្វើអ្វីបាន? ទូលបង្គំមិនមានលុយ ឬជំនាញច្រើនទេ ហើយក៏មិនអាចដើររួចដែរ។ តើធ្វើដូចម្តេចឲ្យទូលបង្គំអាចមានប្រយោជន៍ សម្រាប់ព្រះអង្គ?”
បន្ទាប់មក គាត់ក៏បានរកឃើញមធ្យោបាយតូចមួយ ដើម្បីបម្រើអ្នកដទៃ ជាពិសេស អ្នកស៊ីឈ្នួលបោសសម្អាតផ្ទះគាត់ ដែលជាជនអន្តោប្រវេសន៍។ គាត់បានឲ្យអាហារ និងប្រាក់ពីរបីដុល្លាដល់ពួកគេ ពេលណាគាត់បានជួបពួកគេ។ ប្រាក់កាសទាំងនេះតិចតួចមែន តែបានរួមចំណែកជួយបំពេញតម្រូវការរបស់ពួកគេ។ ខណៈពេលដែលគាត់បានជួយអ្នកដទៃយ៉ាងដូចនេះ គាត់ក៏បានឃើញព្រះអង្គផ្គត់ផ្គង់គាត់ ដោយមិត្តភក្តិ និងសាច់ញាតិរបស់គាត់ បានឲ្យអំណោយ និងប្រាក់កាសមួយចំនួនដល់គាត់ ដោយបានជួយឲ្យគាត់បន្តធ្វើជាព្រះពរ សម្រាប់អ្នកដទៃទៀត។
កាលអ្នកស្រីអែលស៊ី ចែកចាយរឿងនេះ ខ្ញុំក៏បានគិតឃើញថា គាត់កំពុងតែអនុវត្តតាមការត្រាស់ហៅឲ្យស្រឡាញ់គ្នាទៅវិញទៅមក ដូចមានចែងក្នុងបទគម្ពីរ ១យ៉ូហាន ៤:១៩ យ៉ាងដូចនេះថា “ឯយើងរាល់គ្នា យើងស្រឡាញ់ទ្រង់ ពីព្រោះទ្រង់បានស្រឡាញ់យើងជាមុន” ក៏ដូចជាស្របតាមសេចក្តីពិត ក្នុងបទគម្ពីរ កិច្ចការ ២០:៣៥ ដែលបានរំឭកយើងថា “ដែលឲ្យ នោះមានពរជាងទទួល”។
អ្នកស្រីអេលស៊ីបានចែករំលែកដល់អ្នកដទៃ បន្ទាប់ពីគាត់បានទទួលជំនួយ ហើយការចែករំលែកនេះ ក៏បានលើកទឹកចិត្តគាត់ផងដែរ។ គាត់មិនមានប្រាក់កាសច្រើន ដើម្បីចែករំលែកដល់អ្នកដទៃ តែគាត់មានចិត្តពេញដោយក្តីស្រឡាញ់ ការអរព្រះគុណព្រះ និងបានត្រៀមខ្លួនជាស្រេច ដើម្បីចែករំលែកអ្វីដែលគាត់មាន ដល់អ្នកដទៃ ហើយព្រះអម្ចាស់ក៏បានប្រទានព្រះពរជាពហុគុណ នៅក្នុងវដ្តនៃការឲ្យ និងការទទួលប្រកបដោយក្តីស្រឡាញ់។ ចូរយើងទូលសូមព្រះអង្គប្រទានពរយើង ឲ្យមានចិត្តដែលអរព្រះគុណ និងសប្បុរស ដើម្បីចែករំលែកដល់អ្នកដទៃ តាមដែលព្រះអង្គបណ្តាលចិត្តយើង!—Leslie Koh
តើអ្នកបានទទួលអ្វីខ្លះ ពីព្រះអម្ចាស់? តើអ្នកអាចលើកទឹកចិត្តនរណាម្នាក់ តាមរបៀបដ៏សាមញ្ញ និងមានន័យយ៉ាងដូចម្តេចខ្លះ នៅថ្ងៃនេះ?
ឱព្រះវរបិតា ទូលបង្គំសូមអរព្រះគុណព្រះអង្គ សម្រាប់ការប្រទានអំណោយជាច្រើន ក្នុងជីវិតទូលបង្គំ។
សូមព្រះអង្គប្រទានទូលបង្គំ នូវចិត្តដែលស្រឡាញ់អ្នកដទៃ ដូចដែលព្រះអង្គស្រឡាញ់ទូលបង្គំ។
គម្រោងអានព្រះគម្ពីររយៈពេល១ឆ្នាំ: ទំនុកដំកើង ៤៣-៤៥ និង កិច្ចការ ២៧:២៧-៤៤