ពន្លកនៃក្តីសង្ឃឹមរបស់កុមារ
ដោយDave Branon
August 2, 2024
លូកា ១៨:១៥-១៧
ទុកឲ្យកូនតូចមកឯខ្ញុំឯណេះ កុំឃាត់វាឡើយ ព្រោះនគរព្រះមានសុទ្ធតែមនុស្សដូចវារាល់គ្នាដែរ។ លូកា ១៨:១៦
កាលចៅស្រីរបស់ខ្ញុំឈ្មោះ អេលីណា(Eliana) ទើបតែមានអាយុ៧ឆ្នាំ គាត់បានមើលវីដេអូមួយ ដែលគេបានចាក់បញ្ចាំងនៅសាលារៀន។ វីដេអូនោះនិយាយអំពីមណ្ឌលកុមារកំព្រាមួយកន្លែង ក្នុងប្រទេសក្វាតាម៉ាឡា។ បន្ទាប់ពីបានមើលវីដេអូនេះហើយ នាងក៏បានប្រាប់ម្តាយនាងថា “យើងត្រូវតែទៅប្រទេសក្វាតាម៉ាឡា ដើម្បីជួយពួកគេ”។ ម្តាយរបស់នាងក៏បានឆ្លើយតបថា គាត់នឹងគិតអំពីរឿងនេះ នៅពេលដែលនាងមានអាយុច្រើនជាងនេះ។
អេលីណាមិនដែលភ្លេចទេ ហើយក្រោយមក កាលគាត់មានអាយុ១០ឆ្នាំ ក្រុមគ្រួសាររបស់គាត់ក៏បានធ្វើដំណើរទៅប្រទេសនោះ ដើម្បីជួយមណ្ឌលកុមារកំព្រានោះ។ ពីរឆ្នាំក្រោយមក ពួកគេក៏បានធ្វើដំណើរទៅកន្លែងនោះទៀត តែលើកនេះ មានការរួមដំណើរដោយគ្រួសារមួយចំនួន ដែលមានកូនរៀននៅសាលាជាមួយអេលីណា។ នៅពេលដែលអេលីណាមានអាយុ១៥ឆ្នាំ គាត់ និងឪពុករបស់គាត់ក៏បានធ្វើដំណើរទៅប្រទេសក្វាតាម៉ាឡាម្តងទៀត ដើម្បីធ្វើការបម្រើព្រះ។
ជួនកាល យើងគិតថា ក្តីស្រមៃ និងក្តីប្រាថ្នារបស់ក្មេងៗដែលនៅតូច មិនគួរឲ្យយើងយកចិត្តទុកដាក់ ដូចក្តីស្រមៃរបស់មនុស្សធំឡើយ។ ប៉ុន្តែ ព្រះគម្ពីរប៊ីបមិនបានបង្រៀនដូចនេះទេ។ ព្រះអម្ចាស់បានត្រាស់ហៅក្មេងៗឲ្យបម្រើព្រះអង្គ កាលពួកគេនៅក្មេងនៅឡើយ គឺដូចក្នុងរឿងហោរាសាំយូអែលជាដើម(១សាំយូអែល ៣:៤)។ ព្រះយេស៊ូវឲ្យតម្លៃមកលើជំនឿរបស់ក្មេងៗ(លូកា ១៨:១៦)។ ហើយសាវ័កប៉ុលក៏បានបង្រៀនផងដែរថា អ្នកជឿដែលនៅក្មេង មិនត្រូវបណ្តោយឲ្យអ្នកណាមើលងាយពួកគេ “ដោយព្រោះនៅក្មេងនោះឡើយ ចូរធ្វើជាគំរូដល់ពួកអ្នកជឿ ដោយពាក្យសំដី កិរិយាប្រព្រឹត្ត សេចក្តីស្រឡាញ់ សេចក្តីជំនឿ និងសេចក្តីបរិសុទ្ធ”(១ធីម៉ូថេ ៤:១២)។
ដូចនេះ ព្រះអង្គបានត្រាស់ហៅយើងឲ្យនាំក្មេងៗដែលស្ថិតក្រោមការថែរក្សារបស់យើង ឲ្យដើរផ្លូវត្រូវ(ចោទិយកថា ៦:៦-៧ និង សុភាសិត ២២:៦) ដោយទទួលស្គាល់ថា ជំនឿរបស់ពួកគេអាចធ្វើជាគំរូសម្រាប់យើងផងដែរ(ម៉ាថាយ ១៨:៣) ហើយដឹងថា ព្រះយេស៊ូវបានដាស់តឿនយើង មិនធ្វើឲ្យពួកគេរវាតចិត្តឡើយ(ម៉ាថាយ ១៨:៦)។
ពេលណាយើងមើលឃើញពន្លកនៃក្តីសង្ឃឹមរបស់កុមារលេចឡើង តួនាទីរបស់យើងជាមនុស្សធំ គឺត្រូវជួយពួកគេឲ្យលូតលាស់ខាងវិញ្ញាណ។ ហើយចូរយើងលើកទឹកចិត្តពួកគេ ឲ្យរស់នៅក្នុងជីវិត ដែលមានការប្ដេជ្ញាចិត្តថា នឹងទុកចិត្ត ហើយបម្រើព្រះអង្គ។—Dave Branon
តើអ្នកអាចលើកទឹកចិត្តក្មេងៗដូចម្តេចខ្លះ ដើម្បីឲ្យពួកគេទុកចិត្តព្រះយេស៊ូវ? តើអ្នកអាចជួយពួកគេឲ្យចម្រើនឡើង ក្នុងសេចក្តីជំនឿ ដោយរបៀបណា?
ឱព្រះវរបិតាដែលគង់នៅស្ថានសួគ៌ ក្មេងៗក្នុងលោកិយនេះ ត្រូវការព្រះអង្គ។ សូមព្រះអង្គជួយទូលបង្គំឲ្យលើកទឹកចិត្តពួកគេឲ្យជឿ និងស្រឡាញ់ព្រះអង្គ។
គម្រោងអានព្រះគម្ពីររយៈពេល១ឆ្នាំ: ទំនុកដំកើង ៦០-៦២ និង រ៉ូម ៥