មានលក្ខណៈកាន់តែដូចព្រះយេស៊ូវ
ដោយXochitl Dixon
August 26, 2024
យ៉ូហាន ១៧:៦-១៧
គេមិនមែនជារបស់ផងលោកីយ៍ ដូចជាទូលបង្គំក៏មិនមែនជារបស់លោកីយ៍ដែរ។ យ៉ូហាន ១៧:១៦
ព្រះទ្រង់បានបង្កើតសត្វទីទុយធំពណ៌ប្រផេះមក ឲ្យមានជំនាញបន្លំខ្លួន ដែលធ្វើឲ្យគេពិបាកមើលវាស្គាល់ក្នុងធម្មជាតិ។ ពួកវាមានរោមពណ៌ទឹកប្រាក់លាយប្រផេះឆ្លាស់គ្នា ដែលអនុញ្ញាតឲ្យពួកវាអាចបន្លំខ្លួន ជាមួយសម្បកឈើ ពេលណាពួកវាសម្ងំនៅលើដើមឈើ។ ពេលណាសត្វទីទុយប្រភេទនេះចង់បន្តលាក់ខ្លួនមិនឲ្យគេមើលឃើញពួកវា ពួកវាក៏បានបន្លំខ្លួននៅក្នុងបរិស្ថានជុំវិញ ដោយជំនួយពីរោមរបស់ពួកវា ដែលមានពណ៌ដូចសម្បកឈើ។
ជាញឹកញាប់ រាស្រ្តរបស់ព្រះមានលក្ខណៈដូចសត្វទីទុយប្រភេទនេះណាស់។ ទោះដោយចេតនា ឬដោយអចេតនាក្តីយើងអាចបន្លំខ្លួនយ៉ាងងាយស្រួល នៅក្នុងលោកិយ ដោយរស់នៅ និងមានអាកប្បកិរិយាដូចគេ ធ្វើឲ្យគេមើលមិនដឹងថា យើងជាអ្នកជឿព្រះគ្រីស្ទ។ ព្រះយេស៊ូវបានអធិស្ឋានឲ្យពួកសាវ័ករបស់ព្រះអង្គ ដែលព្រះវរបិតាបានប្រទានមកព្រះអង្គ ដោយរើសចេញពីលោកិយមក ឲ្យពួកគេស្តាប់បង្គាប់តាមព្រះបន្ទូលព្រះអង្គ(យ៉ូហាន ១៧:៦)។ ព្រះរាជបុត្រាបានទូលសូមព្រះវរបិតាការពារ និងប្រទានកម្លាំងឲ្យពួកគេរស់នៅ ក្នុងសេចក្តីបរិសុទ្ធ និងក្តីអំណរ ដោយការស៊ូទ្រាំនឹងទុក្ខលំបាក បន្ទាប់ពីព្រះអង្គយាងឡើងស្ថានសួគ៌វិញ(ខ.៧-១៣)។ គឺដូចដែលព្រះអង្គបានអធិស្ឋានថា “ទូលបង្គំមិនសូមឲ្យយកគេចេញពីលោកីយ៍ទេ គឺសូមឲ្យទ្រង់រក្សាគេ ឲ្យរួចពីសេចក្តីអាក្រក់វិញ”(ខ.១៥)។ ព្រះយេស៊ូវជ្រាបថា សាវ័ករបស់ព្រះអង្គត្រូវការសេចក្តីបរិសុទ្ធ និងការញែកចេញពីលោកិយ ដើម្បីឲ្យពួកគេអាចរស់នៅស្របតាមគោលបំណង ដែលព្រះអង្គបានចាត់ពួកគេឲ្យចេញទៅបំពេញ(ខ.១៦-១៩)។
ព្រះវិញ្ញាណបរិសុទ្ធអាចជួយយើង ឲ្យងាកចេញពីការល្បួងដែលនាំយើងបន្លំខ្លួនក្នុងលោកិយ ឬត្រាប់តាមលោកិយ។ ពេលណាយើងចុះចូលព្រះអង្គជារៀងរាល់ថ្ងៃ យើងអាចផ្លាស់ប្រែមានចរិតលក្ខណៈកាន់តែដូចព្រះយេស៊ូវ។ ខណៈពេលដែលយើងរស់នៅ ដោយការរួបរួម និងសេចក្តីស្រឡាញ់ អ្នកដទៃនឹងបានឃើញទីបន្ទាល់ល្អរបស់យើង ហើយព្រះអង្គនឹងនាំពួកគេចូលមករកព្រះគ្រីស្ទ នៅក្នុងសិរីល្អរបស់ព្រះអង្គ។—Xochitl Dixon
តើមានផ្នែកណាខ្លះក្នុងជីវិតអ្នក ដែលអ្នកអាចទូលសូមឲ្យព្រះអង្គកែប្រែ ដើម្បីឲ្យអ្នកមានលក្ខណៈកាន់តែដូចព្រះយេស៊ូវ? ដើម្បីនាំអ្នកចូលមកជិតព្រះអង្គ តើព្រះអម្ចាស់បានប្រើទីបន្ទាល់របស់អ្នកដទៃ ដែលបានរស់នៅ និងមានក្តីស្រឡាញ់ដូចព្រះយេស៊ូវយ៉ាងដូចម្តេចខ្លះ?
ឱព្រះវិញ្ញាណបរិសុទ្ធ សូមព្រះអង្គជួយទូលបង្គំ ឲ្យមានលក្ខណៈកាន់តែដូចព្រះយេស៊ូវ ដើម្បីនាំអ្នកដទៃឲ្យស្វែងរកព្រះពិតតែមួយ។
For further study, read Remade in the Image of Jesus at DiscoverySeries.org.
គម្រោងអានព្រះគម្ពីររយៈពេល១ឆ្នាំ: ទំនុកដំកើង ១២០-១២២ និង ១កូរិនថូស ៩