អេម៉ុស ២:៦-១៦
ចូរស្វែងរកសេចក្តីល្អ កុំរកសេចក្តីអាក្រក់ឡើយ ដើម្បីឲ្យឯងរាល់គ្នាបានរស់នៅ។ អេម៉ុស ៥:១៤
កាលលោករ៉ាយអិន(Ryan) ស្ថិតក្នុងវ័យជំទង់ គាត់បានបាត់បង់ម្តាយរបស់គាត់ ដោយសារជំងឺមហារីក។ គាត់ក៏បានក្លាយជាជនអនាថា ហើយមិនយូរប៉ុន្មានគាត់ក៏បានឈប់ទៅរៀន។ គាត់មានអារម្មណ៍ថាអស់សង្ឃឹម ហើយជាញឹកញាប់គាត់មិនមានអាហារបរិភោគទាល់តែសោះ។ ប៉ុន្មានឆ្នាំក្រោយមក លោករ៉ាយអិនក៏បានបង្កើតអង្គការមិនរកប្រាក់ចំណេញមួយ ដើម្បីជួយជនទុរគត ជាពិសេសក្មេងៗ ឲ្យពួកគេចេះដាំដុះ បង្កបង្កើនផល និងធ្វើម្ហូបដោយប្រើបន្លែដែលពួកគេបានដាំដុះ។ អង្គការនេះបានបង្កើតឡើង ដោយសារគាត់ជឿថា គ្មាននរណាម្នាក់ដែលត្រូវរស់នៅ ដោយគ្មានអាហារបរិភោគនោះឡើយ ហើយអ្នកដែលមានអាហារគួរតែចែកដល់អ្នកដែលគ្មាន។ ការយកចិត្តទុកដាក់ ដែលលោករ៉ាយអិនមានចំពោះអ្នកដទៃ បានឆ្លុះបញ្ចាំងអំពីដួងព្រះទ័យព្រះ ដែលសព្វព្រះទ័យនឹងប្រទានសេចក្តីយុត្តិធម៌ និងសេចក្តីមេត្តា ដល់មនុស្សទាំងអស់។
ព្រះទ្រង់យកព្រះទ័យទុកដាក់យ៉ាងជ្រាលជ្រៅ ចំពោះការឈឺចាប់ និងទុក្ខវេទនាដែលយើងជួបប្រទះ។ កាលព្រះអង្គទតឃើញអំពើអយុត្តិធម៌ដែលគួរឲ្យស្អប់ខ្ពើម កំពុងកើតមានក្នុងទឹកដីអ៊ីស្រាអែល ព្រះអង្គក៏បានចាត់ហោរាអេម៉ុស ឲ្យបកអាក្រាតភាពពុតត្បុតរបស់ពួកគេ។ កាលពីមុនព្រះអង្គបានរំដោះពួកគេ ជារាស្រ្តរបស់ព្រះអង្គ ឲ្យរួចផុតពីការជិះជាន់របស់សាសន៍អេស៊ីព្ទ តែនៅសម័យហោរាអេម៉ុស ពួកគេកំពុងលក់អ្នកជិតខាងខ្លួន ដូរយកស្បែកជើងមួយសម្រាប់(អេម៉ុស ២:៦)។ ពួកគេបានក្បត់មនុស្សស្លូតត្រង់ បដិសេធន៍មិនព្រមសម្រេចសេចក្តីយុត្តិធម៌ដល់មនុស្សដែលគេជិះជាន់ ហើយបានជាន់ឈ្លីពីលើក្បាលរបស់អ្នកក្រ(ខ.៦-៧) តែទន្ទឹមនឹងនោះ ពួកគេធ្វើពុតជាថ្វាយបង្គំព្រះ ដោយការថ្វាយដង្វាយ និងកាន់តាមថ្ងៃបរិសុទ្ធ(៤:៤-៥)។
លោកអេម៉ុសក៏បានអំពាវនាវដល់ពួកបណ្តាជនថា “ចូរស្វែងរកសេចក្តីល្អ កុំរកសេចក្តីអាក្រក់ឡើយ ដើម្បីឲ្យឯងរាល់គ្នាបានរស់នៅ យ៉ាងនោះព្រះយេហូវ៉ា ជាព្រះនៃពួកពលបរិវារ ទ្រង់នឹងគង់នៅជាមួយនឹងឯងជាពិតដូចឯងធ្លាប់ថាហើយ”(៥:១៤)។ យើងម្នាក់ៗសុទ្ធតែធ្លាប់ឆ្លងកាត់ការឈឺចាប់ និងភាពអយុត្តិធម៌ក្នុងជីវិត មិនខុសពីលោករ៉ាយអិនឡើយ គឺល្មមនឹងអាចឲ្យយើងយល់អំពីការលំបាករបស់អ្នកដទៃ ក៏ដូចជាជួយយកអសារពួកគេ។ ពេលនេះជាពេលដែលយើងត្រូវ “ស្វែងរកសេចក្តីល្អ” ហើយចូលរួមជាមួយព្រះអង្គ នៅក្នុងការសាបព្រោះសេចក្តីយុត្តិធម៌គ្រប់យ៉ាង។—Karen Pimpo
តើអ្នកបានឃើញអ្នកដទៃកំពុងទទួលរងអំពើអយុត្តិធម៌អ្វីខ្លះ ដែលធ្វើឲ្យអ្នកនឹកចាំអំពីអំពើអយុត្តិធម៌ដែលអ្នកធ្លាប់ជួប? តើព្រះអម្ចាស់អាចប្រើអ្នកជួយពួកគេដូចម្តេចខ្លះ?
ឱព្រះនៃសេចក្តីយុត្តិធម៌ ទូលបង្គំសូមអរព្រះគុណព្រះអង្គ ដែលមិនបានព្រងើយកន្តើយចំពោះការឈឺចាប់ ក្នុងលោកិយនេះ។
For further study, read Did Jesus Care about Justice? at DiscoverODB.org.
គម្រោងអានព្រះគម្ពីររយៈពេល១ឆ្នាំ: ទំនុកដំកើង ១២៦-១២៨ និង ១កូរិនថូស ១០:១៩-៣៣
