កន្លែងធ្វើការយកព្រះគ្រីស្ទជាធំ
ដោយSheridan Voysey
September 12, 2024
ម៉ាថាយ ៦:៩-១៣
សូមឲ្យព្រះហឫទ័យទ្រង់បានសំរេចនៅផែនដី ដូចនៅស្ថានសួគ៌ដែរ។ ម៉ាថាយ ៦:១០
រោងចក្រ ក្នុងប្រទេសអង់គ្លេស នៅសម័យក្សត្រីវិចតូរីយ៉ា គឺជាទីកន្លែងងងឹត។ អត្រានៃការស្លាប់របស់កម្មករ មានកំរិតខ្ពស់ ហើយពួកគេច្រើនតែរស់នៅក្នុងភាពក្រីក្រ។ លោកចច ខាដបឺរី(George Cadbury) ក៏បានចោទជាសំណួរថា“តើធ្វើដូចម្តេចឲ្យកម្មករទាំងឡាយ មានចិត្តចង់ធ្វើការងារ នៅពេលដែលផ្ទះរបស់ពួកគេស្ថិតនៅក្នុងតំបន់អនាធិបតេយ្យដូចនេះ?” ហេតុនេះហើយគាត់ក៏បានសង់រោងចក្រប្រភេទថ្មីមួយ សម្រាប់ក្រុមហ៊ុនស្ករសូកូឡារបស់គាត់ ដែលកំពុងមានការរីកដុះដាល គឺរោងចក្រដែលផ្តល់អត្ថប្រយោជន៍ដល់កម្មកររបស់គាត់។
ជាលទ្ធផល បុរីបូនវីលក៏បានចាប់កំណើតឡើង ជាភូមិមួយដែលមានផ្ទះជាង៣០ខ្នង មានកន្លែងលេងកីឡា សួនកុមារ សាលារៀន និងព្រះវិហារ សម្រាប់កម្មកររបស់លោកខាដបឺរី និងក្រុមគ្រួសាររបស់ពួកគេ។ ពួកគេទទួលបានប្រាក់ខែសមរម្យ ហើយទទួលបានការថែទាំសុខភាព ដែលទាំងអស់នេះបានកើតឡើង ដោយសារលោកខាដបឺរីមានជំនឿលើព្រះគ្រីស្ទ។
ព្រះយេស៊ូវបានបង្រៀនយើងឲ្យអធិស្ឋាន សូមឲ្យព្រះហឫទ័យព្រះបានសម្រេច “នៅផែនដី ដូចនៅស្ថានសួគ៌ដែរ” (ម៉ាថាយ ៦:១០)។ ការអធិស្ឋាននេះអាចជួយយើង ឲ្យនឹកស្រមៃចង់បានកន្លែងធ្វើការ ដែលមានលក្ខណៈយ៉ាងណាមួយ នៅក្រោមការគ្រប់គ្រងរបស់ព្រះ ដែលនៅកន្លែងនោះ យើងនឹងទទួលបាន “អាហារប្រចាំថ្ងៃ” ជាកម្រៃ ហើយ ព្រះអង្គអត់ទោសឲ្យយើង(ខ.១១-១២)។ បើសិនយើងជាចៅហ្វាយនាយ នោះគឺមានន័យថា យើងត្រូវផ្តល់ឲ្យបុគ្គលិកយើងនូវប្រាក់កំរៃដែលសមរម្យ(៤:១)។ ប៉ុន្តែ ទោះយើងមានតួនាទីអ្វីក៏ដោយ ទោះយើងមានប្រាក់ខែ ឬធ្វើការស្ម័គ្រចិត្តក្តី យើងរាល់គ្នាសុទ្ធតែត្រូវយកចិត្តទុកដាក់ ចំពោះសុខុមាលភាពរបស់មនុស្ស ដែលយើងកំពុងធ្វើការជាមួយ ក្នុងការងារបម្រើព្រះ។
ចូរយើងនឹកស្រមៃចង់បានផ្លាស់ប្តូរ ដូចលោកចច ខាដបឺរីផងដែរ បើសិនជាយើងថ្វាយតំបន់ដែលយើងរស់នៅ និងកន្លែងធ្វើការ ឲ្យព្រះអង្គគ្រប់គ្រង។ ព្រោះពេលណាគេអនុញ្ញាតឲ្យព្រះអង្គគ្រប់គ្រង មនុស្សទាំងឡាយនឹងមានការចម្រើនឡើងមិនខាន។—Sheridan Voysey
តើកន្លែងធ្វើការរបស់អ្នក ឬតំបន់ដែលអ្នករស់នៅ នឹងមានលក្ខណៈដូចម្តេច នៅក្រោមការគ្រប់គ្រងរបស់ព្រះអង្គ? តើអ្នកអធិស្ឋានទូលដូចម្តេចខ្លះ ដើម្បីឲ្យចក្ខុវិស័យនេះក្លាយជាការពិត?
ឱព្រះនៃសេចក្តីស្រឡាញ់ សូមព្រះអង្គជួយទូលបង្គំ ឲ្យមានចក្ខុវិស័យចង់មើលឃើញការផ្លាស់ប្តូរ ដែលកន្លែងធ្វើការ និងតំបន់ដែលទូលបង្គំរស់នៅ មានលក្ខណៈដូចម្តេចខ្លះ នៅក្រោមការគ្រប់គ្រងរបស់ព្រះអង្គ ហើយសូមប្រទានកម្លាំងទូលបង្គំ ដើម្បីនាំមកនូវការផ្លាស់ប្តូរនោះ។
គម្រោងអានព្រះគម្ពីររយៈពេល១ឆ្នាំ : សុភាសិត ១៦-១៨ និង ២កូរិនថូស ៦