រកឃើញក្តីអំណរ ដោយប្រាជ្ញា
ដោយPatricia Raybon
September 18, 2024
ទំនុកដំកើង ១៦
នៅចំពោះទ្រង់មានសេចក្តីអំណរដ៏ពោរពេញ។ ទំនុកដំកើង ១៦:១១
លោក ចេសិន ភ័រសូហ្វ(Jason Persoff) បានបម្រើការជាវេជ្ជបណ្ឌិត នៅបន្ទប់សង្គ្រោះបន្ទាន់ ក្នុងមន្ទីរពេទ្យធំមួយកន្លែង ដែលមានការប្តូរផ្តាច់ នៅក្នុងការសង្គ្រោះអ្នកជំងឺកូវីដ១៩។ មានពេលមួយ គាត់យល់ឃើញថា ជំងឺនេះកំពុងតែមានជោគជ័យ នៅក្នុងការរាតត្បាត ទូទាំងពិភពលោក។ តែគាត់នៅតែប្រឹងប្រែងអស់ពីលទ្ធភាព ក្នុងការព្យាបាលអ្នកជំងឺកូវីឌ។ ក្នុងអំឡុងម៉ោងសម្រាក គាត់ក៏បានបន្ធូរអារម្មណ៍ ដោយថតរូបគ្រាប់ព្រឹលដ៏តូចល្អិត ដោយពង្រីករូបគ្រាប់ព្រឹលនីមួយៗមើល។ គាត់ក៏បានលាន់មាត់ថា វាពិតជាប្លែក និងគួរឲ្យភ្ញាក់ផ្អើលណាស់។ ប៉ុន្តែ ការស្វែងរកក្តីអំណរ នៅក្នុងវត្ថុដ៏តូចល្អិត ដែលមានភាពស្រស់ស្អាត គឺជាឱកាស ដើម្បីប្រកបស្និទ្ធស្នាលជាមួយព្រះអាទិករ ហើយក៏ដើម្បីមើលឃើញលោកិយ តាមរបៀបដែលមនុស្សតិចតួចបានចំណាយពេលកត់សំគាល់។
លោកវេជ្ជបណ្ឌិតក៏បានមានប្រសាសន៍ថា “ការស្វែងរកភាពសប្បាយរីករាយ តាមរបៀបដ៏ឆ្លាតវៃដូចនេះ ដើម្បីកាត់បន្ថយស្រ្តេស និងបង្កើតភាពរឹងមាំ ពិតជាមានតម្លៃយ៉ាងខ្លាំង នៅក្នុងវិជ្ជាជីវៈរបស់ពេទ្យ។ ប៉ុន្តែ គាត់បានឲ្យយោបល់ដល់មនុស្សជាទូទៅថា “អ្នកត្រូវតែដកដង្ហើម។ អ្នកត្រូវតែស្វែងរកវិធីសម្រាកលម្ហែ និងអរសប្បាយនឹងជីវិត”។
ស្តេចដាវីឌដែលជាអ្នកនិពន្ធបទគម្ពីរទំនុកដំកើង ក៏បានបង្ហាញការយល់ឃើញដូចនេះ ក្នុងបទគម្ពីរទំនុកដំកើង ជំពូក១៦ ខណៈពេលដែលទ្រង់ប្រកាស អំពីប្រាជ្ញានៃការរកឃើញក្តីអំណរ ក្នុងព្រះ។ គឺដូចដែលទ្រង់បន្លឺសម្លេងសរសើរព្រះអម្ចាស់ថា “ព្រះយេហូវ៉ាទ្រង់ជាចំណែកនៃមរដក ហើយជាចំណែកក្នុងពែងរបស់ទូលបង្គំ។ ហេតុនោះចិត្តទូលបង្គំអរសប្បាយ ហើយកិត្តិយសនៃទូលបង្គំបានរីករាយឡើង រូបសាច់នៃទូលបង្គំក៏នឹងនៅដោយសាន្តត្រាណដែរ”(ខ.៥,៩)។
មនុស្សបានធ្វើនូវរឿងល្ងង់ខ្លៅជាច្រើន ដើម្បីការព្យាយាមបំបាត់ទុក្ខព្រួយ។ វេជ្ជបណ្ឌិត ចេសិន បានរកឃើញផ្លូវប្រកបដោយប្រាជ្ញា ដែលចង្អុលបង្ហាញគាត់ ឲ្យងាកទៅរកព្រះអាទិករ ដែលបានប្រទានយើងនូវក្តីអំណរ នៃព្រះវត្តមានព្រះអង្គ។ គឺដូចដែលស្តេចដាវីឌបានពោលសរសើរព្រះអម្ចាស់ថា “ទ្រង់នឹងបង្ហាញឲ្យទូលបង្គំឃើញផ្លូវជីវិតវិញ នៅចំពោះទ្រង់មានសេចក្តីអំណរដ៏ពោរពេញ នៅព្រះហស្តស្តាំទ្រង់មានសេចក្តីអរសប្បាយ ជាដរាបតទៅ”(ខ.១១)។ ក្នុងព្រះអង្គ យើងរកឃើញក្តីអំណរកាន់តែច្រើនឡើង ជារៀងរាល់ថ្ងៃ។—Patricia Raybon
តើព្រះអម្ចាស់បានប្រទានពរជីវិតអ្នក តាមរយៈការរកឃើញក្តីអំណរ តាមផ្លូវនៃប្រាជ្ញា ដូចម្តេចខ្លះ? នៅពេលដែលអ្នកអានបទគម្ពីរ ទំនុកដំកើង ជំពូក១៦ តើបទគម្ពីរនេះបានបណ្តាលចិត្តអ្នកស្វែងរកក្តីអំណរក្នុងព្រះអង្គ តាមរយៈផ្លូវនៃប្រាជ្ញាដូចម្តេចខ្លះ?
ឱព្រះអម្ចាស់ ក្នុងដំណើរជីវិតរបស់ទូលបង្គំ សូមព្រះអង្គប្រទានពរទូលបង្គំ ឲ្យស្វែងរកក្តីអំណរ ដោយប្រាជ្ញា នៅក្នុងព្រះអង្គ។
គម្រោងអានព្រះគម្ពីររយៈពេល១ឆ្នាំ : សាស្តា ១-៣ និង ២កូរិនថូស ១១:១៦-៣៣