ការអស្ចារ្យតូចៗ
ដោយElisa Morgan
September 30, 2024
សាការី ៤:៦-១០
ដ្បិតតើអ្នកណាបានមើលងាយក្នុងថ្ងៃនៃការបន្តិចបន្តួចនោះ? សាការី ៤:១០
ក្នុងកម្មវិធីជួបជុំមួយ មុនថ្ងៃមង្គលការរបស់ខ្ញុំមកដល់ លោកដេវ(Dave) ជាមិត្តភក្តិរបស់យើងដែលអៀនខ្មាសច្រើន កំពុងឈរនៅកៀនជ្រុងផ្ទះ កាន់វត្ថុមូលទ្រវែងដែលមានក្រដាសវេចខ្ចប់ពីខាងក្រៅ។ នៅពេលគាត់ដល់វេនយកអំណោយរបស់គាត់មកជូនយើង គាត់ក៏បានកាន់វត្ថុនោះដើរមករកយើង។ ខ្ញុំនិងស្វាមីរបស់ខ្ញុំក៏បានបើកមើលអំណោយក្នុងកញ្ចប់ក្រដាសនោះ ហើយក៏បានឃើញបន្ទះឈើមួយសន្លឹក មានរាងមូលទ្រវែង ដែលចេញក្រយៅឈើដ៏ស្រស់ស្អាត ហើយមានអក្សរឆ្លាក់ដោយដៃពីលើថា “រឿងតូចមួយដែលព្រះអង្គធ្វើ គឺជាការអស្ចារ្យ”។ យើងក៏បានយកផ្លាកមួយនេះព្យួរនៅលើជញ្ជាំងផ្ទះយើងជាង៤៥ឆ្នាំហើយ ដោយវាបានរំឭកយើងម្តងហើយម្តងទៀតថា ព្រះអម្ចាស់នៅតែធ្វើការ នៅក្នុងរឿងតូចៗ ដែលមានដូចជា ការបង់ថ្លៃទឹកភ្លើង ការផ្គត់ផ្គង់អាហារប្រចាំថ្ងៃ និងការប្រោសឲ្យជាពីជម្ងឺផ្តាសសាយជាដើម។ រឿងតូចៗទាំងនេះ សរុបចូលគ្នាមក បង្កើតបានជាកំណត់ត្រាដែលគួរឲ្យស្ញប់ស្ញែង នៃការផ្គត់ផ្គង់របស់ព្រះអង្គ។
មានពេលមួយ លោកសេរ៉ូបាបិល ជាអភិបាលនៃទឹកដីយូដា បានទទួលព្រះរាជសារស្រដៀងនេះផងដែរ ពីព្រះអម្ចាស់ តាមរយៈហោរាសាការី ទាក់ទងនឹងការកសាងទីក្រុងយេរូសាឡិម និងព្រះវិហារឡើងវិញ។ បន្ទាប់ពីសាសន៍យូដាបានវិលត្រឡប់ពីការនិរទេស មកទីក្រុងយេរូសាឡិមវិញ រដូវកាលនៃភាពយឺតយ៉ាវក្នុងការសាងសង់ក៏បានចាប់ផ្តើម ហើយពួកគេមានការបាក់ទឹកចិត្ត។ ព្រះអម្ចាស់ក៏មានបន្ទូលប្រកាសថា “តើអ្នកណាបានមើលងាយក្នុងថ្ងៃនៃការបន្តិចបន្តួចនោះ?”(សាការី ៤:១០)។ ព្រះអង្គបានសម្រេចបំណងព្រះទ័យរបស់ព្រះអង្គ តាមរយៈយើង ហើយទោះយើងមានចំណុចខ្វះខាតយ៉ាងណាក៏ដោយ។ ព្រះអម្ចាស់ដ៏មានគ្រប់ចេស្តាបានមានបន្ទូលថា ព្រះអង្គសម្រេចបំណងព្រះទ័យមិនមែនដោយឥទ្ធិឫទ្ធិ ឬដោយអំណាចទេ គឺដោយសារវិញ្ញាណរបស់ព្រះអង្គវិញ(ខ.៦)។
ពេលណាយើងមានអារម្មណ៍បាក់ទឹកចិត្ត ដោយសារយើងមើលឃើញព្រះអម្ចាស់ ធ្វើតែកិច្ចការតូចៗនៅក្នុងយើង និងនៅជុំវិញយើង ចូរយើងចាំថា រឿងតូចៗដែលព្រះអង្គធ្វើ គឺជាការអស្ចារ្យ។ ព្រះអង្គប្រើរឿងតូចៗ ដើម្បីសម្រេចបំណងព្រះទ័យដ៏ធំប្រសើរ។—Elisa Morgan
តើអ្នកបានឃើញព្រះធ្វើការអស្ចារ្យតូចៗ ក្នុងជីវិតអ្នក នៅកន្លែងណាខ្លះ? តើព្រះអង្គបានប្រើរឿងតូចៗ ដើម្បីបំពេញតម្រូវការអ្នក និងមនុស្សនៅជុំវិញអ្នក យ៉ាងដូចម្តេចខ្លះ?
ឱព្រះអម្ចាស់ ទូលបង្គំសូមអរព្រះគុណ សម្រាប់ការធ្វើការតូចៗ ក្នុងជីវិតទូលបង្គំ។ សូមព្រះអង្គជួយទូលបង្គំ ឲ្យកត់សំគាល់កិច្ចការទាំងអស់ ដែលព្រះអង្គធ្វើ!
គម្រោងអានព្រះគម្ពីររយៈពេល១ឆ្នាំ: អេសាយ ៩-១០ និង អេភេសូរ ៣