រត់ប្រណាំងថ្វាយព្រះយេស៊ូវ
ដោយDave Branon
October 7, 2024
ទីតុស ២:១-៥
ឯមនុស្សសុចរិត គេនឹងលូតលាស់ឡើង ដូចជាដើមលម៉ើ ... កាលណាចាស់ហើយ នោះគេនឹងនៅតែកើតផល។ ទំនុកដំកើង ៩២:១២-១៤
នៅពេលណាគេគិត អំពីការរត់ប្រណាំង ចម្ងាយ១០០ម៉ែត្រ ភាគច្រើនគេប្រហែលនឹកឃើញលោក យូសិន បុល(Usain Bolt) ដែលជាម្ចាស់ឯកត្តកម្មពិភពលោក ក្នុងការរត់ប្រណាំងប្រភេទនេះ ក្នុងពេលបច្ចុប្បន្ន។ ប៉ុន្តែ យើងមិនអាចភ្លេច អ្នកស្រី ជូលា ហឺរីខេន ហកឃិន(Julia “Hurricane” Hawkins) បានទេ។ កាលពីឆ្នាំ២០២១ អ្នកស្រីជូលា បានរត់ទៅដល់ទីផ្តាច់ព្រាត់មុន កីឡាកររត់ប្រណាំងផ្សេងទៀត ដោយបានឈ្នះការរត់ប្រណាំងចម្ងាយ១០០ម៉ែត្រ ក្នុងការប្រកួតកីឡាសម្រាប់មនុស្សចាស់ នៅរដ្ឋលូវីស៊ីអាណា។ គាត់បានរត់យឺតជាងលោកបុល ដែលបានចំណាយតែ ៩.៥៨ វិនាទី ក្នុងការរត់ទៅដល់ទី ខណៈពេលដែលគាត់ចំណាយពេល៦០វិនាទី ប៉ុន្តែ គាត់មានអាយុ១០៥ឆ្នាំហើយ។
គេមានរឿងជាច្រើនដែលត្រូវជជែកគ្នា អំពីស្រ្តីដែលនៅតែបន្តរត់ប្រណាំងចម្ងាយខ្លី ក្នុងវ័យចំណាស់ដូចនេះ។ ហើយគេក៏មានរឿងជាច្រើនដែលត្រូវជជែកគ្នា អំពីអ្នកជឿព្រះយេស៊ូវ ដែលនៅតែបន្តរត់ប្រណាំង ដោយមានព្រះអង្គជាគោលដៅរបស់ពួកគេ ទោះពួកគេស្ថិតក្នុងវ័យចាស់យ៉ាងណាក៏ដោយ(ហេព្រើរ ១២:១-២)។ អ្នកនិពន្ធបទគម្ពីរទំនុកដំកើងក៏បានពិពណ៌នា អំពីពួកស្មោះត្រង់ ក្នុងវ័យចំណាស់យ៉ាងដូចនេះថា “ឯមនុស្សសុចរិត គេនឹងលូតលាស់ឡើង ដូចជាដើមលម៉ើ ... កាលណាចាស់ហើយ នោះគេនឹងនៅតែកើតផល”(៩២:១២-១៤)។
អ្នកជឿមានវ័យចាស់ ដែលដើរតាមខ្នាតគំរូនេះ អាចរកឃើញការបង្រៀនជាបន្ថែមទៀត ក្នុងសំបុត្រដែលសាវ័កប៉ុលបានសរសេរផ្ញើទៅលោកទីតុស។ គឺដូចដែលគាត់បានបង្រៀនថា “ត្រូវទូន្មានឲ្យពួកចាស់ៗ ដឹងខ្នាត មានចិត្តនឹងធឹង ហើយធ្ងន់ធ្ងរ ឲ្យមានសេចក្តីជំនឿ សេចក្តីស្រឡាញ់ និងសេចក្តីខ្ជាប់ខ្ជួនដ៏ត្រឹមត្រូវផង”(២:២) ឲ្យពួកស្ត្រីចាស់ៗ “ត្រូវខំបង្រៀនសេចក្តីត្រឹមត្រូវវិញ”(ខ.៣)។
ព្រះអម្ចាស់មិនដែលបានប្រាប់អ្នកជឿមានវ័យចាស់ ឲ្យឈប់រត់ប្រណាំងនោះទេ។ យើងប្រហែលមិនអាចរត់ប្រណាំងក្នុងវ័យចាស់ដូចអ្នកស្រីជូលាទេ តែទោះយើងស្ថិតក្នុងវ័យណាក៏ដោយ យើងត្រូវតែបន្តការរត់ប្រណាំងខាងវិញ្ញាណ ដែលថ្វាយព្រះកិត្តិនាមដល់ព្រះ ខណៈពេលដែលព្រះអង្គប្រទានកម្លាំង ដែលយើងត្រូវការ។ ចូរយើងទាំងអស់គ្នារត់ប្រណាំង ដើម្បីបម្រើព្រះអង្គ និងអ្នកដទៃឲ្យបានល្អ។—Dave Branon
តើមានការអ្វីខ្លះ ដែលអ្នកអាចធ្វើ ដើម្បីឈោងចាប់អ្នកដទៃ ថ្វាយព្រះគ្រីស្ទ និងជួយពួកគេឲ្យចម្រើនឡើង ក្នុងជំនឿ?
តើអ្នកអាចលើកទឹកចិត្តអ្នកជឿដទៃ ឲ្យបម្រើព្រះ តាមឱកាសដែលព្រះអង្គប្រទានដូចម្តេចខ្លះ?
ឱព្រះយេស៊ូវ ទូលបង្គំសូមអរព្រះគុណព្រះអង្គដែលបានប្រទានជីវិតឲ្យទូលបង្គំរស់នៅ ជារៀងរាល់ថ្ងៃ។
ទោះទូលបង្គំស្ថិតក្នុងវ័យណាក៏ដោយ សូមព្រះអង្គជួយទូលបង្គំឲ្យព្យាយាមរត់ប្រណាំង ដើម្បីថ្វាយសិរីល្អដល់ព្រះអង្គ។
គម្រោងអានព្រះគម្ពីររយៈពេល១ឆ្នាំ: អេសាយ ៣០-៣១ និង ភីលីព ៤