មេរៀនអំពីការអត់ធ្មត់
ដោយMike Wittmer
October 8, 2024
យ៉ាកុប ១:២-១២
ចូរទុកឲ្យសេចក្តីខ្ជាប់ខ្ជួននោះ បានធ្វើការឲ្យសំរេចពេញលេញចុះ ដើម្បីឲ្យអ្នករាល់គ្នាបានគ្រប់លក្ខណ៍ ហើយពេញខ្នាតឥតខ្វះអ្វីឡើយ។ យ៉ាកុប ១:៤
លោកបប់ សាឡិម(Bob Salem) បានបំបែកឯកត្តកម្ម ក្នុងការរុញសណ្ដែកដីមួយគ្រាប់ ឡើងទៅលើកំពូលភ្នំផៃ ក្នុងល្បឿនលឿនជាងគេ ដោយប្រើស្លាបព្រាបំពាក់ពីលើមុខរបស់គាត់។ គាត់បានសម្រេចទៅដល់គោលដៅរបស់គាត់ ក្នុងរយៈពេល៧ថ្ងៃ ដោយរុញសណ្ដែកដីឡើងភ្នំនោះ តែនៅពេលយប់ប៉ុណ្ណោះ ដើម្បីជៀសវាងការរំខានពីភ្ញៀវទេសចរណ៍ ដែលមកកម្សាន្តនៅភ្នំនោះ។ លោកបប់ ជាមនុស្សទីបួន ដែលបានសម្រេចកិច្ចការដ៏ពិបាកនេះ បានសេចក្តីថា មានមនុស្សដែលមានចិត្តអត់ធ្មត់៣នាក់ទៀត ដែលបានធ្វើដូចគាត់ដែរ។
យើងប្រហែលជាចង់និយាយថា ពួកគេបានប្រើភាពអត់ធ្មត់របស់ខ្លួន នៅក្នុងការធ្វើបាបខ្លួនឯង ប៉ុន្តែ ជាញឹកញាប់ នៅក្នុងការរស់នៅ យើងមិនចាំបាច់ត្រូវប្រើភាពអត់ធ្មត់ យ៉ាងដូចនេះទេ។ យើងត្រូវការភាពអត់ធ្មត់។ ភាពអត់ធ្មត់ជាផលផ្លែនៃព្រះវិញ្ញាណ(កាឡាទី ៥:២២) និងជាគុណធម៌ដ៏ចាំបាច់ ដើម្បីឲ្យយើងអាច “បានគ្រប់លក្ខណ៍ ហើយពេញខ្នាតឥតខ្វះអ្វីឡើយ”(យ៉ាកុប ១:៤)។ ពេលដែលបញ្ហាមកដល់ មនុស្សអត់ធ្មត់នៅតែមានភាពនឹងធឹង ខណៈពេលដែលអ្នកដទៃកំពុងមានភាពតក់ស្លុត។ ពួកគេក៏ចង់ឲ្យស្ថានការណ៍ មានការផ្លាស់ប្តូរផងដែរ ប៉ុន្តែ ពួកគេមិនបានពឹងផ្អែកលើការផ្លាស់ប្តូរនោះឡើយ។ ពួកគេបន្តដំណើរទៅមុខទៀតយ៉ាងខ្ជាប់ខ្ជួន ដោយទុកចិត្តលើប្រាជ្ញារបស់ព្រះ ដើម្បីឲ្យពួកគេសម្រេចកិច្ចការដោយភាពឆ្លាតវៃ(ខ.៥)។
បញ្ហានៃភាពអត់ធ្មត់ស្ថិតនៅត្រង់ថា មានវិធីតែមួយប៉ុណ្ណោះ សម្រាប់ឲ្យយើងរៀនសូត្រអំពីភាពអត់ធ្មត់។ កណ្ឌគម្ពីរយ៉ាកុបបានចែងថា “ការល្បងលមើលសេចក្តីជំនឿនៃអ្នករាល់គ្នា នោះនាំបង្កើតឲ្យមានសេចក្តីខ្ជាប់ខ្ជួន”(ខ.៣)។ ការល្បងលនោះអាចជាបញ្ហាធំ ឬបញ្ហាតូច ដែលយើងជួបប្រទះ។ ខ្ញុំកំពុងសរសេរអត្ថបទនេះ នៅអាកាសយានដ្ឋាន នៅម៉ោង១១យប់ ខណៈពេលដែលជើងហោះហើរបានពន្យារពេលដល់ម៉ោង២រំលងអាធ្រាត្រ បន្ទាប់មក ក៏ត្រូវបានគេលប់ចោល។ បន្ទាប់ពីខ្ញុំមិនបានគេងលក់ពេញមួយយប់ ខ្ញុំក៏បានទិញកាហ្វេញាំ ដោយសង្ឃឹមថា នឹងបានធ្វើដំណើរដល់ផ្ទះ ដោយមិនងោកងុយ។ ខ្ញុំមិនចូលចិត្តខ្ជះខ្ជាយពេលវេលា ពេញមួយថ្ងៃ នៅអាកាសយានដ្ឋាននោះទេ ប៉ុន្តែ ព្រះវរបិតានៃខ្ញុំដែលមានក្តីស្រឡាញ់ កំពុងបង្រៀនខ្ញុំឲ្យចេះអត់ធ្មត់។
ខ្ញុំបានអធិស្ឋានសូមឲ្យរឿងនេះឆាប់ចប់ នៅថ្ងៃនោះ ប៉ុន្តែ ព្រះអង្គក៏បានបណ្តាលចិត្តខ្ញុំឲ្យបន្តអត់ធ្មត់ ក្នុងការរង់ចាំជើងហោះហើរបន្ទាប់។—Mike Wittmer
តើធ្វើដូចម្តេចឲ្យអ្នកអាចមានចិត្តអត់ធ្មត់? ហេតុអ្វីគុណធម៌មួយនេះ មានសារៈសំខាន់យ៉ាងនេះ?
ឱព្រះវរបិតា សូមព្រះអង្គជួយទូលបង្គំឲ្យរៀនអត់ធ្មត់ ខណៈពេលដែលទូលបង្គំតោងឲ្យជាប់ព្រះអង្គ និងព្រះបន្ទូលសន្យារបស់ព្រះអង្គ។
គម្រោងអានព្រះគម្ពីររយៈពេល១ឆ្នាំ: អេសាយ ៣២-៣៣ និង កូល៉ុស ១