សេចក្តីស្រឡាញ់ដែលគ្មានព្រំដែន
ដោយJames Banks
October 10, 2024
ទំនុកដំកើង ១០៣:៨-១៧
សេចក្តីសប្បុរសរបស់ទ្រង់ក៏ធំច្រើនប៉ុណ្ណោះ ចំពោះអស់អ្នកដែលកោតខ្លាចដល់ទ្រង់។ ទំនុកដំកើង ១០៣:១១
នៅថ្ងៃខួបអាពាហ៍ពិពាហ៍របស់អ្នកស្រីធែររី(Terry) គាត់បាននិយាយថា “ព្រះអម្ចាស់ល្អចំពោះពួកខ្ញុំណាស់! ខ្ញុំចង់អរព្រះគុណព្រះអង្គ ដែលប្រទានពរឲ្យយើងបានរស់នៅជាប្តីប្រពន្ធមួយឆ្នាំទៀត”។ ពេលនោះ ទឹកភ្នែកដែលគាត់បានសម្រក់នៅពេលគាត់និយាយ គឺបានបង្ហាញថា គាត់កំពុងតែនិយាយចេញពីចិត្ត។ ក្រុមតូចរបស់យើងមានការប៉ះពាល់ចិត្តយ៉ាងខ្លាំង។ យើងដឹងថា រយៈពេលប៉ុន្មានឆ្នាំកន្លងមកនេះ អ្នកស្រីធែររី និងស្វាមីរបស់គាត់បានជួបការលំបាកប៉ុណ្ណា។ លោករ៉ូបឺត(Robert) ស្រាប់តែមានជំងឺវិកលចរិត ហើយក៏បានសម្លាប់កូនស្រីខ្លួនឯង អាយុ៤ឆ្នាំ។ គាត់ត្រូវរស់នៅក្នុងមន្ទីរព្យាបាលអ្នកជំងឺវិកលចរិតអស់រយៈពេលជាច្រើនទសវត្សរ៍ ប៉ុន្តែ អ្នកស្រីធែររីនៅតែទៅសួរសុខទុក្ខគាត់ ហើយព្រះអម្ចាស់ក៏បានធ្វើការប្រោសឲ្យជា ដោយជួយអ្នកស្រីធែររីឲ្យអត់ឱនទោសឲ្យស្វាមីខ្លួន។ ទោះពួកគេមានការឈឺចាប់ខ្លាំងប៉ុណ្ណាក៏ដោយ ក៏ពួកគេនៅតែស្រឡាញ់គ្នាកាន់តែខ្លាំងឡើង។
សេចក្តីស្រឡាញ់ និងការអត់ទោសយ៉ាងដូចនេះ អាចកើតចេញពីប្រភពមួយប៉ុណ្ណោះ។ ស្តេចដាវីឌបានពិពណ៌នា អំពីព្រះអម្ចាស់ យ៉ាងដូចនេះថា “ទ្រង់មិនបានប្រព្រឹត្តនឹងយើង តាមអំពើបាបរបស់យើងទេ ... ឯទិសខាងកើតនៅឆ្ងាយពីទិសខាងលិចយ៉ាងណា ទ្រង់បានដកយកអស់ទាំងការល្មើសនៃយើង ឲ្យឃ្លាតឆ្ងាយពីយើងយ៉ាងនោះដែរ”(ទំនុកដំកើង ១០៣:១០,១២)។
ព្រះអម្ចាស់បានបង្ហាញសេចក្តីមេត្តាដល់យើង តាមរយៈសេចក្តីស្រឡាញ់ដ៏មានតម្លៃរបស់ព្រះអង្គ គឺដូចមានសេចក្តីចែងថា “ដ្បិតដែលផ្ទៃមេឃខ្ពស់ជាងផែនដីច្រើនប៉ុណ្ណា សេចក្តីសប្បុរសរបស់ទ្រង់ក៏ធំច្រើនប៉ុណ្ណោះ ចំពោះអស់អ្នកដែលកោតខ្លាចដល់ទ្រង់”(ខ.១១)។ សេចក្តីស្រឡាញ់ដ៏ធំប្រសើររបស់ព្រះអម្ចាស់ បានបណ្តាលព្រះទ័យព្រះអង្គ ឲ្យយាងចុះមកយកកំណើតជាមនុស្ស ហើយសុគតនៅលើឈើឆ្កាង ដើម្បីលោះបាបយើង ដើម្បីឲ្យព្រះអង្គអាចនាំមនុស្សទាំងអស់ដែល “ទទួលជឿព្រះអង្គ”(យ៉ូហាន ១:១២) ឲ្យបានទៅរស់នៅជាមួយព្រះអង្គ។
អ្នកស្រីធែររីបាននិយាយត្រូវ។ ព្រោះអម្ចាស់ពិតជាល្អចំពោះយើងណាស់! សេចក្តីស្រឡាញ់ និងការអត់ទោសរបស់ព្រះអង្គ មានភាពធំធេងគ្មានព្រំដែន ហើយក៏បាននាំឲ្យយើងមានជីវិត ដែលមិនចេះចប់។—James Banks
តើព្រះអម្ចាស់បានបង្ហាញសេចក្តីមេត្តាដល់អ្នកយ៉ាងដូចម្តេចខ្លះ បន្ទាប់ពីអ្នកបានប្រព្រឹត្តខុស?
តើអ្នកអាចឆ្លើយតប ចំពោះសេចក្តីមេត្តា និងសេចក្តីស្រឡាញ់របស់ព្រះអង្គ នៅថ្ងៃនេះ ដោយរបៀបណា?
ឱព្រះដែលមានសេចក្តីមេត្តា សូមព្រះអង្គជួយទូលបង្គំឲ្យអរសប្បាយ និងបានចម្រើនឡើង ក្នុងសេចក្តីស្រឡាញ់របស់ព្រះអង្គ។
សូមព្រះអង្គបានបង្ហាញសេចក្តីស្រឡាញ់តាមរយៈទូលបង្គំ ដើម្បីឲ្យអ្នកដទៃ បានស្គាល់សេចក្តីស្រឡាញ់ដ៏អស្ចារ្យរបស់ព្រះអង្គផងដែរ។
គម្រោងអានព្រះគម្ពីររយៈពេល១ឆ្នាំ: អេសាយ ៣៤-៣៦ និង កូល៉ុស ២