ភីលីព ៤:៤-៩
កុំឲ្យខ្វល់ខ្វាយអ្វីឡើយ ចូរទូលដល់ព្រះ ឲ្យជ្រាបពីសេចក្តីសំណូមរបស់អ្នករាល់គ្នាក្នុងគ្រប់ការទាំងអស់ ដោយសេចក្តីអធិស្ឋាន និងពាក្យទូលអង្វរ ទាំងពោលពាក្យអរព្រះគុណផង។ ភីលីព ៤:៦
អ្នកព្យាករណ៍ឧតុនិយមម្នាក់ នៅរដ្ឋមីស៊ីស៊ីពី មានឈ្មោះល្បីនៅតាមបណ្ដាញអ៊ីនធឺណិត ដោយសារគាត់និយាយចេញនូវពាក្យដ៏សាមញ្ញតែ៦ម៉ាត់ ក្នុងអំឡុងពេលដែលគាត់ឡើងអានព័ត៌មាន អំពីការព្យាករណ៍ធាតុអាកាស នៅថ្ងៃទី២៤ ខែមីនា ឆ្នាំ២០២៣។ លោកម៉ាត លួបហាន(Matt Laubhan) កំពុងតាមដានខ្យល់ព្យុះធំមួយ ហើយក៏បានដឹងថា មានខ្យល់កួចយក្សថូនេដូធំមួយហៀបនឹងបោះពួយទៅរកទីក្រុងអាម៉ូរី។ នៅពេលដែលលោកលួបហានកំពុងអានព័ត៌មាន ដែលកំពុងផ្សាយផ្ទាល់នៅលើកញ្ចក់ទូរទស្សន៍ គាត់ក៏បានឈប់បង្អង់សិន ដើម្បីបន្លឺសម្លេងអធិស្ឋានថា “ឱព្រះយេស៊ូវ សូមព្រះអង្គជួយពួកគេផង។ អាម៉ែន។” ទស្សនិកជននៅទូទាំងពិភពលោកក៏បានស្តាប់ឮសម្លេងគាត់អធិស្ឋាន នៅថ្ងៃនោះ។ ក្រោយមក ទស្សនិកជនខ្លះបាននិយាយថា ពាក្យដែលគាត់បានអធិស្ឋាននោះ បានជំរុញពួកគេឲ្យស្វែងរកកន្លែងសុវត្ថិភាព។ ការអធិស្ឋានដែលគាត់បានធ្វើឡើង ដោយអស់ពីចិត្តនៅពេលនោះ ប្រហែលជាបានជួយមនុស្សជាច្រើនរាប់មិនអស់ ឲ្យរួចផុតពីសេចក្តីស្លាប់។
ការអធិស្ឋានរបស់យើងក៏អាចនាំមកនូវការផ្លាស់ប្តូរផងដែរ។ យើងមិនចាំបាច់ត្រូវអធិស្ឋានវែងអន្លាយ។ យើងអាចអធិស្ឋានខ្លីៗ ដោយពាក្យដ៏ពីរោះ នៅពេលណាក៏បាន។ ទោះយើងនៅកន្លែងធ្វើការ កំពុងធ្វើការងារផ្ទះ ឬកំពុងសម្រាកលំហែក្តី យើងអាច “អធិស្ឋានឥតឈប់ឈរ”(១ថែស្សាឡូនិច ៥:១៧)។
ព្រះអម្ចាស់សព្វព្រះទ័យនឹងស្តាប់យើងអធិស្ឋាន ដោយមិនប្រកាន់ពេលវេលា។ សាវ័កប៉ុលបានរំឭកយើង ឲ្យឈប់រស់នៅជាអ្នកទោសរបស់ការព្រួយបារម្ភ ឬការភ័យខ្លាចទៀត ដោយផ្ទេរទុក្ខព្រួយទាំងអស់ដល់ព្រះ។ គឺដូចដែលគាត់បានបង្រៀនថា “កុំឲ្យខ្វល់ខ្វាយអ្វីឡើយ ចូរទូលដល់ព្រះ ឲ្យជ្រាបពីសេចក្តីសំណូមរបស់អ្នករាល់គ្នា ក្នុងគ្រប់ការទាំងអស់ ដោយសេចក្តីអធិស្ឋាន និងពាក្យទូលអង្វរ ទាំងពោលពាក្យអរព្រះគុណផង។ យ៉ាងនោះ សេចក្តីសុខសាន្តរបស់ព្រះ ដែលហួសលើសពីអស់ទាំងគំនិត និងជួយការពារចិត្ត ហើយនិងគំនិតរបស់អ្នករាល់គ្នា ក្នុងព្រះគ្រីស្ទយេស៊ូវ”(ភីលីព ៤:៦-៧)។
ទោះយើងកំពុងអរសប្បាយនឹងថ្ងៃដែលមានអាកាសធាតុល្អ ឬកំពុងតែទទួលរងការវាយប្រហារ ដោយសារខ្យល់ព្យុះខាងវិញ្ញាណក៏ដោយ ចូរយើងកុំភ្លេចឈប់បង្អង់សិន ដើម្បីអធិស្ឋាន ទោះយើងកំពុងស្ថិតក្នុងពេលណាក៏ដោយ។—Nancy Gavilanes
តើធ្វើដូចម្តេចឲ្យអ្នកអាចមានចិត្តចង់អធិស្ឋាន ដោយមិនប្រកាន់ពេលវេលា?
តើជីវិតនៃការអធិស្ឋានរបស់អ្នក មានការចម្រើនឡើង ដូចម្តេចខ្លះ ក្នុងរយៈពេលប៉ុន្មានឆ្នាំនេះ?
ឱព្រះវរបិតាដែលគង់នៅស្ថានសួគ៌ ទូលបង្គំសូមអរព្រះគុណព្រះអង្គ ដែលទូលបង្គំអាចអធិស្ឋានទៅកាន់ព្រះអង្គ នៅពេលណាក៏បាន។
គម្រោងអានព្រះគម្ពីររយៈពេល១ឆ្នាំ: យេរេមា ១៨-១៩ និង ២ធីម៉ូថេ ៣
