ធ្វើកិច្ចការតូចបំផុតថ្វាយព្រះអង្គ
ដោយAnne Cetas
November 2, 2024
ម៉ាថាយ ២០:២០-២៨
គឺអ្នកណាក្នុងពួកអ្នករាល់គ្នា ដែលចង់ធ្វើជាធំ នោះនឹងត្រូវធ្វើជាអ្នកបំរើដល់អ្នករាល់គ្នាវិញ។ ម៉ាថាយ ២០:២៦
លោកប្រេដ(Brad) បានផ្លាស់ទៅរស់នៅក្នុងទីក្រុងមួយទៀត ហើយមិនយូរប៉ុន្មាន គាត់ក៏រកបានព្រះវិហារមួយកន្លែង ដែលគាត់អាចចូលរួមកម្មវិធីថ្វាយបង្គំព្រះ។ គាត់បានចូលរួមកម្មវិធីថ្វាយបង្គំព្រះ អស់រយៈពេលពីរបីសប្តាហ៍ ហើយបន្ទាប់មក នៅថ្ងៃអាទិត្យមួយនោះ បន្ទាប់ពីកម្មវិធីថ្វាយបង្គំព្រះបានបញ្ចប់ គាត់ក៏បានជជែកជាមួយគ្រូគង្វាល អំពីបំណងចិត្តដែលគាត់មាន ក្នុងការបម្រើព្រះ តាមដែលចាំបាច់។ គាត់ថា គាត់ចង់ចាប់កាន់អំបោស ដើម្បីជួយសម្អាតព្រះវិហារ។ គាត់ក៏បានចាប់ផ្តើមជួយរៀបកៅអី សម្រាប់កម្មវិធីថ្វាយបង្គំ ហើយក៏បានជួយលាងបង្គន់នៅព្រះវិហារ។ ក្រោយមក គ្រួសារពួកជំនុំនោះក៏បានរកឃើញថា លោកប្រេឌមានអំណោយទានបង្រៀន ប៉ុន្តែ គាត់បានស្ម័គ្រចិត្តធ្វើកិច្ចការមួយណាក៏បាន ឲ្យតែគេឲ្យគាត់ធ្វើ។
មានពេលមួយ ព្រះយេស៊ូវបានបង្រៀនសាវ័កយ៉ាកុប និងសាវ័កយ៉ូហាន ព្រមទាំងម្តាយរបស់ពួកគេ អំពីភាពជាអ្នកបម្រើ។ ម្តាយរបស់ពួកគេបានស្នើសុំឲ្យកូនៗរបស់គាត់ មានកន្លែងកិត្តិយស នៅខាងស្តាំ និងខាងឆ្វេងព្រះគ្រីស្ទ បន្ទាប់ពីព្រះអង្គយាងចូលនគរព្រះអង្គវិញ(ម៉ាថាយ ២០:២០-២១)។ សាវ័កដទៃទៀតក៏បានឮពួកគេជជែកគ្នាអំពីរឿងនេះ ជាហេតុបណ្តាលឲ្យពួកគេតូចចិត្តនឹងបងប្អូនទាំងពីរនោះ។ ប្រហែលជាពួកគេចង់បានកន្លែងនោះ សម្រាប់ខ្លួនឯងដែរហើយមើលទៅ? ព្រះយេស៊ូវក៏បានប្រាប់ពួកគេថា ការប្រើអំណាចមកលើអ្នកដទៃ មិនមែនជារបៀបនៃការរស់នៅ ដែលត្រឹមត្រូវនោះទេ(ខ.២៥-២៦) ប៉ុន្តែ ផ្ទុយទៅវិញ ការបម្រើសំខាន់ជាងការមានអំណាចមកលើអ្នកដទៃ។ គឺដូចដែលព្រះអង្គមានបន្ទូលថា “អ្នកណាក្នុងពួកអ្នករាល់គ្នា ដែលចង់ធ្វើជាធំ នោះនឹងត្រូវធ្វើជាអ្នកបំរើដល់អ្នករាល់គ្នាវិញ”(ខ.២៦)។
ការដែលលោកប្រេដនិយាយថា គាត់ចង់ចាប់ផ្តើមបម្រើព្រះ ដោយ “ចាប់កាន់អំបោស សម្អាតព្រះវិហារ” គឺបានធ្វើជាទីបន្ទាល់ដ៏ល្អ អំពីកិច្ចការដ៏តូចបំផុត ដែលយើងអាចធ្វើ ក្នុងសហគមន៍ និងពួកជំនុំរបស់យើង ដើម្បីបម្រើព្រះគ្រីស្ទ។ លោកប្រេដក៏បានរៀបរាប់ អំពីទឹកចិត្តដែលគាត់មានចំពោះព្រះយ៉ាងដូចនេះថា “ខ្ញុំចង់ធ្វើការបម្រើ ដើម្បីថ្វាយសិរីល្អដល់ព្រះ ដើម្បីជាប្រយោជន៍ដល់ពិភពលោក ហើយដើម្បីឲ្យខ្លួនខ្ញុំមានអំណរ”។ តើយើងម្នាក់ៗអាច “ចាប់កាន់អំបោស” ដើម្បីធ្វើការបម្រើព្រះ ចាប់តាំងពីកិច្ចការតូចបំផុតទៅ តាមការដឹកនាំរបស់ព្រះអង្គ ដូចម្តេចខ្លះ?—Anne Cetas
តើអ្នកអាចបម្រើគ្រួសារនៃពួកជំនុំរបស់អ្នក យ៉ាងដូចម្តេចខ្លះ? តើអ្នកនឹងចាប់ផ្តើមការបម្រើនោះ នៅពេលណា?
ឱព្រះអម្ចាស់ ព្រះអង្គបានធ្វើកិច្ចការជាច្រើនណាស់ សម្រាប់ទូលបង្គំ ហើយទូលបង្គំចាំបាច់ត្រូវស្រឡាញ់ព្រះអង្គ។
សូមព្រះអង្គចម្រើនកម្លាំងទូលបង្គំ ហើយបង្ហាញទូលបង្គំអំពីរបៀបបម្រើអ្នកដទៃ ដែលនៅក្បែរទូលបង្គំ។
គម្រោងអានព្រះគម្ពីររយៈពេល១ឆ្នាំ: យេរេមា ២៧-២៩ និង ទីតុស ៣