ការសម្រេចចិត្តដោយប្រាជ្ញា
ដោយPatricia Raybon
November 21, 2024
ទំនុកដំកើង ១១៩:១០១-១០៦
ព្រះបន្ទូលនៃទ្រង់ជាចង្កៀងដល់ជើងទូលបង្គំ ហើយជាពន្លឺបំភ្លឺផ្លូវទូលបង្គំផង។ ទំនុកដំកើង ១១៩:១០៥
មានពេលមួយ ខ្ញុំត្រូវសម្រេចចិត្តលក់ផ្ទះរបស់ម្តាយខ្ញុំ ដែលបានលាកចាកលោកហើយ។ នេះជាការសម្រេចចិត្តដែលបានក្លាយជាបន្ទុកដ៏ធ្ងន់ក្នុងចិត្តខ្ញុំ បន្ទាប់ពីម្តាយជាទីស្រឡាញ់ ជាស្ត្រីមេម៉ាយ បានទទួលមរណៈភាព។ ខ្ញុំមានមនោសញ្ចេតនាដិតជាប់នឹងទីកន្លែងដែលគាត់ធ្លាប់រស់នៅ ធ្វើឲ្យខ្ញុំពិបាកគ្រប់គ្រងអារម្មណ៍។ ទោះជាយ៉ាងណាក៏ដោយ ខ្ញុំ និងប្អូនស្រីរបស់ខ្ញុំបាននាំគ្នាសម្អាត និងជួសជុលផ្ទះដែលគ្មានមនុស្សនៅនោះ អស់រយៈពេល២ឆ្នាំ ហើយក៏បានសម្រេចចិត្តលក់វា។ ដោយសារយើងបានដាក់លក់ផ្ទះនោះ ក្នុងអំឡុងពេលវិបត្តិសេដ្ឋកិច្ច កាលពីឆ្នាំ២០០៨ គ្មាននរណាទិញផ្ទះនោះទេ។ យើងក៏បានទម្លាក់តម្លៃលក់ផ្ទះនោះ នៅតែគ្មានគេទិញ។ បន្ទាប់មក ខណៈពេលដែលខ្ញុំកំពុងអានព្រះគម្ពីរប៊ីប នៅពេលព្រឹកថ្ងៃមួយនោះ ខ្ញុំមានការប៉ះពាល់ចិត្តនឹងបទគម្ពីរមួយ ដែលបានចែងថា “ផ្ទះណាគ្មានគោ នោះក្រោលរមែងស្អាតល្អ តែគឺដោយកំឡាំងគោនោះឯង ដែលនឹងចំរើនកើនឡើងបាន”(សុភាសិត ១៤:៤)។
បទគម្ពីរសុភាសិតនេះកំពុងនិយាយអំពីការចិញ្ចឹមសត្វ ប៉ុន្តែ ខ្ញុំមានការចាប់អារម្មណ៍យ៉ាងខ្លាំង ចំពោះខ្លឹមសារនៃបទគម្ពីរនេះ។ ផ្ទះរបស់ម្តាយខ្ញុំនៅតែមានរបៀបរៀបរយ ដោយសារមិនមានមនុស្សរស់នៅ ប៉ុន្តែ ទាល់តែផ្ទះនោះមាន “ភាពរញ៉េរញ៉ៃ” ដោយសារមានមនុស្សស្នាក់នៅ ទើបវាអាចបង្កើតផលផ្លែដែលមានប្រយោជន៍។ ឬមានប្រយោជន៍ចំពោះយើង ក្នុងលក្ខណៈជាកេរដំណែលប្រចាំគ្រួសារ។ ខ្ញុំក៏បានទូរស័ព្ទសួរប្អូនខ្ញុំ ដើម្បីឲ្យយើងអាចដាក់ជួលផ្ទះនោះវិញ។
ការសម្រេចចិត្តនេះបានធ្វើឲ្យយើងភ្ញាក់ផ្អើល។ យើងមិនមានគម្រោងកែប្រែផ្ទះរបស់ម្តាយខ្ញុំ ឲ្យក្លាយជាការវិនិយោគនោះទេ។ ប៉ុន្តែ ព្រះគម្ពីរប៊ីបបានធ្វើជាអ្នកប្រឹក្សាយោបល់ខាងវិញ្ញាណ ដែលបានផ្តល់ឲ្យយើងនូវប្រាជ្ញា សម្រាប់ស្ថានភាពជាក់ស្តែង។ គឺដូចដែលស្តេចដាវីឌបានអធិស្ឋានថា “ឱព្រះយេហូវ៉ាអើយ សូមបង្ហាញអស់ទាំងផ្លូវរបស់ទ្រង់
ដល់ទូលបង្គំ សូមបង្រៀនទូលបង្គំក្នុងផ្លូវច្រករបស់ទ្រង់”(ទំនុកដំកើង ២៥:៤)។
តាមរយៈការសម្រេចចិត្តនេះ ខ្ញុំនិងប្អូនស្រីខ្ញុំបានទទួលព្រះពរ ដោយសារយើងបានជួលផ្ទះរបស់ម្តាយយើង ឲ្យក្រុមគ្រួសារដែលគួរឲ្យស្រឡាញ់ជាច្រើន។ ព្រះគម្ពីរប៊ីបជួយដឹកនាំការសម្រេចចិត្តរបស់យើង។ នេះជាសេចក្តីពិតដែលកែប្រែជីវិតដែលយើងរៀនសូត្របាននៅក្នុងរឿងនេះ។ គឺដូចដែលបទគម្ពីរទំនុកដំកើង ១១៩:១០៥ បានចែងថា “ព្រះបន្ទូលនៃទ្រង់ជាចង្កៀងដល់ជើងទូលបង្គំ ហើយជាពន្លឺបំភ្លឺផ្លូវទូលបង្គំផង”។ ចូរយើងដើរក្នុងពន្លឺរបស់ព្រះ។—Patricia Raybon
តើមានការសម្រេចចិត្តដ៏ពិបាកមួយណា ដែលអ្នកកំពុងប្រឈមមុខដាក់? តើព្រះគម្ពីរប៊ីបអាចផ្តល់ឲ្យអ្នកនូវចម្លើយដូចម្តេចខ្លះ?
ឱព្រះអម្ចាស់ ខណៈពេលដែលទូលបង្គំធ្វើការសម្រេចចិត្ត សូមព្រះអង្គដឹកនាំទូលបង្គំ ដោយពន្លឺនៃព្រះបន្ទូលក្នុងព្រះគម្ពីរប៊ីប។
គម្រោងអានព្រះគម្ពីររយៈពេល១ឆ្នាំ: អេសេគាល ១៨-១៩ និង យ៉ាកុប ៤