ដានីយ៉ែល ៦:១-១០
លោកលុតជង្គង់ចុះអធិស្ឋាន ហើយអរព្រះគុណដល់ព្រះរបស់លោក១ថ្ងៃ៣ដង ដូចជាកាលពីមុន។ ដានីយ៉ែល ៦:១០
លោកធីម៉ូថេ(Timothy) ជានាវិកជនជាតិអូស្ត្រាលី ដែលបានរស់ដោយសារសាច់ត្រីឆៅ និងទឹកភ្លៀងតែម្នាក់ឯង អស់រយៈពេល៣ខែ។ ទូកក្តោងរបស់គាត់បានខូចដោយសារខ្យល់ព្យុះ ហើយបានរសាត់អណ្ដែតក្នុងមហាសមុទ្រប៉ាស៊ីហ្វិក ចម្ងាយជិត២ពាន់គីឡូម៉ែត្រពីឆ្នេរសមុទ្រ។ ប៉ុន្តែ ក្រោយមក ពួកនាវិកនៅលើទូកនេសាទរបស់ជនជាតិម៉ិចស៊ីកូ ដែលកំពុងនេសាទត្រីធូណា បានប្រទះឃើញទូកក្តោងរបស់គាត់ ដែលបានខូចនោះ ហើយក៏ជួយសង្គ្រោះគាត់។ ក្រោយមក បុរសស្គមស្គាំង និងទ្រោមខ្លួនដោយសារអាកាសធាតុដ៏កាចសាហាវ ក៏បានប្រកាសថា “ខ្ញុំពិតជាចង់ថ្លែងអំណរគុណក្រៃលែង ចំពោះកាពីទែនរបស់ទូកនេសាទ និងក្រុមហ៊ុននេសាទ ដែលបានសង្គ្រោះជីវិតខ្ញុំ”។
លោកធីម៉ូថេ បានថ្លែងអំណរគុណ បន្ទាប់ពីគាត់បានឆ្លងកាត់ទុក្ខវេទនានៅកណ្តាលមហាសមុទ្រ ប៉ុន្តែ ហោរាដានីយ៉ែលបានបង្ហាញចេញនូវចិត្តដែលដឹងគុណព្រះអម្ចាស់ នៅមុនពេល នៅក្នុងពេល និងនៅក្រោយពេលដែលគាត់ជួបរឿងវិបត្តិ។ គាត់ត្រូវគេនិរទេស ទៅទីក្រុងបាប៊ីឡូនពីនគរយូដា ជាមួយពូជអំបូរយូដាដទៃទៀត(ដានីយ៉ែល ១:១-៦)។ ប៉ុន្តែ ក្រោយមក គាត់ក៏បានឡើងកាន់មុខតំណែងធំ ដែលធ្វើឲ្យពួកនាម៉ឺនដទៃទៀតច្រណែនឈ្នានីស ហើយចង់ឲ្យគេសម្លាប់គាត់(៦:១-៧)។ ពួកសត្រូវរបស់គាត់ ក៏បានទៅគាល់អធិរាជនៃចក្រភពបាប៊ីឡូន ដើម្បីសូមឲ្យទ្រង់ចេញច្បាប់ ដែលចែងថា នរណាក៏ដោយដែលអធិស្ឋានទៅរកព្រះណាមួយ នឹងត្រូវគេកាត់ទោស ដោយបោះចូលទៅក្នុងរូងសឹង(ខ.៧)។ នៅពេលនោះ តើលោកដានីយ៉ែល ជាមនុស្សដែលស្រឡាញ់នឹងបម្រើព្រះពិតតែមួយ បានឆ្លើយតបដូចម្តេច? គឺគាត់បាន លុតជង្គង់ចុះអធិស្ឋាន អរព្រះគុណដល់ព្រះរបស់គាត់១ថ្ងៃ៣ដង ដូចជាកាលពីមុន(ខ.១០)។ គាត់បានទូលថ្វាយការអរព្រះគុណដល់ព្រះ ហើយព្រះអម្ចាស់ក៏បានប្រទានពរគាត់ ដោយសារគាត់មានចិត្តដែលដឹងគុណព្រះអង្គ ដោយព្រះអង្គបានសង្គ្រោះជីវិតគាត់ ហើយក៏បានលើកគាត់ឲ្យមានកិត្តិស័ព្ទ(ខ.២៦-២៨)។
សូមព្រះអម្ចាស់ជួយយើងអរព្រះគុណព្រះអង្គ “គ្រប់កាលៈទេសៈ”(១ថែស្សាឡូនិច ៥:១៨)។ ទោះយើងកំពុងប្រឈមមុខដាក់រឿងវិបត្តិ ឬទើបតែបានឆ្លងកាត់ហើយក្តី ការឆ្លើយតប ដោយការដឹងគុណ គឺជាការថ្វាយព្រះកិត្តិនាមដល់ព្រះអង្គ ហើយជួយឲ្យសេចក្តីជំនឿយើងនៅតែមានភាពជាប់លាប់។—Tom Felten
ហេតុអ្វីយើងចាំបាច់ត្រូវអរព្រះគុណព្រះជាទៀងទាត់? តើធ្វើដូចម្តេចឲ្យអ្នកមានចិត្តដែលដឹងគុណព្រះ?
ឱព្រះអម្ចាស់ សូមព្រះអង្គជួយទូលបង្គំ ឲ្យអរព្រះគុណព្រះអង្គ ជាពិសេសនៅពេលដែលជីវិតមានការពិបាក។
គម្រោងអានព្រះគម្ពីររយៈពេល១ឆ្នាំ: អេសេគាល ៣៧-៣៩ និង ២ពេត្រុស ២
