ទីតុស ២:៦-៨
ដូច្នេះ ចូរឲ្យពន្លឺរបស់អ្នករាល់គ្នា បានភ្លឺនៅមុខមនុស្សលោកយ៉ាងនោះដែរ ដើម្បីឲ្យគេឃើញការល្អ ដែលអ្នករាល់គ្នាប្រព្រឹត្ត រួចសរសើរដំកើង ដល់ព្រះវរបិតានៃអ្នករាល់គ្នាដែលគង់នៅស្ថានសួគ៌។ ម៉ាថាយ ៥:១៦
កាលលោកឆាលី វ៉ដ(Charlie Ward) រៀននៅសកលវិទ្យាល័យរដ្ឋផ្លូរីដា គាត់គឺជាកីឡាករពីរប្រភេទប្រចាំសាលា។ នៅឆ្នាំ១៩៩៣ ខ្សែប្រយុទ្ធវ័យក្មេងរូបនេះទទួលបានពានរង្វាន់ ហេសមែន សម្រាប់កីឡាករបាល់ទាត់មហាវិទ្យាល័យអាមេរិកដែលល្អជាងគេ ហើយគាត់ក៏ជាតារាបាល់បោះដ៏ឆ្នើម ក្នុងក្រុមរបស់គាត់ផងដែរ។
ថ្ងៃមួយ នៅក្នុងការជជែកគ្នាមុនពេលការប្រកួត គ្រូបង្វឹករបស់គាត់បានប្រើភាសាអសុរោះ ទៅកាន់ក្រុមរបស់គាត់។ គ្រូបង្វឹករូបនោះក៏បានកត់សំគាល់ឃើញថា ឆាលី មានទឹកមុខមិនស្រួល ហើយក៏បានសួរគាត់ថា “ឆាលី មានរឿងអី?” ឆាលីក៏បានប្រាប់គាត់ថា “លោកគ្រូដឹងទេ លោកគ្រូ បូឌិន(Bowden) ជាគ្រូបង្វឹករបស់ក្រុមកីឡាករបាល់ទាត់ មិនបានប្រើភាសាប្រភេទនេះទេ តែគាត់អាចលើកទឹកចិត្តយើងឲ្យប្រឹងប្រែងប្រកួតអត់ពីសមត្ថភាព”។
ដោយសារឆាលី មានចរិតលក្ខណៈដូចព្រះយេស៊ូវ នោះគាត់អាចនិយាយដោយសុភាពទៅកាន់គ្រូបង្វឹករូបនោះ អំពីបញ្ហានេះ។ តាមពិត ក្រោយមក គ្រូបង្វឹកនោះក៏បានប្រាប់អ្នកយកព័ត៌មានថា គាត់មានអារម្មណ៍ហាក់ដូចជាមានទេវតាមួយអង្គ មើលទៅគាត់ ពេលគាត់កំពុងជជែកជាមួយឆាលី។
ការបន្តមានកេរ្តិ៍ឈ្មោះល្អ ក្នុងចំណោមអ្នកមិនជឿព្រះ និងការធ្វើបន្ទាល់ដ៏ស្មោះត្រង់ថ្វាយព្រះគ្រីស្ទ មិនមែនជាការងាយទេ។ ប៉ុន្តែ ទន្ទឹមនឹងនោះ អ្នកជឿព្រះយេស៊ូវអាចរីកលូតលាស់ ឲ្យមានលក្ខណៈសម្បត្តិកាន់តែដូចព្រះអង្គ ខណៈពេលដែលព្រះអង្គដឹកនាំយើង។ បទគម្ពីរទីតុសជំពូក២ បានបង្រៀនយុវជន ក៏ដូចជាអ្នកជឿទាំងអស់ ឲ្យ “មានចិត្តធ្ងន់”(ខ.៦) ហើយ “សំដែងខ្លួន ទុកជាគំរូពីការល្អគ្រប់ជំពូក ទាំងបង្រៀនគេ កុំឲ្យគេប្រព្រឹត្តខូចអាក្រក់ឡើយ តែឲ្យមានចិត្តនឹងធឹងវិញ ព្រមទាំងពាក្យសំដីត្រឹមត្រូវ ដែលរកចាប់ទោសមិនបានផង”(ខ.៧-៨)។
ពេលណាយើងរស់នៅយ៉ាងដូចនេះ ដោយកម្លាំងពីព្រះគ្រីស្ទ យើងមិនគ្រាន់តែបានថ្វាយព្រះកិត្តិនាមដល់ព្រះអង្គប៉ុណ្ណោះទេ តែក៏ធ្វើឲ្យគេចង់ស្វែងយល់អំពីព្រះអង្គផងដែរ។ ហើយខណៈពេលដែលព្រះអម្ចាស់ប្រទានប្រាជ្ញាដែលយើងត្រូវការ អ្នកដទៃនឹងមានហេតុផល ដែលត្រូវបើកចិត្តស្តាប់យើងធ្វើបន្ទាល់ពីព្រះយេស៊ូវ។—Dave Branon
តើការមានកេរ្តិ៍ឈ្មោះល្អបានជួយអ្នកឲ្យមានឥទ្ធិពល មកលើអ្នកដទៃដូចម្តេចខ្លះ? តើធ្វើដូចម្តេចឲ្យអ្នកអាចមានចរិតលក្ខណៈដូចព្រះគ្រីស្ទ?
ឱព្រះអម្ចាស់ សូមព្រះអង្គជួយទូលបង្គំ ឲ្យចម្រើនឡើង ដោយមានចរិតលក្ខណៈ ដែលឆ្លុះបញ្ចាំងឲ្យគេស្គាល់ព្រះអង្គ ហើយថ្វាយព្រះកិត្តិនាមដល់ព្រះអង្គ។
For further study, read Evangelism—Reaching Out through Relationships at DiscoverODB.org.
គម្រោងអានព្រះគម្ពីររយៈពេល១ឆ្នាំ: អេសេគាល ៤០-៤១ និង ២ពេត្រុស ៣
