មនុស្សដែលលើកទឹកចិត្ត
ដោយJames Banks
December 2, 2024
កិច្ចការ ១១:១៩-២៦
គាត់មានសេចក្តីអំណរ ក៏ទូន្មានគេគ្រប់គ្នា ឲ្យសំរេចចិត្តនឹងនៅជាប់ក្នុងព្រះអម្ចាស់។ កិច្ចការ ១១:២៣
កាលលោកចេ អរ អរ ថូលគិន(J. R. R. Tolkien) បានទទួល “ការលើកទឹកចិត្តដ៏លើសលប់” ពីលោកស៊ីអេស លូអ៊ីស(C. S. Lewis) ជាមិត្តសំឡាញ់ និងមិត្តរួមការងារ ខណៈពេលដែលគាត់និពន្ធសៀវភៅរឿងប្រលោមលោកដ៏ល្បីល្បាញមានចំណងជើងថា ម្ចាស់ចិញ្ចៀន។ លោកថូលគិនបាននិពន្ធសៀវភៅរឿងភាគនេះ ដោយការប្រឹងប្រែង និងអត់ធ្មត់យ៉ាងខ្លាំង ហើយគាត់ជាអ្នកវាយអត្ថបទដ៏វែងដោយផ្ទាល់ដៃ មិនតិចជាង២ដងទេ។ នៅពេលដែលគាត់ផ្ញើអត្ថបទដែលគាត់បានវាយនោះ ទៅលោកលូអ៊ីស លោកលូអ៊ីសក៏បានឆ្លើយតបថា “រយៈពេលជាច្រើនឆ្នាំ ដែលលោកបាននិពន្ធសៀវភៅរឿងនេះ គឺពិតជាមានតម្លៃណាស់”។
នៅក្នុងព្រះគម្ពីរសញ្ញាថ្មី លោកយ៉ូសែប មកពីកោះគីប្រុស ប្រហែលមានឈ្មោះល្បីបំផុត ជាអ្នកលើកទឹកចិត្ត ហើយក្រោយមក ពួកសាវ័កក៏បានដាក់ឈ្មោះឲ្យគាត់ថា បាណាបាស(មានន័យថា “កូននៃការលើកទឹកចិត្ត” កិច្ចការ ៤:៣៦)។ លោកបាណាបាសក៏ជាអ្នកនាំពួកសាវ័ក ឲ្យទទួលស្គាល់សាវ័កប៉ុលផងដែរ(៩:២៧)។ ក្រោយមក បន្ទាប់សាសន៍ដទៃជាច្រើនបានទទួលជឿព្រះគ្រីស្ទ “គាត់ក៏មានសេចក្តីអំណរ ក៏ទូន្មានគេគ្រប់គ្នា ឲ្យសំរេចចិត្តនឹងនៅជាប់ក្នុងព្រះអម្ចាស់”(១១:២៣)។ លោកលូកាបានពិពណ៌នាថា “គាត់ជាមនុស្សល្អ ពេញជាព្រះវិញ្ញាណបរិសុទ្ធ និងសេចក្តីជំនឿ ហើយមានមនុស្សសន្ធឹកណាស់ បានចំរើនដល់ព្រះអម្ចាស់”(ខ.២៤)។
ពាក្យលើកទឹកចិត្តពិតជាមានតម្លៃណាស់ យើងមិនអាចវាស់បានទេ។ ខណៈពេលដែលយើងចែកចាយ អំពីសេចក្តីជំនឿ និងសេចក្តីស្រឡាញ់ដល់អ្នកដទៃ ព្រះដែលបានប្រទាន “ការលើកទឹកចិត្តដ៏អស់កល្ប”(២ថែស្សាឡូនិច ២:១៦) អាចធ្វើការក្នុងចិត្តអ្នកដទៃ តាមរយៈការអ្វីដែលយើងចែកចាយនោះ ដើម្បីកែប្រែជីវិតរបស់ពួកគេជារៀងរហូត។ សូមព្រះអង្គជួយយើងផ្តល់ឲ្យអ្នកដទៃនូវការ “លើកទឹកចិត្តដ៏លើសលប់” នៅថ្ងៃនេះ!—James Banks
តើអ្នកចង់លើកទឹកចិត្តនរណាខ្លះ? តើអ្នកអាចចែកចាយអំពីសេចក្តីស្រឡាញ់របស់ព្រះ ដល់ពួកគេ តាមរយៈពាក្យសម្តី ឬការប្រព្រឹត្តដ៏សប្បុរស យ៉ាងដូចម្តេចខ្លះ?
ឱព្រះអម្ចាស់ សូមព្រះអង្គជួយទូលបង្គំឲ្យលើកទឹកចិត្តអ្នកដទៃ នៅថ្ងៃនេះ ទោះតាមមធ្យោបាយណាក៏ដោយ។
គម្រោងអានព្រះគម្ពីររយៈពេល១ឆ្នាំ: អេសេគាល ៤២-៤៤ និង ១យ៉ូហាន ១