តាមការទតឃើញរបស់ព្រះអង្គ
ដោយKenneth Petersen
December 18, 2024
លោកុប្បត្តិ ១:១-១០
នោះទ្រង់ក៏ឃើញថាល្អ។ លោកុប្បត្តិ ១:១០
កាលពីឆ្នាំ១៩៦៨ អាមេរិកមានការប្រលោកប្រឡាក់ ក្នុងសង្គ្រាមជាមួយប្រទេសវៀតណាម អំពើហិង្សាដោយសារការប្រកាន់ពូជសាសន៍បានផ្ទុះឡើងនៅតាមបណ្តាទីក្រុងទាំងឡាយ ហើយមានបុគ្គលសាធារណៈដ៏សំខាន់ពីររូបត្រូវគេធ្វើឃាត។ កាលមួយឆ្នាំមុន អគ្គីភ័យបានឆក់យកជីវិតអវកាសយានិកបីនាក់ នៅកន្លែងបាញ់បង្ហោះយានអវកាស ហើយការមានគំនិតចង់បញ្ជូនមនុស្សទៅស្ថានព្រះច័ន្ទហាក់ដូចជាក្តីសង្ឃឹមដែលមិនអាចក្លាយជាការពិត។ ទោះជាយ៉ាងណាក៏ដោយ យានអវកាសអាប៉ូឡូទី៨ បានបាញ់បង្ហោះដោយជោគជ័យ ក្នុងពេលពីរបីថ្ងៃបន្ទាប់ មុនថ្ងៃណូអែលចូលមកដល់។
អាប៉ូឡូទី៨ បានសម្រេចបេសកកម្មដែលមានមនុស្សបើកបរដោយផ្ទាល់ ក្រឡឹងជុំវិញស្ថានព្រះច័ន្ទ។ អវកាសយានិក ដែលមានដូចជាលោកបូរមិន(Borman) លោកអ៊ែនឌ័រ(Anders) និងលោកឡូវែល(Lovell) ដែលសុទ្ធតែជាអ្នកជឿព្រះ បានបង្ហោះសារតាមរលកធាតុអាកាស នៅថ្ងៃណូអែលថា “កាលដើមដំបូងឡើយ ព្រះបានបង្កើតផ្ទៃមេឃ និងផែនដី”(លោកុប្បត្តិ ១:១)។ នៅពេលនោះ ព្រឹត្តិការណ៍នេះត្រូវបានគេចាក់ផ្សាយ នៅលើកញ្ចក់ទូរទស្សន៍ ហើយបានក្លាយជាព្រឹត្តិការណ៍ដែលមានគេទស្សនាច្រើនជាងគេបំផុតនៅលើពិភពលោក ដោយពេលនោះ មនុស្សរាប់លាននាក់បានមើលរូបថតផែនដី ដែលគេថតបាន ក្នុងទីអវកាសនៅក្រៅផែនដី។ លោកហ្វ្រែង បូរមិន(Frank Borman) ក៏បានបញ្ចប់ការអានខគម្ពីរដោយពាក្យថា “នោះទ្រង់ក៏ឃើញថាល្អ”(ខ.១០)។
ពេលខ្លះយើងមើលខ្លួនយើង ដែលប្រឡាក់ទៅដោយការលំបាកទាំងអស់ដែលយើងបានជួប ហើយមើលមិនឃើញអ្វីដែលល្អ។ ប៉ុន្តែ យើងអាចវិលត្រឡប់មកជញ្ជឹងគិត អំពីរឿងនៃការបង្កើតរបស់សព្វសារពើ ដែលមានចែងក្នុងព្រះគម្ពីរប៊ីប និងមើលឃើញខ្លួនឯង តាមការទតឃើញរបស់ព្រះ គឺមើលឃើញខ្លួនយើងដែលព្រះអង្គបានបង្កើត “ឲ្យចំនឹងរូបអង្គទ្រង់” (ខ.២៧)។ ចូរយើងស្វែងយល់អំពីការទតឃើញមួយទៀតរបស់ព្រះអង្គ ក្នុងបទគម្ពីរយ៉ូហាន ៣:១៦ ដែលបានចែងថា “ដ្បិតព្រះទ្រង់ស្រឡាញ់មនុស្សលោក ដល់ម៉្លេះបានជាទ្រង់ប្រទានព្រះរាជបុត្រាទ្រង់តែ១”។ នៅថ្ងៃនេះ ចូរយើងចាំថា ព្រះដែលបានបង្កើតយើងមក បានមើលឃើញចំណុចល្អរបស់យើង ទោះយើងមានបាបក៏ដោយ ហើយនៅតែស្រឡាញ់យើង។—Kenneth Petersen
តើអ្នកកំពុងប្រឡាក់ទៅដោយទុក្ខលំបាក និងអំពើបាបអ្វី នៅថ្ងៃនេះ? តើការដែលព្រះអង្គបានបង្កើតអ្នក ឲ្យមានរូបភាពដូចព្រះអង្គមានន័យដូចម្តេចចំពោះអ្នក?
ឱព្រះអម្ចាស់ សព្វថ្ងៃនេះ ទូលបង្គំកំពុងតយុទ្ធនឹងទុក្ខលំបាក។ សូមព្រះអង្គជួយទូលបង្គំឲ្យមើលឃើញអ្វីដែលព្រះអង្គបានទតឃើញក្នុងទូលបង្គំ។
គម្រោងអានព្រះគម្ពីររយៈពេល១ឆ្នាំ: យ៉ូណាស ១-៤ និង វិវរណៈ ១០