បើកបង្អួចទទួលយកភាពអស្ចារ្យ
ដោយTim Gustafson
December 20, 2024
វិវរណៈ ២១:២៣-២២:៥
គេមិនត្រូវការនឹងចង្កៀងណា ឬពន្លឺព្រះអាទិត្យទេ ពីព្រោះព្រះអម្ចាស់ដ៏ជាព្រះទ្រង់នឹងបំភ្លឺគេ។ វិវរណៈ ២២:៥
លោករ៉ុន មួររេយ(Ronn Murray) គឺជាជាងថតរូប ដែលចូលចិត្តរដូវរងា។ គាត់បានពន្យល់ថា “នៅរដូវរងា ផ្ទៃមេឃស្រឡះល្អ ធ្វើឲ្យយើងចិត្តស្រស់ស្រាយ ហើយបើកចិត្តទទួលយកអ្វីៗដែលស្រស់ស្អាតអស្ចារ្យ!”
លោករ៉ុនបានផ្តល់សេវាកម្មនាំផ្លូវភ្ញៀវទេសចរណ៍ ដែលចង់ធ្វើដំណើរកម្សាន្តនៅរដ្ឋអាឡាស្កា ដើម្បីតាមថតរូបទេសភាពពន្លឺដែលគួរឲ្យចាប់អារម្មណ៍បំផុតនៅលើផែនដី គឺជាពន្លឺរេរាំតំបន់ខាងជើងនៃផែនដី។ លោករ៉ុនបានបកស្រាយថា ការដកពិសោធន៍ជាមួយទិដ្ឋភាពដ៏អស្ចារ្យនេះ មានលក្ខណខាងវិញ្ញាណយ៉ាងខ្លាំង។ គាត់ថា បើអ្នកបានឃើញពន្លឺរេរាំនៅលើមេឃ ដែលស្រស់ស្អាតយ៉ាងនេះ អ្នកនឹងយល់អ្វីដែលគាត់និយាយ។
ប៉ុន្តែ ពន្លឺរេរាំនៅពេលយប់ដូចនេះ មិនមែនកើតមានតែតំបន់ខាងជើងនៃផែនដីប៉ុណ្ណោះទេ។ ពន្លឺរេរាំនៅប្រទេសអូស្រ្តាលី ក៏មានលក្ខណៈដូចពន្លឺរេរាំនៅតំបន់ខាងជើងស្ទើរទាំងស្រុង គ្រាន់តែខុសគ្នាត្រង់ថា វាកើតមាននៅតំបន់ខាងត្បូង តែជាប្រភេទពន្លឺតែមួយទេ។
ក្នុងការចែកចាយរបស់សាវ័កយ៉ូហានអំពីរឿងថ្ងៃណូអែល គាត់មិនបាននិយាយអំពីក្រោលសត្វ និងពួកអ្នកគង្វាលទេ តែគាត់បាននិយាយអំពីព្រះយេស៊ូវតែម្តង។ គឺដូចដែលគាត់បានពិពណ៌នាថា ព្រះអង្គបានជាពន្លឺនៃមនុស្សលោក(យ៉ូហាន ១:៤)។ ក្រោយមកទៀត នៅពេលដែលសាវ័កយ៉ូហានបានសរសេរអំពីទីក្រុងនៅស្ថានសួគ៌ គាត់ក៏បានពិពណ៌នា អំពីប្រភពនៃពន្លឺរបស់ទីក្រុងនោះ។ គាត់ថា “ក្រុងនោះមិនត្រូវការនឹងព្រះអាទិត្យ ឬព្រះចន្ទ សំរាប់នឹងបំភ្លឺទេ ដ្បិតសិរីល្អនៃព្រះបានបំភ្លឺហើយ ឯកូនចៀមក៏ជាចង្កៀងនៃក្រុងនោះដែរ”(វិវរណៈ ២១:២៣)។ ព្រះយេស៊ូវគឺជាប្រភពនៃពន្លឺនោះ គឺជាប្រភពតែមួយ ដែលបទគម្ពីរយ៉ូហាន ជំពូក១បានចែង។ ហើយអស់អ្នកដែលបានរស់នៅក្នុងទីលំនៅថ្មីនេះ នៅពេលអនាគត “គេមិនត្រូវការនឹងចង្កៀងណា ឬពន្លឺព្រះអាទិត្យទេ ពីព្រោះព្រះអម្ចាស់ដ៏ជាព្រះទ្រង់នឹងបំភ្លឺគេ”(២២:៥)។
ខណៈពេលដែលការរស់នៅរបស់យើង បានឆ្លុះបញ្ចាំងឲ្យគេស្គាល់ព្រះយេស៊ូវជាពន្លឺនៃលោកិយ ជាអ្នកបង្កើតពន្លឺរេរាំនៅប៉ូលខាងជើង និងប៉ូលខាងត្បូងនៃផែនដី ចូរយើងបើកបង្អួចចិត្តយើងទទួលយកអ្វីដែលពិតជាអស្ចារ្យ ដែលព្រះអង្គបានប្រទានមកយើង។—Tim Gustafson
បាតុភូតធម្មជាតិធ្វើឲ្យអ្នកមានការស្ញប់ស្ញែង នៅពេលណា និងយ៉ាងដូចម្តេចខ្លះ? តើមានអ្វីបង្វែរអារម្មណ៍អ្នក មិនឲ្យបញ្ចេញពន្លឺរបស់ព្រះ ទៅដល់លោកិយ?
ឱព្រះអាទិករនៃចក្រវាលទាំងមូល សូមឲ្យសម្រស់នៃផ្ទៃមេឃនៅពេលយប់ បានរំឭកទូលបង្គំថា ព្រះអង្គជាពន្លឺពិតប្រាកដនៃពិភពលោក។
គម្រោងអានព្រះគម្ពីររយៈពេល១ឆ្នាំ: មីកា ៤-៥ និង វិវរណៈ ១២